by Myo Tha Htet on Friday, 27 July 2012 at 07:57·

ခေတ်က မြန်တဲ့ ခေတ်… ဒါမှမဟုတ် ခေတ်မြန်ကြီး

ဒီတော့ မြန်မြန်ချစ်၊ မြန်မြန်ယူ၊ ကြာကြာမစောင့်ဘဲ တခါကွဲ…

ကားဝယ်ဖို့ကမှ အချိန်ပိုယူကြဦးမယ်၊ အတူနေဖို့က နောင်ခါလာ နောင်ခါဈေး သဘောထားပြီး မြန်မြန်နေလိုက်ချင်ကြတယ်။

မနက် ရုံးသွားတိုင်း သတင်းစာ နာရီဝက်လောက် ကျွန်တော့်မှာ ဖတ်မိတော့ စိတ်ဝင်စားစရာလေးများ တွေ့မိရင် သူငယ်ချင်းတွေကိုလည်း မျှချင်မိတယ်။

ယူကေ က အိမ်ထောင်ရေး အကြောင်းတွေပေါ့၊ အမယ် သူတို့က စာရင်းဇယား ကောင်းတဲ့ နိုင်ငံ ဆိုတော့ကာ အမျိုးသား (နိုင်ငံတော် အဆင့်) စာရင်းရုံးက ဒီလူမှုရေးနဲ့ ဆိုင်တဲ့ စာရင်းဇယားတွေကို သေချာ ပြုစုထားတာ တွေ့ရတယ်။ မြန်မာနိုင်ငံမှာလည်း အခုလို သပ်သပ်ရပ်ရပ် စာရင်းတွေ ပြုစုနိုင်ရင် ကောင်းမှာပဲလို့လည်း အတွေးပေါက်မိတယ်။ လုပ်ချင်လည်း လုပ်ထားကြမှာပေါ့လေ၊ ကျွန်တော် မသိတာလည်း ဖြစ်နိုင်ပါတယ်။

တကယ်တော့ အချစ်နဲ့ အိမ်ထောင်ရေးဆိုတာ ဒင်္ဂါးတချပ်ရဲ့ ခေါင်းနဲ့ပန်း လိုပါပဲ၊ တခုမပါဘဲ ဒင်္ဂါး မဖြစ်နိုင်ပါဘူး။ ယူကေမှာတော့ တမျိုးတဲ့… ကွဲတာပြဲတာ မပါဘဲ ချစ်လည်း မချစ်ကြဘူး၊ အိမ်ထောင်လည်း မတည်ကြပါဘူးတဲ့။ ချစ်ပြီးရင် ကွဲ… အိမ်ထောင်ပြုပြီးရင် အဲ… ကွဲကြကွာကြတာများတယ်တဲ့။

လွန်ခဲ့တဲ့ နှစ်ပေါင်း ၅၀ က စာရင်းတွေနဲ့ လက်ရှိ စာရင်းနဲ့ နှိုင်းယှဉ်ကြည့်မယ်ဆိုရင်တော့ ဗြိတိန်မှာ အိမ်ထောင်ကွဲတာတွေ ပိုများလာပေမယ့် ၂၀၀၈ စီးပွားရေး ပျက်ကပ်နောက်ပိုင်းမှာတော့ အဖြေက တမျိုး ဖြစ်နေပြန်ပါတယ်။ အိမ်ထောင်ကွဲမှုနှုန်း နည်းနည်းလေး ကျသွားသတဲ့။ ဘာဖြစ်လို့လဲ။

ဘာဖြစ်လို့လဲဆိုတော့ စီးပွားရေးတွေ ကျပ်ကြတော့ အလုပ်အကိုင်တွေက အဆင်မပြေဘူး၊ ဒီတော့ ၀င်ငွေတွေက နည်းလာကြတယ်။ နှစ်ယောက်အတူနေရာကနေ ကွဲကြပြဲကြပြီး တယောက်ထဲ နေမယ်ဆိုရင် ၀င်ငွေနဲ့ ကုန်ကျစရိတ်က မကာမိကြတော့ ကွဲလိုခွာလို ပေမယ့်လည်း မချစ်သော်လည်း အောင့်ကာနမ်းနေရတဲ့ အဖြစ်တွေ ဖြစ်ကုန်ကြတယ်။

အိမ်ထောင်ကွဲ ပြဿနာတွေကို အကြံပေး ဖြေရှင်းပေးနေတဲ့ ချစ်မှုရေးရာနဲ့ ဆက်ဆံရေး ဂုရုကြီး တာရီ ဘိုဒဲလ် ကတော့ အိမ်ထောင်ရေး ဆိုတာ ပြင်ရန် ခက်တဲ့ အမျိုးပါ၊ အတော်ကြီး မြော်မြင် ပြင်ဆင် ကြိုးစားကာပါမှ အဆင်ပြေရုံ ရှိနိုင်တာမျိုးကို လူအများက လွယ်လွယ်နဲ့ အိမ်ထောင်ပြု၊ သည်းမခံဘဲ ချက်ချင်းကွဲ ဆိုတာတွေမျိုးတွေက များနေပါတယ်လို့ မှတ်ချက်ပေးပါတယ်။

ဒီတော့ အဆင်မပြေတော့မှ ကွဲကလည်း ကွဲချင်နေပြီ၊ ဘယ်လိုမှ ဆက်လက် ပေါင်းသင်းကြဖို့ မဖြစ်နိုင်တော့ဘူး။ တဖက်ကလည်း စီးပွားရေးတွေက မကောင်းတော့ ရင်ဆိုင်ရတော့မယ့် ကုန်ကျစရိတ်တွေကြောင့် တသီးတခြားလည်း ခွဲထွက်နေကြဖို့က မဖြစ်နိုင်တော့ကာ ဒီ အိမ်ထောင်ရေးမျိုးဟာ စိတ်ချမ်းသာမလား စိတ်ဆင်းရဲနေမလားလို့ သူက မေးခွန်း ထုတ်ပါတယ်။

ဘယ်လိုပဲဖြစ်ဖြစ် တချို့တွေကတော့ မရရအောင် အဆင်မပြေတော့တဲ့ သူတို့ရဲ့ အိမ်ထောင်ရေးကို အဆုံးသတ်လိုက်ကြပါတယ်။ သူတို့က ဒီနည်းလမ်းကသာ အကောင်းဆုံး ဖြစ်မယ်၊ ပြဿနာတွေ အားလုံး ပြီးသွားလိမ့်မယ်လို့ တွေးထင်တတ်ကြပါတယ်။

တကယ်တော့ ဒီလို ပြဿနာတွေ ဘာကြောင့် ဖြစ်သလဲ ဆိုတာကို အရင်းစစ်ကြည့်ရင်တော့ အခုလို တွေ့ရမှာ ဖြစ်ပါတယ်။ လူအများစုက အချစ်ကို ရှာကြတယ်၊ အချစ်ကို မြည်းစမ်းခွင့် ရတဲ့အခါ ဟာ… ငါတော့ အချစ်စစ်ကို တွေ့ပြီ၊ ကော်တာပဲလို့ တွေးကြပြီး ဒီအချစ်နဲ့ တသက်မခွဲ အတူလက်တွဲ ကြင်နာကြဖို့ ခပ်သွက်သွက် ဆုံးဖြတ်တတ်ကြပါတယ်။ အချစ်ကို ကိုယ့်ဘေးကနေ ပြေးမထွက်သွားစေချင်တော့ဘူး။ သေသေချာချာ ဂဃနဏ ခွဲခြမ်းစိတ်ဖြာ အချိန်ယူ သုံးသပ် လေ့လာ အကဲခတ် ဆုံးဖြတ်ကြည့်ဖို့ကို မလုပ်ချင်ကြတော့ဘူးလို့ အချစ်ဂုရု ဆရာမကြီး တာရီက ပြောပါတယ်။

တကယ်တော့ အိမ်ထောင်ရေးဆိုတာ ယုံကြည်မှု ကြိုးတချောင်း မဟုတ်ပါလား၊ ဒီ ကြိုးစည်းနှောင်အား ကောင်းသလောက် မြဲနေမယ်။ အဲ… ကြိုးက လျော့ရဲလာမယ်၊ ဒါမှမဟုတ် တင်းအားများလို့ ပြတ်တောက် သွားမယ်ဆိုရင် ပွဲက ပြီးဆုံးသွားပြီ မဟုတ်ပါလား။

တာရီကတော့ ကြိုးမချည်ကြခင် စစ်စစ်ပိုင်းပိုင်း မေးခွန်းတွေ မေးကြဖို့ကို ပြောခဲ့တာ ဖြစ်ပါတယ်။ အရမ်းကာရော ယုံကြည်တာမျိုး မဟုတ်ဘဲ မေးခွန်းတွေ ထုတ်လို့ ကျေလည်မှသာ ယုံတာမျိုးကို သူက ဆိုလိုတာ ဖြစ်ပါတယ်။ ဘာသာတရားကို ယုံကြည်တာမျိုးနဲ့တော့ မရောထွေးပါနဲ့လို့ သူက သတိပေးပါတယ်။

သူဆိုလိုတာက အိမ်ထောင်ကျပြီးနောက်မှာ ၀န်းကျင်သစ်က ဘယ်လို ဖြစ်လာမှာလဲ၊ လူတွေရဲ့ ကိုယ့်အပေါ် လက်ရှိ ဆက်ဆံရေးက ပုံစံအသစ်မှာ ဘယ်လို ဖြစ်သွားမှာလဲ၊ ကလေးယူမှာလား… ကလေးကို ဘယ်လို ပုံစံမျိုးနဲ့ တာဝန် ခွဲယူ ပျိူးထောင်ကြမလဲ၊ နှစ်ယောက်စလုံး ပရော်ဖက်ရှင်နယ် အလုပ်တွေကို ဆက်လုပ်ကြမှာလား၊ ဘယ်လို ပုံစံနဲ့ နေထိုင်ကြမှာလဲ (မယ်တရွာ မောင်တမြို့လား) စသဖြင့်ပေါ့လေ… မေးခွန်းတွေက အများကြီး ရှိလာနိုင်တာပဲလို့ တာရီက ထောက်ပြပါတယ်။

ဒီမေးခွန်းတွေကို နှစ်ယောက်စလုံး ယုံကြည်စွာနဲ့ အမှတ်ပြည့် မဟုတ်တောင် အောင်မြင်အောင် ဖြေဆိုထားရမယ် မဟုတ်ဘူးလား။

အချစ်ဂုရုကြီးကတော့ လက်တွေ့ကျကျ သုံးသပ်သူလို့ ပြောရမလား မသိပါဘူး။ “စီးပွားရေး ကန်ထရိုက် စာချုပ်တခု ချုပ်သလိုပေါ့“ လို့ ပြောပါတယ်။

ကွဲကြပြဲကြတာတွေရဲ့ တခုထဲသော အကြောင်းကတော့ စာချုပ် ပျက်သွားလို့ပါ၊ ဒါမှမဟုတ် ကြိုးပြတ်သွားလို့ပါ။ နှစ်ဘက်ကြား သဘောတူညီမှု ပျက်တယ်၊ စည်းနှောင်မှု မရှိတော့ဘူး ဆိုရင်တော့ အားလုံး ဘာဆိုဘာမှ မရှိတော့ဘူးပေါ့လို့ သူက ဆိုပါတယ်။

၂၀၁၂ ဇူလိုင် ၂၇၊ မနက် ၇ နာရီ။

လန်ဒန်။

ရည်ညွှန်း- London’s Metro Newspaper , July 26, 2012.

Advertisements