by Myo Tha Htet on Sunday, 13 May 2012 at 12:43·

မျက်နှာရဲ့ ဘယ်ဘက်ခြမ်း မျက်ခုံးမွှေး သုံးလေးပင်က လိုတာထက် ပိုရှည်နေပြီး မျက်လုံးရှေ့မှာ လာကျနေတော့ ကျွန်တော် ကွန်ပျူတာ ကြည့်တဲ့အခါ ရှုပ်သလို ခံစားရပါတယ်။ မျက်ခုံးမွှေးက ဒီလောက်တောင် ရှည်လာပြီ ဆိုတာဟာ အသက်ကြီးလာတာကိုလည်း တနည်းတလမ်းနဲ့ ခန္ဓာကိုယ်က ထုတ်ပြလိုက်တယ်လို့ ကျွန်တော် ထင်ပါတယ်။

တကယ်တော့ ကျွန်တော့် မျက်ခုံးမွှေးတွေကို ၂၀၀၉ သင်္ကြန်ကာလ ကမ္ဘောဒီယားနိုင်ငံ၊ မြို့တော် ဖနွမ်းပင်မှာ သင်္ကန်းဆီးတုန်းက ရိပ်လိုက်ရပါသေးတယ်။ (သူတို့ အယူအဆအရ သာသနာ့ဘောင် ၀င်တဲ့အခါမှာ ခေါင်းမွှေးရော မျက်ခုံးမွှေးပါ ရိပ်ရပါတယ်၊ အမွှေးနည်းလေ တဏှာ ရာဂပါးလေလို့ တွက်ဆကြသလားတော့ မသိပါဘူး)။ အဲဒီမတိုင်ခင်ကလည်း ကျွန်တော့် မျက်ခုံးမွှေးတချို့ နည်းနည်း ရှည်နေတာကိုတော့ သတိထားခဲ့မိပါတယ်။

ကျွန်တော်ငယ်ငယ်ကတော့ ဒီလို မျက်ခုံးမွှေးတွေ လိုတာထက် ပိုရှည်နေတဲ့ အဖိုးကြီးတွေ၊ နားရွက်ထဲက အမွှေးရှည်ကြီးတွေ ထွက်နေတဲ့ အဖိုးကြီးတွေကို တွေ့ခဲ့ဖူးပြီး၊ သဘောကျခဲ့ဖူးပါတယ်။ ငါလည်း တနေ့တော့ ဒီလိုပဲ ဖြစ်လာမှာပဲလို့လည်း ထင်ခဲ့မိပါတယ်။ အခုတော့ မျက်ခုံးမွှေး သုံးလေးပင်က သာမန်ထက်ပိုပြီး ရှည်နေတော့ မြင်ကွင်းမှာ ကန့်လန့်ခံနေသလို ဖြစ်လာပါတယ်။

ကျွန်တော့်မှာ ကိုယ့်ကိုယ်ကိုယ် ငါ အသက်ကြီးလာရင် ဘယ်လိုပုံပေါက်မလဲ၊ ဘယ်လို နေထိုင် စားသောက်မလဲလို့ အမြဲ စဉ်းစားပါတယ်။ ငယ်ငယ်ကထဲကနေ ရင်းရင်းနှီးနှီး နေခဲ့ဖူးတဲ့ ယောက်ျားသားတွေကလည်း များများစားစားတော့ မရှိ။ အဖိုး၊ အဖေ၊ ဦးလေးနဲ့ ကိုးကွယ်တဲ့ ဆရာတော်ဘုရားကြီး လူလေးဦးကို သွားတွေ့ပါတယ်။

အဖိုးက ဆစ်ခ်ပန်ချာပီမို့ အရပ်ခြောက်ပေလောက် မြင့်ပါတယ်။ လူကလည်း ပေါင် ၂၀၀ လောက် (မကချင်သာ နေပါလိမ့်မယ်) ရှိတော့ ငယ်ငယ်လေးတုန်းကဆို အဖိုးကို မော့ကြည့်ရတာ အလွန်မြင့်တဲ့ လူကြီးလို့ ထင်ခဲ့မိပါတယ်။ အဖေနဲ့အမေက အရပ် ငါးပေစီသာ မြင့်တာမို့ ကျွန်တော်တို့ မောင်နှမတွေ အခုလို အရပ်မြင့်နေတာဟာ အဖိုးဆီကနေ ဂျင်းန်(မျိုးရိုး)တဆင့် ခုန်ပျံကျော်လွှားလာတာ ဖြစ်နိုင်ပါတယ်။

အဖိုးဟာ အဖိုးကြီး ဖြစ်လာတော့ သူ့အရိုးအဆစ်တွေ ပြန်တိုသွားပုံ ရပါတယ်။ ဖြစ်ပုံက အရိုးအဆစ်တွေ တခုနဲ့တခု ကြားမှာ ထောက်မ ပင့်ထားတဲ့ အကြောတွေ၊ အဆီတွေ၊ အရည်တွေက ခမ်းလာ ပျောက်လာတော့ အရိုးချင်းထိကုန်ပြီး သွားလာရင်လည်း ပန်းတယ်၊ နာတယ် ဖြစ်ကုန်ပါတယ်။ အရပ်လည်း နိမ့်သွားပါတယ်၊ ခါးကလည်း ကုန်းလာပြီး လူကလည်း ပိန်ကျသွားပါတယ်။

အလုပ်တခုခု အားစိုက်လုပ်ရရင် (အိမ်အလုပ်တခုခုကို ပြောပါတယ်) အဖိုးဟာ မောနေပြီး ပါးစပ်ဟထား ရပါတယ်၊ အဲဒီအခါမှာ သွားရည်တွေလည်း ကျလာတတ်ပါတယ်။ ပုဆိုးဝတ်ပြီး ဆောင့်ကြောင့်ထိုင်လို့ နေတဲ့အခါမှာလည်း အောက်စတွေ ဘာတွေ လွတ်လာပါတယ်။ ထမင်းလည်း အများကြီး မစားနိုင်တော့တာကို သတိထားမိပါတယ်။

ငယ်ငယ်တုန်းက အမေနဲ့အဖွား ပြောတာ ကြားဖူးတာကတော့ အဖိုးဟာ ငယ်ငယ်က ဆိတ်သားဟင်းတွေ ဘာတွေဆိုရင် အများကြီးကို (ဟင်းတအိုးလုံး) စားပစ်လိုက်နိုင်တယ်လို့ ပြောပါတယ်။ ကျွန်တော်တို့ အရွယ်ရောက်လို့ အဖိုးဆီ ထမင်း၊ ဟင်း သွားပို့ရင် ဖြစ်ဖြစ်၊ အဖိုးက အိမ်လာလည်လို့ ထမင်းကျွေးရင် ဖြစ်ဖြစ် အဖိုးဟာ ထမင်းတပန်းကန်ကိုတောင် တော်တော့်ကို အားစိုက်ရပြီး ဖြည်းဖြည်းချင်း စားတာကို တွေ့ပါတယ်။ အဖိုးဆုံးတော့ အသက်က ၇၉ နှစ် ဖြစ်ပါတယ်။

အဖိုးက စီးပွားရှာဖွေ လုပ်ကိုင်ခဲ့ဖူးတဲ့ သာမန်လူတဦးသာဖြစ်ပြီး အဖိုးနဲ့အသက် နည်းနည်းကြီးတဲ့ နောက်တဦးကတော့ ကျွန်တော်တို့ ကိုးကွယ်တဲ့ ဆရာတော် ဘုရားကြီး ဖြစ်ပါတယ်။ ဆရာတော်ကြီးက ကျွန်တော်တို့ ညီအကိုကို တခါတခါ သူ့ကျောင်းသားအဖြစ် ခေါ်ထားလေတော့ ဆရာတော့်နားမှာ ခြေဆုပ်လက်နယ်ပြုလို့ ၀တ်ဖြည့်ရပါတယ်။ တခါတခါလည်း ဆရာတော်ကြီးက မေးမြန်းတဲ့အခါ စကားလည်း ဘာလေး ပြောရပါတယ်။

ဆရာတော်ကြီးကျတော့ ငယ်ဖြူလည်းဖြစ်၊ အကျင့်သီလနဲ့လည်း ပြည့်စုံတော့ သက်တော် ၈၀၊ ၀ါတော် ၆၀ လောက်အထိကို သတိ အလွန်ကောင်းပြီး၊ တပည့်သားမြေးတွေအတွက် လောကီလောကုတ် နှစ်ဖြာသော အကျိုးတွေ ပြည့်ဝအောင် နိုင်သလောက် ဆိုဆုံးမ တာတွေ၊ လုပ်ကိုင် ဆောင်ရွက်ပေးတာတွေ တွေ့ခဲ့ရပါတယ်။ သာမန်လူနဲ့ အကျင့်သိက္ခာ ပြည့်ဝသူရဲ့ ကွာခြားချက်ကတော့ မိမိကိုယ် ထိန်းချုပ်နိုင်မှုနဲ့ သတိရှိတဲ့နေရာ ကွာတာကို ကျွန်တော် သတိထားမိခဲ့ပါတယ်။

ဆရာတော်ကြီးကို ကျွန်တော့်အဖိုးလို အနေအထိုင်မျိုး၊ မောနေတာမျိုး၊ လေးနေတာမျိုး တခါမှ မတွေ့ခဲ့ဖူးပါဘူး။ ဆရာတော်ကြီးဟာလည်း သက်တော် ၈၇ မှာ ပျံလွန်သွားတယ်လို့ မှတ်မိနေပါတယ်။

နောက်တဦးကတော့ အဖေ၊ အဖေက အရပ် ငါးပေသာမြင့်ပြီး ငါးပေနဲ့ လိုက်ဖက်တဲ့ ခန္ဓာကိုယ် အလေးချိန် ရှိပေမယ့်လို့ နောက်ပိုင်းမှာ ကံကြမ္မာမုန်တိုင်း တိုက်ခဲ့ပြီးနောက် အရက်ကို အဖော်အဖြစ် မှီဝဲခဲ့ရင်း နေထိုင်ခဲ့လေတော့ အသက် ၅၀ ကျော် အရွယ်မှာပဲ ခန္ဓာကိုယ် အလေးချိန်တွေ ကျဆင်းကာ သေးသေးကွေးကွေးလေး ဖြစ်လာတယ်လို့ ကျွန်တော်တော့ ထင်တာပါပဲ။

အဖိုးကြီးပုံပေါက်လာတဲ့ အဖေဟာ ကျွန်တော့်မျက်စိထဲ ပိုချစ်ဖို့ ကောင်းလာတယ်လို့ ထင်မိပေမယ်လို့ သွားတွေက မကောင်းတော့ပါဘူး၊ မျက်စိကလည်း တဖြည်းဖြည်း မွဲလာပါတယ်။ လူကလည်း အဟာရပြည့်ပြည့်၀၀ မစားရလေတော့ ခန္ဓာကိုယ်မှာ ခုခံနိုင်စွမ်း အင်အားက ယုတ်လျော့ကျဆင်းလာခဲ့ပြီး တခုသော ညမှာတော့ အရက်ကို အလွန်အကျွံ သောက်မိလိုက်ပုံ ရပါတယ်။ ဦးနှောက် သွေးကြောပြတ်ခဲ့ပြီး ရက်ပိုင်းအကြာမှာပဲ ကွယ်လွန်ခဲ့ပါတယ်။ အဖေဆုံးတော့ ၅၉ နှစ်။

နောက်တဦးကတော့ ကျွန်တော့် ဦးလေးတယောက် ဖြစ်ပါတယ်။ ကျွန်တော်တို့ ညီအကိုကိုလည်း များစွာ ဂရုစိုက် စောင့်ရှောက်ခဲ့သူ ဖြစ်ပါတယ်။ သူလည်း ငယ်ငယ်က အားကစားကို အင်မတန် လိုက်စားခဲ့သလို၊ အလုပ်အကိုင်တခုကိုလည်း ကိုယ်တိုင် ဦးဆောင် လုပ်ကိုင်နေသူ ဖြစ်ပါတယ်။ ဒါပေမဲ့ အရွယ်ကလည်း ၅၀ ကျော်လာ၊ အလုပ်အကိုင်တွေကလည်း အရင်လို အဆင် မပြေခဲ့ချိန်မှာတော့ ကံဆိုးစွာနဲ့ တီဘီရောဂါကပါ ဘယ်ကနေ ဘယ်လို ရောက်လာတယ် မသိပါဘူး၊ တီဘီရောဂါ ရပါတော့တယ်။

အရက်ကို တခါတခါမှသာ သောက်တတ်ပြီး ဆေးလိပ်လည်း မသောက်တဲ့ ဦးလေးဟာ တီဘီရောဂါပျောက်အောင် ဆေးရုံကိုသွားလို့ တီဘီဆေးတွေကို စနစ်တကျ စားပါသောက်ပါသော်လည်း ကောင်းမလာခဲ့ဘဲ ဆေးဒဏ်နဲ့ တဖြည်းဖြည်း ပိန်ချုံးလာခဲ့ပါတယ်။ နောက်ဆုံးတော့လည်း ဆုံးပါးသွားပါတော့တယ်။ အားကစားသမားတယောက်လို နေခဲ့တဲ့ ဦးလေးဟာ ပိန်ချုံးသွားချိန်မှာ အတော့်ကို အဖိုးကြီးပုံ ပေါက်သွားပါတော့တယ်။ ဦးလေးလည်း ၅၅ နှစ်လောက်မှာ ဆုံးပါးသွားခဲ့တယ်။

ဒါကတော့ ကျွန်တော်သိခဲ့တဲ့ ကျွန်တော့်ဘ၀ရဲ့ ရင်းရင်းနှီးနှီး အဖိုးကြီးတချို့ပါပဲ။ ကျွန်တော်တို့ လောကရဲ့ အဖိုးကြီးတွေထဲမှာတော့ ကျွန်တော် သဘောအကျဆုံးက သတင်းစာဆရာကြီး၊ ၀ါရင့်နိုင်ငံရေးသမားကြီး ဟံသာဝတီ ဦးဝင်းတင်ပဲ ဖြစ်ပါတယ်။ ဆရာကြီးဟာ အင်မတန်မှ စိတ်ဓာတ် မာကြောသူ တယောက် ဖြစ်ပါတယ်။ ရင်းရင်းနှီးနှီး မရှိပေမယ့်လို့ သူ့ ခံယူချက်၊ ပြောပုံဆိုပေါက်၊ စာအရေးအသားတွေကို ဖတ်ပြီး အဲဒီလို အဖိုးကြီးမျိုးတော့ ဖြစ်ချင်ခဲ့ပါတယ်။ အများကြီးတော့ ကြိုးစားရပါဦးမယ်။

နောက်တယောက် အဖိုးကြီးကို ပြပါဆိုရင်တော့ ကျွန်တော့် အင်္ဂလိပ်စာ ဆရာတဦးဖြစ်တဲ့ ဆရာဦးသိန်းလွင် (အင်္ဂလိပ်စာ) ပါပဲ။ ဆရာက သူ့ကို အဖိုးကြီးထဲ ထည့်ထားလို့ စိတ်ဆိုးနေမလားတော့ မသိပါဘူး။ ဆရာက အမေ့ရဲ့ဆရာလည်း ဖြစ်တာမို့ အဖိုးဆရာနေရာမှာ ဖြစ်နေလေတော့ အဖိုးကြီးလို့ ပြောလည်း မမှားလောက်ဘူး ထင်တာပါပဲ။

ဆရာက အသက်ကြီးမှ ဘာသာပြန်စာအုပ်တွေကို သူ့ကျောင်းသားတွေနဲ့ စာဖတ်သူတွေ လေ့လာကြလို့ ဗဟုသုတတွေ ရကြအောင် အင်္ဂလိပ်-မြန်မာနှစ်ဘာသာတွဲလို့ တွန်းရေး တွန်းထုတ်ပါတယ်။ ကျွန်တော် အမှတ်မမှားဘူးဆိုရင် ၁၀ နှစ်ကျော်အတွင်းမှာကို အုပ်ရေ ၁၀၀ ကျော် ရေးထုတ်ပစ်ပါတယ်။ (အခုဆိုရင်တော့ အုပ်ရေ ၁၅၀ လောက်တောင် ဖြစ်နေပြီလို့ ထင်ပါတယ်)။ တဖက်မှာ အင်္ဂလိပ်စာ သင်တန်းတွေကို ပို့ချနေရင်းကို တဖက်ကနေလည်း စာအုပ်တွေကို ဟောတအုပ် ဟောတအုပ် ရေးထုတ်နိုင်လောက်အောင် လုံလ ၀ီရိယ ကြီးကြီးနဲ့ကို အလုပ်လုပ်နိုင်တဲ့အတွက် ကျွန်တော် လေးစားပါတယ်။ ဆရာကတော့ တကယ့်အဖိုးကြီးတဲ့ အဖိုးကြီးပါပဲ။

နိုင်ငံရေးလောကမှာတော့ အဖိုးကြီးတဦးဖြစ်တဲ့ ပ-မ-ည-တ အမတ်ဟောင်း ၀ိဓူရ သခင်ချစ်မောင်ကို ရင်းနှီးဖူးခဲ့ပေမယ့် သူကျတော့ အသက်က သိပ်ကြီးသွားတော့ (ကျွန်တော်နဲ့ဆို အသက်က မတရား ကွာသွားလေတော့…) သေချာ မလေ့လာနိုင်ခဲ့ပါဘူး။ အခုတော့ သခင်ချစ်မောင်လည်း ဆုံးပါးသွားပါပြီ။ ဒါပေမဲ့ သူ့ကြည့်ရတာတော့ အနေအေးအေး၊ စိတ်ကြည်ကြည်၊ အတွေးရှင်းရှင်း ရှိပုံတော့ ပေါက်တယ်လို့ တွေးခဲ့မိဖူးတယ်။

ဒီမှာတော့ ရထားတွေ၊ ကားတွေစီးရင်းဖြစ်ဖြစ်၊ ပါ့ဘ်တွေ ဘာတွေမှာပဲဖြစ်ဖြစ် အဖိုးကြီးတွေကို တွေ့တဲ့အခါ သူတို့ဟာသူတို့ ဘ၀ကို အငြိမ်းစားယူရင်း အေးအေးဆေးဆေး ဖြတ်ကျော်နေတာကို တွေ့ရပါတယ်။ သူတို့ချင်း စမတ်ကျကျ ၀တ်စားဆင်ယင်လို့ သောက်ကြ၊ စားကြ၊ သွားကြ၊ လာကြနဲ့ မဆုံးပါးခင်မှာ ဘ၀ကို ပေါ့ပေါ့ပါးပါး ဖြတ်သန်းနေကြပါတယ်။ ချမ်းသာသူတွေကလည်း ဖောင်ဒေးရှင်းတွေ ထူထောင်လို့ လူမှုအကျိုးပြု လုပ်ငန်းတွေ လုပ်ကြပါတယ်။

တလောကဆို ပါရဂူဘွဲ့ နှစ်ခုရ ပညာတတ် လူပျိုကြီး အဖိုးကြီးက ကျောင်းသားငယ်လေးတွေ လမ်းဖြတ်ကူးဖို့ ကားတားပေးတဲ့ အလုပ်ကို လုပ်ကိုင်နေသတဲ့။ ဘယ်လောက်မိုက်သလဲဗျာ။

ဒီတော့ ကျွန်တော် စဉ်းစားမိတယ်…၊ အသက်ကြီးလာတိုင်း အဖိုးကြီး ဖြစ်တာ မဟုတ်ဘူး၊ အသက်ကြီးလာသလို မသေဆုံးခင် ကျန်တဲ့ အချိန်တွေမှာလည်း အဖိုးတန်တဲ့ အလုပ်ကိုလုပ်မှ တကယ့်အဖိုးကြီး ဖြစ်မှာ မဟုတ်လား။ ကျွန်တော်လည်း ခဏနေတော့ အသက်ကြီးတဲ့ လူကြီးတယောက် ဖြစ်လာမှာပါပဲ။ အဖိုးလိုဖြစ်မလား၊ အဖေ့လိုဖြစ်မလား၊ ဘယ်လို အဖိုးကြီးဖြစ်မလဲ ဆိုတာကိုတော့ စိတ်ဝင်စားနေမိတယ်။

၂၀၁၂ မေ ၁၃၊ မွန်းတည့်။

လန်ဒန်။

Advertisements