by Myo Tha Htet on Monday, 27 August 2012 at 22:37·

လူတိုင်း လွတ်လပ်မှုကို မြတ်နိုးကြတယ်။ ဟုတ်တယ်… မလွတ်လပ်တာကို ဘယ်သူမှ မကြိုက်ဘူး။ ကလေးလည်း မကြိုက်ဘူး၊ ခွေးလည်း မကြိုက်ဘူး။ ဒါပေမဲ့ ဘာမှန်းမသိ၊ေ၀၀ါးထွေပြားသူတချို့ ရှိနိုင်တာမို့ ပိုရှင်းသွားအောင် လွတ်လပ်မှုအတွက် အဓိပ္ပာယ် ဖွင့်ဖို့ လိုတယ်။ လွတ်လပ်တယ်ဆိုတာ ဘာလဲ။ ဘယ်သူတွေက လွတ်လပ်နေသလဲ။ မြန်မာ အဘိဓာန်ကတော့ “အနှောင်အဖွဲ့ အချုပ်အချယ်ကနေ ကင်းတာ လွတ်လပ်မှုပဲ“ တဲ့။ ရှင်းနေတာပဲ။

အနုပညာရှင်တွေက လွတ်လပ်တာကို ကြိုက်တယ်၊ အဲ… ဒါပေမဲ့ ဒီနေရာမှာ တခုတော့ ပြောစရာ ရှိသင့်တယ်၊ ဒါမှမဟုတ် ရှိရမယ်။ တန်းဝင် နန်းဝင် စံတခု ဖြစ်ဖြစ် သဘောပေါ့။ ဘယ်သူမဆို အခြေခံကိုတော့ စည်း၊ ဘောင် ကလနားနဲ့ သင်ယူလေ့လာ ဆည်းပူးခဲ့ရမယ်၊ ဒါမှမဟုတ် လေ့လာ ဆည်းပူးခဲ့သင့်တယ်။ တကယ့် အနုပညာရှင်ကျတော့ အဲဒီ စည်း၊ ဘောင်၊ ကလနားတွေကို ချိုးဖျက်ပစ်လိုက်ပြီ။ လွတ်လပ်မှုဆီ သူသွားပြီ၊ ဒါမှမဟုတ် သူ့အနုပညာကို လွှတ်လိုက်ပြီ။

မတတ်ဘဲနဲ့ လွတ်လပ်မှုကိုတော့ ယူလို့ မရဘူး။ အကြောင်းမဲ့ လုပ်ချင်တာ လုပ်တာ၊ ပြောချင်တာ ပြောတာက လွတ်လပ်မှု မဟုတ်ဘူး။

လွတ်လပ်မှုဟာ အကြောင်းသိတယ်၊ အကြောင်းရှိတယ်။

လွတ်လပ်မှုဟာ အကျိုးလည်း ဖြစ်တယ်၊ အကြောင်းလည်း ဖြစ်တယ်။ လွတ်လပ်မှု အကြောင်းကြောင့် လွတ်လပ်မှု အကျိုး ဖြစ်တာပဲ။ ကြက်ဥနဲ့ ကြက်မလိုပဲ… ဘယ်သူက အရင်ဖြစ်တယ်ဆိုတာ ရှာရခက်တယ်၊ ငြင်းရခက်တယ်။

ရယ်စရာ ပြောရရင်တော့ ကြက်ဥမှာရော ကြက်မမှာပါ ကြက်ပါသလိုပဲ… လွတ်လပ်မှုအကြောင်းမှာရော လွတ်လပ်မှုအကျိုးမှာပါ လွတ်လပ်မှု ဆိုတာ ပါနေတာပဲ။

ဒါဆို လွတ်လပ်မှုက ဘာလဲ၊ အချုပ်အနှောင် ကင်းတယ်လို့ ပြောတယ်။ လုပ်ချင်တာ လုပ်တာကလည်း လွတ်လပ်မှု မဟုတ်ဘူးလို့ ဆိုတယ်။ ဒါဖြင့် လွတ်လပ်မှုက ဘာကို ခေါ်တာလဲ။

မလွတ်လပ်မှုကနေ ကင်းနေတာက လွတ်လပ်မှုပဲ။

စည်း၊ ဘောင်နဲ့ တားကာ ထားတယ်။ ဒါမလုပ်နဲ့ ဟိုဟာ မလုပ်နဲ့လို့ ပြောတယ်။ ဒီသံတိုင်နောက်မှာနေ… ရှေ့ကို မထွက်နဲ့လို့ ပိတ်ပင်ထားတယ်။ ဒါဟာ မလွတ်လပ်မှု၊ ဖိနှိပ်မှု၊ ချုပ်ချယ်မှုပဲ…။ ဒါကို ဖောက်ထွက်တယ်၊ ချိုးဖျက်တယ်၊ ကန့်ကွက်တယ်။

လွတ်လပ်မှုကို တောင်းဆိုတယ်၊ မြည်တမ်းတယ်၊ ဟစ်ကြွေးတယ်။

အဲဒီမှာ လွတ်လပ်မှုကို ရတယ်၊ ဒါမှမဟုတ် လွတ်လပ်မှုလို့ ထင်ရတဲ့ အရာတခုကို ရတယ်။

လွတ်လပ်မှုရဲ့ စိတ်အနေအထားက ဘယ်လိုလဲ။ အထိန်းအအုပ်အောက်နေ လွတ်နေတာပဲ။ စိတ်တခုအောက်က စိတ်တခု ဖြစ်နေရတဲ့ အနေအထားကနေ လွတ်မြောက်တာပဲ။

ကိုယ့်ဘောင်၊ ကိုယ့်အုပ်၊ ကိုယ့်စည်းထဲကနေ ကိုယ်သန်တာ၊ ကိုယ်မှန်တာ၊ ကိုယ်ယုံတာလေးကို ပြောပြ၊ ရေးပြ၊ ခံစားပြရတာ လွတ်လပ်မှုပါပဲ။ လွတ်လပ်မှုဟာ သူတပါးကို ပေါက်ပန်းဈေး ဆဲတာမျိုး မဟုတ်ဘူး။ အယုတ္တအနတ္တ မပြောဘူး။

ကိုယ်လုပ်ချင်တာလေး ကိုယ်လုပ်တယ်၊ ကိုယ်စားချင်တာလေး ကိုယ်စားတယ်၊ ကိုယ်ဖန်တီးချင်တာလေး ကိုယ်ဖန်းတီးတယ်။

ကိုယ့်စိတ်ကလေးကို ပျော်အောင်ထားတာ ဒါမှမဟုတ် ပျော်သယောင်ထားတာဟာ လွတ်လပ်မှုကို ပွေ့ထားတာ ဒါမှမဟုတ် ချီပိုးတာပါ။

လွတ်လပ်မှုဆိုတာ စိတ်ပိုင်းဆိုင်ရာ ခံစားချက်တခု ဖြစ်သလို ရုပ်ပိုင်းဆိုင်ရာ ရှုစားချက်လည်း ဖြစ်ပါတယ်။ ဘာလို့ဆို စိတ်ပိုင်းဆိုင်ရာ လွတ်လပ်မှု ရှိတဲ့သူ၊ ရုပ်ပိုင်းဆိုင်ရာ လွတ်လပ်မှု ရှိတဲ့သူကို မြင်ရုံနဲ့ သိပါတယ်၊ ကြည့်ရုံနဲ့ သိပါတယ်။

လွတ်လပ်မှုဟာ အသားအရေပါ၊ လွတ်လပ်မှုဟာ အသွေးအသားပါ၊ လွတ်လပ်မှုဟာ နှလုံးသားပါ၊ လွတ်လပ်မှုဟာ ခွန်အားပါ။

ကျွန်တော် လွတ်လပ်မှုကို တွေ့တယ်၊ လွတ်လပ်မှုက ကျွန်တော့်ကို တခါတခါ တွေ့တယ်။

(လွတ်လပ်မှု ခံစားခြင်း ညနေခင်း အမှတ်တရ…)။

၂၀၁၂၊ သြဂုတ် ၂၇။ ည ၁၀ နာရီခွဲ။

လန်ဒန်။

Advertisements