by Myo Tha Htet on Sunday, 15 July 2012 at 00:58·

ကျွန်တော်က ငယ်ငယ်ကထဲက ဘောလုံးအားကစားပြီးရင် ဒုတိယ အကြိုက်ဆုံးက လက်ဝှေ့ပဲ…၊ ငယ်ငယ်က လွတ်လပ်ရေးနေ့ ပွဲတွေ ကျင်းပတော့ တခါတခါ လက်ဝှေ့ပွဲ ထည့်တယ်။ ၀င်ထိုးမယ်လို့ စဉ်းစားပေမယ့် ပြိုင်ဘက်အဖြစ် စိန်ခေါ်လာတဲ့ သူက ကျွန်တော့်ထက်လည်း အသက်ကြီး၊ လူကောင်ကလည်း ထွားလို့ မထိုးချင်ပါဘူးဗျာလို့ ရယ်ရယ်မောမော ငြင်းခဲ့ဖူးတယ်။ အဲဒီကထဲက ကျွန်တော်ဟာ လူပါးတယောက်ဖြစ်တာကို ကျွန်တော် သိခဲ့တယ်။ ဟုတ်တယ်လေ… ထိုးရင်လည်း ကိုယ်ပဲ ခံရမယ်၊ အသားနာမယ်လေ…။

ဒါပေမဲ့ လက်ဝှေ့ကို ချစ်တဲ့ အချစ်ကတော့ မလျော့ခဲ့ပါဘူး။ ရန်ကုန်မှာ ရှိတုန်းကတော့ လက်ဝှေ့ပွဲတွေ ကြုံတာပေါ့။ သွားခွင့်လည်း ရှိတယ်၊ အလကား ကြည့်လို့လည်း ရတယ်၊ ဒါပေမဲ့ အလုပ်က မအားတော့ မသွားဖြစ်ဘူး။ အခုတော့ ဒေးဗစ် ဟေး နဲ့ ဒဲရစ် ချစ်ဆိုရာ တို့ ထိုးကြတဲ့ ကမ္ဘာ့ချန်ပီယံ လက်ဝှေ့ပွဲကို ကြည့်ဖူးတယ်ရှိအောင် လန်ဒန်မှာ ကြည့်ဖြစ်ခဲ့တယ်။ ဇူလိုင်လ ၁၄ ရက်နေ့မှာ လန်ဒန် အရှေ့ပိုင်းက West Ham United အားကစားကွင်းထဲမှာ ကြည့်ခဲ့တယ်။

ထုံးစံအတိုင်း လန်ဒန်ရာသီဥတုက အစိုးမရဘူး၊ မိုးတွေ ရွာခဲ့တယ်။ ဒီတော့ ပိုက်ဆံကလည်း အများကြီး ပေးထားရတာမို့ မိုးထဲရေထဲမှာပဲ ကြည့်ခဲ့ရတယ်။ ဒီပွဲမှာ အင်္ဂလိပ်နှစ်ယောက် ထိုးကြတာ ဖြစ်ပေမယ့် ခါးပတ်နှစ်ခု WBO နဲ့ WBA အတွက် ထိုးတာဖြစ်တာကြောင့် စိတ်ဝင် စားဖို့တော့ ကောင်းတယ်။

ဒေးဗစ် ဟေး က ၃၁ နှစ်၊ အရင် WBA ဟဲဗီးဝိတ် ချန်ပီယံဟောင်းဖြစ်ပြီးတော့ သူ့ရဲ့ နာမည်ပြောင်က ဟေး မိတ်ကာ တဲ့…၊ ဒဲရစ်ကတော့ အသက် ၂၈ နှစ် ဖြစ်ပါတယ်၊ သူလည်း ဟဲဗီးဝိတ် လက်ဝှေ့ချန်ပီယံဟောင်း ဖြစ်ပါတယ်။ ဇင်ဘာဘွေမှာ မွေးခဲ့ပြီး ၁၆ နှစ်သားလောက်မှာမှ အင်္ဂလိပ်မြေကို ခြေချခဲ့သူလည်း ဖြစ်ပါတယ်။ သူက နည်းနည်းလောက် မောက်မာပုံရပါတယ်။ အင်္ဂလိပ် ပရိသတ်တွေကတော့ ဒေးဗစ် ဟေးကိုပဲ အားပေးကြပါတယ်။

ဟဲဗီးဝိတ် လက်ဝှေ့ပွဲ မစခင်မှာ ပွဲငယ်လေးတွေ လေးပွဲလောက် ထိုးကြပါတယ်။ ပရိသတ်ကတော့ သိပ်စိတ်မ၀င်စားပါဘူး။ သူတို့က ဒေးဗစ် ဟေးတို့ ထိုးသတ်မယ့် ဟဲဗီးဝိတ်ကိုသာ စောင့်နေကြတာပါ။ လေးနာရီခွဲလောက် ကထဲက West Ham United အားကစားကွင်း ပြင်ပမှာ စောင့်နေကြတဲ့ ပရိသတ်ဟာ ငါးနာရီခွဲကာမှ ကွင်းအတွင်း ၀င်ရပြီး သူတို့ ကြည့်ချင်နေတဲ့ ဟေးတို့ပွဲကို ည ၁၀ နာရီ ကျော်မှသာ စကြည့်ရပါတယ်။

တကယ်ထိုးတော့လည်း ဟေးက ငါးချီမှာ ဒိုင်ပွဲရပ်ဖြစ်အောင် ဒဲရစ်ကို ထိုးချပစ်လိုက်ပါတယ်။ လေးချီအထိကိုတော့ ဒဲရစ်ကပဲ ဒေးဗစ်ကို ကြိုးဝိုင်းထောင့်ဆီ ပို့ပြီး ဖိထိုးနေခဲ့တာ ဖြစ်ပါတယ်။ ဒါကြောင့် ပွဲချီပြည့် ကြည့်ရမယ်လို့ ထင်ထားပေမယ့် စောစောစီးစီး ဒေးဗစ် ဟေးက ပွဲသိမ်းလိုက်တာကိုလည်း သဘောကျမိပါတယ်။ ဘာကြောင့်ဆို မနက်ဖြန် အလုပ်လုပ်ရမှာဆိုတော့ မနက်ဖြန် အိပ်ရာထ နောက်ကျမှာကို စိတ်ပူနေမိလို့ပါ။

ငါးချီနဲ့ ဒိုင်ပွဲရပ် ဖြစ်သွားတော့ ကွင်းတခုလုံးက ပရိသတ်အများစုက ဒေးဗစ် ဟေးကို သောင်းသောင်းဖျဖျ အားပေးကြပါတယ်။ ကျွန်တော်ကတော့ ဒဲရစ် ချစ်ဆိုရာကို နိုင်စေချင်ပါတယ်။ ဒဲရစ်က လက်ဝှေ့စင်ပေါ် တက်ဖို့ ထွက်လာတော့လည်း စိတ်ဝင်စားစရာ ကောင်းပါတယ်။ လျှို့ဝှက်တဲ့ တီးလုံးမျိုးကို တီးခိုင်းပြီး စိတ်လှုပ်ရှားဖွယ်ဖြစ်အောင် မျက်နှာကို ဖုံးအုပ်လို့ သိုသိုသိပ်သိပ် ထွက်လာတာဟာ အင်မတန်မှ သဘောကျဖို့ ကောင်းပါတယ်။

ဒေးဗစ် ဟေးကတော့ ပေါ်ပေါ်တင်တင် စိတ်မပါ့တပါပုံစံနဲ့ စင်ပေါ်တက်ဖို့ ထွက်လာပါတယ်၊ သူ့တီးလုံးကတော့ အမိုက်စား အပျံစား ဖြစ်ပါတယ်။ ဒေးဗစ် ဟေး ပုံစံကို ကြည့်မိတဲ့အခါမှာ ဒီလူတော့ ရှုံးမှာပဲလို့ တွက်ခဲ့မိပါတယ်။ ဒါပေမဲ့ တကယ်တမ်းမှာကျ အစောန ပြောခဲ့သလို ငါးချီနဲ့ ဒဲရစ်ကို ကြမ်းပြင်ပေါ် နှစ်ခါ လှဲသိပ်အပြီးမှာတော့ ဒိုင်ပွဲရပ်နဲ့ ဒေးဗစ် ဟေးကို အနိုင်ပေးခဲ့လိုက်လို့ ခါးပတ်နှစ်ခုစလုံးကို ဒေးဗစ် ဟေးက ရသွားပါတယ်။

ဒဲရစ်က စင်ပေါ်တက်လာတော့ ပထမ ခေါင်းအထိ ဖုံးအုပ်စွပ်ထားတဲ့ လက်ဝှေ့သမားတွေ ၀တ်ဆင်တတ်တဲ့ ၀တ်ရုံကြီးကို ချွတ်လိုက်တဲ့အခါ အာဖရိကသည်သာ အနာဂတ် African is the Future စာတမ်းရေးထားတဲ့ တီရှပ်ကို ၀တ်ဆင်ပြခဲ့ပါတယ်။ ပွဲကြည့်သူ သုံးသောင်းထဲမှာ တယောက်အပါအ၀င် ဖြစ်ခဲ့တဲ့ ကျွန်တော်တောင် ကြောင်သွားပါတယ်။ ကျွန်တော် သိထားတာက အာရှဟာ ကမ္ဘာ့ အနာဂတ် ဖြစ်တယ်၊ ဒါကြောင့် ဒဲရစ်ကတော့ လုပ်ပြန်ပြီလို့ စိတ်ကူးပေါက်မိပါတယ်။

ညနေ လေးနာရီထဲက အိမ်ကထွက်လို့ အားကစားကွင်းရှေ့ကို လေးနာရီခွဲလောက် ကထဲက ရောက်နေတဲ့ ကျွန်တော်ဟာ လက်ဝှေ့ပွဲပြီးတဲ့ ည ၁၀ နာရီခွဲကနေ ဟဲဗီးဝိတ် ချန်ပီယံ ခါးပတ်နှစ်ခုရ ဒေးဗစ် ဟေး လျှောက်လမ်းကနေ ပြန်ထွက်လာမလားလို့ မိနစ် ၂၀ လောက် စောင့်ကြည့်ခဲ့ပေမယ့် ကိုယ်တော်ချောက အင်တာဗျူးတွေကို ကြိုးဝိုင်းပေါ်မှာတင် ပေးနေပုံ ရတာကြောင့် မစောင့်တော့ဘဲ ပြန်ခဲ့ပါတော့တယ်။ အိမ်ရောက်တော့ ည ၁၁ နာရီတောင် ခွဲလုပေါ့…။

ဝက်စ်ဟမ်း ဘောလုံးကွင်းထဲ ကျင်းပတဲ့ ကမ္ဘာ့ ဟဲဗီးဝိတ် ချန်ပီယံ ခါးပတ်လုပွဲကို ပရိသတ် သုံးသောင်းလောက် လာအားပေးတာမို့ အပြန် ခရီးမှာလည်း လူတွေက ပြည့်ကျပ်သပ်နေပါတယ်။ ကားလမ်းပေါ်မှာ ကားတွေက ရပ်ပေးထားပြီး လူတွေက ကားလမ်းပေါ်ကနေ လျှောက်လှမ်းလို့ မြေအောက်ရထား ဘူတာရုံကို လာသူလာ၊ ဘတ်စ်ကားဂိတ်ကို သွားသူသွားနဲ့ လူအုပ်ကြီးက ကြီးမား လှပါတယ်။

လမ်းပေါ်မှာလည်း ဘီယာပုလင်းကွဲတွေ၊ အရက်ပုလင်းကွဲတွေ ရှိနေတာကြောင့် ရှောင်ပြီး လျှောက်ရပါတယ်။ ၀က်စ်ဟမ်းကွင်းမှာ လုပ်တဲ့ ပွဲပီပီ ငကြောင် ပရိသတ်တွေကလည်း ရှိပြန်ပါတယ်။ ဒါကြောင့် ကွင်းထဲမှာလည်း လုံခြုံရေးက ဆွဲခေါ်သွားရတဲ့ လူတွေ ရှိသလို ကွင်းပြင်မှာလည်း မြင်းစီးတဲ့ ရဲအပါအ၀င် ရဲတအုပ်က ထိန်းကျောင်းပေးနေတာလည်း တွေ့ပါတယ်။

ငါးချီနဲ့ ပွဲပြတ်သွားလို့ စောစောပြန်နိုင်ခဲ့တာကို သဘောကျပေမယ့်လို့ ကျွန်တော်ကတော့ ကုန်ခဲ့ရတဲ့ ပိုက်ဆံကို မတန်ဘူးလို့တောင် ထင်မိပါတယ်။ အဲ… ဒါပေမဲ့လည်း အင်္ဂလိပ်ချင်း ဖိုက်တယ် ဆိုပေမယ့် ကမ္ဘာ့ ဟဲဗီးဝိတ် လက်ဝှေ့ ချန်ပီယံပွဲတပွဲတော့ ကြည့်ဖူးသွားတာပေါ့လို့ အကောင်းဘက်က တွေးမြင်လိုက်ပါတယ်။ တိုက်တိုက်ဆိုင်ဆိုင် ဒီညမှာပဲ အိုင်းရင်းခရော့စ်ကလည်း လန်ဒန်မှာ ပွဲလုပ်ပါတယ်၊ လက်မှတ်က အလကားရနိုင်ချေ ရှိတာတောင် ကျွန်တော်က ဟဲဗီးဝိတ် လက်ဝှေ့ပွဲကို အားပေးခဲ့တာမို့ အိုင်စီပွဲကို လက်လွတ်ခဲ့ရပါတယ်။ အိုင်စီက ရန်ကုန်မှာလည်း ကြည့်ခဲ့ဖူးတယ် မဟုတ်ပါလားဗျာ။

ဒီနေ့ တပွဲလုံး သတိရတာဆိုလို့ လက်ဝှေ့ကြိုးဝိုင်းထဲ ၀င်လို့ နောက်အချီအတွက် နံပါတ်ထိုးပြတဲ့ ကောင်မလေးတွေ၊ ဗြိတိသျှ နံပါတ်တစ် တင်းနစ်သမား အင်ဒီမာရေးနဲ့ မိုးရွာထဲမှာ ကမ္ဘာ့ ဟဲဗီးဝိတ် လက်ဝှေ့ပွဲကို ငါးချီ နာရီဝက်လျော့လျော့ မတ်တပ်ရပ် ကြည့်ခဲ့ရတဲ့ အရသာလေး ဖြစ်ပါကြောင်း မှတ်တမ်းတင်ထားလိုက်ရပါတယ်ဗျာ။

၂၀၁၂ ဇူလိုင် ၁၄၊ ည သန်းခေါင်။

လန်ဒန်။

Advertisements