by Myo Tha Htet on Tuesday, 28 August 2012 at 22:09·

ခုတလော ဖေ့စ်ဘုတ် သုံးရတာ အရသာ တွေ့လှပါတယ်။ ၀မ်းသာစရာ သတင်းများကလည်း ဆက်တိုက်ဆိုသလို ကြားရပါတယ်။ သူများ ဒုက္ခရောက်လို့ ၀မ်းသာတာမျိုးတော့ မဟုတ်ပါဘူး၊ အများအတွက် ရေရှည်မှာ ပိုကောင်းလေမလားဆိုတဲ့ စဉ်းစားချက်နဲ့ ၀မ်းမြောက်မှုမျိုးပါ။

ဖေ့စ်ဘုတ်အရသာဆိုတာက ဒီလိုပါ။ တချို့ကလည်း ဖေ့စ်ဘုတ်နိုင်ငံရေး၊ ဖေ့စ်ဘုတ် လွှတ်တော်လို့ ခေါ်ဝေါ်လာကြပါတယ်။ မဟုတ်ဘူးလား ဆိုတော့… ဟုတ်သပေါ့ဗျာ၊ လွှတ်တော်ရုံးက ဖေ့စ်ဘုတ်ပေါ်မှာ ရှိနေပါတယ်။ ပြည်သူ့လွှတ်တော် နာမည်နဲ့ အကောင့်ဖွင့်ထားပြီး လွှတ်တော်တွင်း တင်ပြ၊ ဆွေးနွေးသမျှတွေကို အချိန်မဆိုင်းဘဲ တင်ပြနေတာက စောင့်ဖတ်စရာတောင် ကောင်းလှပါတယ်။

တခါ သမ္မတရုံး ညွှန်ကြားရေးမှူးကလည်း ခုရက်ပိုင်း ၀န်ကြီးတွေ အပြောင်းအလဲကို သမ္မတကြီးက ပြည်သူတွေရဲ့ သုံးသပ် ပြောဆိုမှုတွေအပေါ် တုန့်ပြန်တာပါလို့ ပြောထည့်လိုက်တော့ ပြည်သူ့အသံကို သမ္မတကြီးက ဖေ့စ်ဘုတ်ကနေ နားထောင်နေသလားရယ်လို့တောင် အတွေးပွားမိပါသေးတယ်။

တလက်စတည်း ဖေ့စ်ဘုတ်က နိုင်ငံရေးသုခမိန်တချို့ ပြောကြတာတွေကိုလည်း ပြန်စဉ်းစားမိပြန်ပါတယ်။ ၀န်ကြီးတွေ အပြောင်းအလဲကိုပဲ ကြည့်ပါ၊ အဲ… အမျိုးသမီး ဘယ်နှယောက်တော့ ၀န်ကြီးတွေ (ဒုဝန်ကြီး) တွေ ဖြစ်လာပြန်ပြီဟဲ့…၊ ဘယ်ဌာနတွေမှာတော့ ၀န်ကြီးတွေ လစ်လပ်သွားတာပေါ့၊ ဟို ဒုတိယ ၀န်ကြီးတွေက ၀န်ကြီးတွေ ဖြစ်လာလိမ့်မယ်လား။

သမ္မတအစား နိုင်ငံရေးကျားကွက် ၀င်ရွှေ့ပေးနေတဲ့ လူတွေကို ဖေ့စ်ဘုတ်မှာ တွေ့လာရတာကတော့ ပညာတွေ တိုးတဲ့အပြင် ၀မ်းအသာကြီး သာမိပါတယ်။ တကယ်တမ်း ပြောရရင်တော့ မြန်မာတွေက တခြားနိုင်ငံသားတွေထက် နိုင်ငံရေး နိုးကြားမှု၊ တက်ကြွမှု ပိုတယ်/များတယ်လို့ အကဲခတ်တချို့က သုံးသပ်တာတွေကို ကြားဖူးခဲ့ပါတယ်။

တခါတလေတော့လည်း သူတို့ သုံးသပ်ချက်တွေ ဟုတ်ရဲ့လားလို့ သံသယဖြစ်မိပေမယ့် တကယ့်တကယ်တမ်းတော့ နှစ်ပေါင်း ၅၀ လောက် တင်းကျပ်တဲ့ ဖိနှိပ်မှုအောက် နေခဲ့စားခဲ့၊ ပါးစပ်ပိတ် နားပိတ် သေခဲ့ရတော့ အခုလို နိုင်ငံရေးနယ်ပယ်နဲ့စပ်လို့ အများကြီး တက်တက်ကြွကြွ ရှိနေတာဟာ ကျေနပ်စရာပါ။ မကြောက်ရတဲ့ခေတ်မို့ အော်တယ်ဆိုဦးတော့ ကြောက်ကြတဲ့ခေတ်က ငြိမ်တာထက်တော့ သာတယ်လို့ တွေးမိပါတယ်။

လက်ရှိကာလအထိတော့ အပြောင်းအလဲတွေကို အပေါ်ပိုင်း အပြောင်းအလဲလို့ပဲ သတ်မှတ်ကြပါသေးတယ်။ အောက်ခြေကို မထိသေးဘူး၊ အောက်ခြေဟာ မပြောင်းသေးဘူးလို့ အများစုက သုံးသပ်ကြပါတယ်။ အပြောင်းအလဲတွေကို စောကြောကြတဲ့ ပညာရှင်တချို့ကလည်း ဒါကို လက်ခံတယ်၊ ဟုတ်တယ်… အပြောင်းအလဲဆိုတာ အထက်က အရင်ပြောင်းရတယ်၊ သူတို့က ပြောင်းနိုင်တာကိုး… ပြောင်းခွင့်ရှိတာကိုး။ အဲဒီကနေမှ အောက်ခြေကို တဆင့်ချင်း၊ တဖြည်းချင်း ရောက်တယ်လို့ သူတို့က ပြောတတ်ကြတယ်။

ဒီတော့ အထက်ပြောင်းကို လက်ခံပြီဆို… ဘယ်သူက ပြောင်းနေသလဲကို ကြည့်ရဦးမယ်။ ခေါင်းဆောင်က ပြောင်းနေတယ်၊ ပြောင်းမယ်လို့ ပြောခဲ့ပြီးပြီမို့ ပြောင်းနေတယ်။ ပြောလည်း ပြောခဲ့ပြီးသားပေပဲ… ပုံစံအသစ်နဲ့ သွားမယ်၊ ရှေးရိုးစွဲတွေ အပြောင်းအလဲကို ခုခံနေသူတွေကို ထားခဲ့မယ်လို့ သမ္မတက ပြောခဲ့တယ်။ အခုတော့ သူ တကယ် လုပ်လိုက်ပြီပေါ့။

သမ္မတရဲ့ ၀န်ကြီးအပြောင်းအလဲ သတင်းတွေဖတ်ပြီး၊ ဖေ့စ်ဘုတ်က သုံးသပ်ဝေဖန်ချက်တွေမှတ်ပြီး အကြီးအမှူး ၀ါ ခေါင်းဆောင်ဆိုတာကို အတွေးနယ်ချဲ့ခဲ့မိတယ်။

အကြီးအမှူးဆိုတာကို မြန်မာအဘိဓာန်ကတော့ ရိုးရိုးပဲ အနက်ပေးပါတယ်။ အကြီးအကဲတဲ့… ခေါင်းဆောင်တဲ့…။

အကြီးအကဲတွေမှာ နာယကဂုဏ်တွေ ရှိတယ်။ ငယ်ငယ်ကထဲက အလွှတ်ကျက်ခဲ့ရတယ်။ “ထကြွ၊ နိုးကြား၊ သနား၊ သည်းခံ၊ ဝေဖန်၊ ထောက်ရှု ဤခြောက်ခု“တဲ့။ တကယ့် အကြီးအကဲ ဟုတ်မဟုတ်ကို ဒါတွေနဲ့ တိုင်းတာလို့ ရနိုင်ပါတယ်။

အကြီးအမှူးဆိုတာ သာမန်အားဖြင့်တော့ အဆဲခံရတဲ့ အလုပ်ကို လုပ်တဲ့သူပဲလို့ ထင်ခဲ့မိတယ်။ လူမျိုးတမျိုးနဲ့တမျိုးတော့ အကြီးအမှူးကို ရှုမြင်ပုံ ကွာခြားပါလိမ့်မယ်။ သင်ဖူးတဲ့ စီမံခန့်ခွဲမှုစာအုပ်ထဲမှာတော့ စီမံအုပ်ချုပ်သူဆိုတာ လူတွေနဲ့ အလုပ်ပြီးအောင် လုပ်တဲ့သူလို့ ပြောထားတော့ လူပေါင်းစုံနဲ့ လူအများ အကျိုးများတဲ့ အလုပ်ကို အဆင်ပြေအောင် လုပ်နိုင်တဲ့သူဟာ အောင်မြင်တဲ့ စီမံအုပ်ချုပ်သူပေါ့။

လူများတော့ အတွေးစုံပါတယ်။ တချို့ကျလည်း လူကြီး ပြောတဲ့အတိုင်း လုပ်ကြတယ်၊ တချို့ကျလည်း လူကြီး ပြောတာကို အခြေခံပြီး ကိုယ့်ပုံစံနဲ့ လုပ်တတ်တယ်၊ တချို့ကျတော့ လူကြီးပြောတာထက် ကိုယ့်စိတ်ကြိုက်လုပ်တယ်။ ဒီတော့ အကြီးအမှူးက ဂုဏ်တွေကို ညှိပြီး အလုပ်ဖြစ်အောင် စီမံခန့်ခွဲနိုင်မှ တော်ကာကြပါတယ်။

ဝေဖန်ရတာက လွယ်ပါတယ်၊ လက်တွေ့ လုပ်ရတာက ခက်ပါတယ်။ ပရီးမီးယားလိဂ်က မန်နေဂျာတွေကတော့ ပွဲရလဒ် အခြေအနေတွေ မကောင်းတာနဲ့ ပြုတ်စော်နံပါတယ်။ စိတ်မရှည်တဲ့ သူဌေးမျိုးနဲ့ဆို ချက်ချင်းတောင် ပြုတ်ပါတယ်။ ကစားသမားထဲမှာ စွာသူပါနေရင်လည်း မန်နေဂျာက ပါးပါးနပ်နပ်နဲ့ ကိုင်တတ်ရပါတယ်၊ မီဒီယာတွေကလည်း ကြည့်နေပါတယ်၊ နာမည်ရဖို့ထက် နာမည်ပျက်ဖို့က ပိုများပါတယ်။

မြန်မာပြည်မှာတော့ အကြီးအမှူးတချို့က နေရာများများ ယူချင်ပါတယ်။ ငါ့တပည့်ကြီး လုပ်ပစ်ချင်သူတွေက မရှားပါဘူး။ ၀န်ကြီးကလည်း ဒုတိယ၀န်ကြီးကစလို့ သူ့ဝန်ကြီးဌာနရဲ့ အောက်ဆုံးအဆင့် သန့်ရှင်းရေးသမားအထိကို သူ့တပည့်လို့ချည်း ထင်တတ်ပါတယ်၊ ဘာမှလည်း မဆိုင်ပါဘူး။ ဂျာနယ်တွေ၊ မဂ္ဂဇင်းတွေမှာဆိုလည်း ဂျာနယ်တစောင်လုံး၊ မဂ္ဂဇင်းတစောင်လုံးက လူတွေကို သူ့တပည့်ချည်း ထင်တတ်တဲ့ အယ်ဒီတာချုပ်မျိုးလည်း တွေ့ဖူးပါတယ်။ ဘာဖြစ်လို့များ အကြီးအမှူးတချို့က အဲဒီလိုတွေ တွေးတတ်ကြသလဲတော့ မသိပါဘူး။

တကယ်တမ်း အကြီးအမှူး ကောင်း/မကောင်းကို အကြီးအမှူး ကိုယ်တိုင်က ပြောရတာမျိုး မဟုတ်ဘဲ သူ့လက်အောက်မှာ အမှုထမ်းဖူးတဲ့သူ၊ သူနဲ့အတူ အလုပ်လုပ်ဖူးသူတွေက ပြောရတာမျိုးဆိုတာကို အဲဒီအကြီးအမှူးတွေ ဘာဖြစ်လို့ မသိကြတာလဲ ဆိုတာကို စဉ်းစားလို့ မရပါဘူး။ မြန်မာအကြောင်း ပြောရင် နိုင်ငံခြားနဲ့ပဲ ယှဉ်ပြောရတာကတော့ မကောင်းပါဘူး။

နိုင်ငံတချို့မှာဆို ကျောင်းဆရာ လုပ်တဲ့သူကတောင် အမြဲဆရာ လုပ်မနေပါဘူး။ သူ ယူစရာရှိရင် တပည့်ဆီကလည်း ပြန်ယူတာပါပဲ။ ဒီကောင့်ဆရာ ငါကွလို့လည်း ဘယ်သူကမှ ပလွှားမနေပါဘူး။ သူ့အလုပ်သူလုပ် ကိုယ့်အလုပ်ကိုယ်လုပ်လို့ပဲ ခံယူထားကြသူတွေပါ။ နိုင်ငံတချို့မှာဆိုရင် တပည့်လုပ်သူတွေက ဆရာတွေအပေါ် မယဉ်ကျေးလွန်းလို့တောင် အံ့သြရတာမျိုး ရှိဖူးပါတယ်။

တကယ်တော့ အကြီးအမှူးရဲ့ တာဝန်က လက်အောက်ငယ်သားကို ဒါမှမဟုတ် လုပ်ဖော်ကိုင်ဖက်ကို ပံ့ပိုးပေးရတာ၊ စောင့်ရှောက်ပေးရတာ၊ ကျောသားရင်သား မခွဲခြားဘဲ အခွင့်အရေး ပေးရတာမျိုး ဖြစ်ပါတယ်။ တချို့ကျတော့ ခိုင်းစရာရှိ အောက်ကို ဖိခိုင်းပြီး၊ အခွင့်အရး ယူစရာရှိ ကိုယ်ပဲယူ၊ စားစရာရှိ ကိုယ်ပဲစား ဆိုတာမျိုးကြတော့ အကြီးအမှူးလို့ မပြောထိုက်သူတွေပါ။

အရည်အချင်းကြောင့် လုပ်ငန်း အခြေအနေအလိုက် အကြီးအမှူး လုပ်သူတွေက လစာ၊ အယောင်အဆောင်နဲ့ ခံစားခွင့်တွေ ရတာမျိုးတော့ ရှိတတ်ပါတယ်။ အစိုးရ အကြီးအကဲတွေ၊ ကော်ပိုရိတ် လုပ်ငန်းကြီးတွေရဲ့ ထိပ်တန်း အရာရှိကြီးတွေ၊ ဘဏ်သူဌေးတွေကြီးဟာ ခံစားခွင့် ကြီးမားလှပါတယ်။ အကြီးအမှူးဟာ လိုတာထက် ယူတာ၊ စားတာ များရင်တော့ ဝေဖန်ခံရတတ်ပါတယ်။

ဒါပေမဲ့ အကြီးအမှူးဟာ ချိနဲ့သူ၊ ပျော့ညံ့သူတော့လည်း မဖြစ်ရပါဘူး။ ထက်မြက်သူ၊ ရဲတင်းသူ၊ အားမာန်ကြီးသူ ဖြစ်ရပါတယ်။ နောက်လိုက်က အားကိုးချင်လောက်တဲ့၊ အမိန့်ခံယူထိုက်လောက်တဲ့ သူတော့ ဖြစ်ရပါမယ်။ ကိုယ့်ခေါင်းဆောင်ကို ကိုယ်သဘောကျနေတဲ့ နောက်လိုက်တွေ ဖြစ်အောင်လို့ အကြီးအမှူးမှာ စွမ်းရည် ရှိရပါမယ်။

အကြီးအမှူး လုပ်ရတာ တကယ်တော့ မလွယ်ပါဘူး။ ဘာဖြစ်လို့လဲဆိုတော့ လူတွေအများကြီးကို ကောင်းစွာ စီမံအုပ်ချုပ်နိုင်မှ အကြီးအမှူးကောင်း ဖြစ်တာပါ။ သနားတတ်ရသလို သည်းခံတတ်ရပါတယ်၊ ဒါပေမဲ့ ကိုယ့်ခေါင်းပေါ်လည်း အတက်မခံရပါဘူး။ ပြောစရာရှိ ပြော၊ ဆိုစရာ ဆို၊ ဆဲစရာရှိ ဆဲ၊ ဆုချစရာရှိ ဆုချ သင့်သလို ဝေဖန်ထောက်ပြ ချီးပရတာမျိုးလည်း လုပ်ရပါတယ်။

အကြီးအမှူးကောင်းတို့မည်သည် ကိုယ့်အတွက်ထက် အများအကျိုးကို ကြည့်ကြရပါတယ်။ သမ္မတကစလို့ အစိုးရ ၀န်ကြီးဌာန အကြီးအကဲဟောင်း/သစ်တို့ ကျန်းမာချမ်းသာစွာနဲ့ တိုင်းပြည်နဲ့ လူထုအကျိုး သယ်ပိုး ဆောင်ရွက်ရင်း နောက်လိုက်တွေနဲ့ အများပြည်သူရဲ့အဆဲပေါ့ အမုန်းလျော့ပြီး၊ ချီးပသံတွေ ညံ့လို့ ချစ်ခင်မှုတွေ တိုးရကြပါစေကြောင်း ဆုမွန်တောင်းလိုက်ရပါတယ်။

၂၀၁၂ သြဂုတ် ၂၈၊ ည ၁၀ နာရီ။

လန်ဒန်။

Advertisements