by Myo Tha Htet on Monday, 30 April 2012 at 03:29·

မက ကျွန်တော့်ကို အတင်းတွန်းဖယ်ပါတော့တယ်။ သူက ပြောချင်နေသူ၊ ကျွန်တော်က နှုတ်ပိတ်ထားချင်သူ။ မတတ်နိုင်တော့…၊ သူ ပြောလိုရာ ပြောပါစေတော့လို့ ကျွန်တော် သဘောထားပြီး နားထောင်ပေးဖို့ လုပ်ရတော့တယ်။ ယောက်ျားတယောက်ကို သူ ဘာကြောင့် ကြိုက်ရမှာလဲ ဆိုတဲ့ အချက်တွေကို ပြောပြမယ်တဲ့။ ကျွန်တော့်ရင်တွေ ခုန်နေပေါ့၊ ဒါဟာ ကျွန်တော့်ကို သူ ဘာကြောင့် ရွေးခဲ့သလဲ ဆိုတဲ့ အဖြေကို ပြောတော့မှာ မဟုတ်လား။ ခက်ပြီ။

“ယောက်ျားတယောက်ဟာ တော်ဖို့ အရေးအကြီးဆုံးပဲ၊ ကျွန်မတော့ အဲဒီလိုပဲ ယုံကြည်တယ်“

ကျွန်တော် ဘ၀င်ပဲ မြင့်ရမလား။ ဒုက္ခပဲ… ငါကိုတော့ ချုပ်နေပြီလို့ သတိကြီးကြီးပဲ ထားရမလား။ အကျပ်ရိုက်နေခဲ့ပြီ။ မိန်းမတယောက်ကို ရွေးချယ်တဲ့ နေရာမှာ တော်တာကို နောက်ဆုံးမှာ ထားခဲ့မိသူ ကျွန်တော့်ကို သူ စိတ်များဆိုးလို့ ဒီလို ပြောလေသလား။ ကျွန်တော့်မှာ မဲ့မဲ့လေး ပြုံးလို့ သူ့ကို ကြည့်နေမိတယ်။ သူက ဖွဖွလေး ရယ်နေတယ်။

“ဘယ်လို ဖြစ်နေတာလဲ… ရုပ်ကြီးကိုက…။ ဟုတ်တယ်လေ အရည်အချင်း မရှိတဲ့ ယောက်ျား၊ မတော်တဲ့ ယောက်ျားတယောက်က မိန်းမတယောက်ကို ပျော်အောင် ဘယ်လို ထားမလဲ၊ အိမ်ထောင်တခုကို ဘယ်လို ဦးဆောင်မလဲ“

မ က သူ့အဆိုကို သူ ထောက်ခံရင်း ဆက်ပွားနေပါတယ်။ မ က ခေတ်မီ ယဉ်ကျေးသူ ဖြစ်ပေမယ့်လို့ ရှေးရိုးဆန်တဲ့ အတွေးအခေါ်တွေကိုလည်း နှစ်သက်လက်ခံသူ ဖြစ်ပုံရပါတယ်။ သူ့စကားထဲမှာ အိမ်ထောင်ကို ဦးဆောင်မယ့်သူဟာ ယောက်ျားလို့ ယုံမှတ် လက်ခံထားပုံရတယ်။ သူဟာ ခေတ်လွန် ခေတ်ဟောင်း အတွေးအခေါ် နှစ်ခုကြားမှာ ချောက်ကျနေသူတော့ မဟုတ်လောက်ပါဘူး။

“ဒါဆို ကျွန်တော်က တော်တာပေါ့“

သူ အားပါးတရ ရယ်တယ်။ ပြီးတော့ ပြည်တည်တည်နဲ့ အခုလို ပြောတယ်။

“နိုး… ယူက အတုံးလေးပါ“

ဒီတခါ အကျယ်ကြီး ရယ်မိသွားတာက ကျွန်တော်ပါ။

“ဟား ဟား ဟား“

ကျွန်တော်က ရယ်ရင် ကျယ်တယ်၊ ကြာတယ်။ သူ ပြောတာ စဉ်းစားလိုက် ရယ်လိုက်နဲ့ မရပ်တော့ဘူး။ သူတောင် အူကြောင်ကြောင် ဖြစ်လာတဲ့ အထိ…။ မိန်းမတွေက သနားစရာတော့ ကောင်းတယ်လို့ ကျွန်တော် ထင်တယ်။ ကျွန်တော် အဲဒီလို ရယ်လိုက်တဲ့အခါ မ ဟာ ပြူးပြူးပြာပြာ ဖြစ်လာပြီး သူ့ကိုယ်သူ ယုံကြည်မှု အတန်ငယ် ကျလာတာကို ကျွန်တော် သတိထားမိတယ်။ သူ ပြောလိုက်တဲ့အထဲ ဘာမှားတာ ပါသွားသလဲလို့ အားနာ ရှက်ရွံ့ မလုံမလဲ ဖြစ်နေရှာတယ်။ ဒါနဲ့ ကျွန်တော် အရယ်ရပ်လိုက်ပါတယ်။

မိန်းမတွေကို ခင်ရတာ၊ ချစ်ရတာကို ကျွန်တော် သဘောကျတာ အဲဒါကြောင့်ပဲ။ သူတို့မှာ တဖက်သားကို အားနာတတ်တဲ့ စိတ်၊ ရှက်ရွံ့တတ်တဲ့ စိတ်၊ မလုံမလဲ ဖြစ်တတ်တဲ့ စိတ် ၀ါ သံသယ စိတ် ရှိနေတတ်တယ်။ နည်းတာနဲ့ များတာပဲ ကွာမယ်။ ရှိတော့ ရှိကြတယ်။ ယောက်ျားတွေမှာတော့ ယုံကြည်မှု လွန်ကဲလေ လူတွေကို မထီမဲ့မြင်ပြုလေ၊ လူတွေနဲ့ ဝေးလေ၊ အကြင်နာ ခေါင်းပါးလေ ဖြစ်ကြတယ် မဟုတ်လား။ ထားပါတော့…။

“ယူ ဘာဖြစ်လို့ ဒါလောက်တောင် ရယ်လိုက်တာလဲ၊ သဘောကျလို့လား… သဘောမကျလို့လား“

ကျွန်တော် မျက်နှာတည်တည်ပဲ ဆက်နေလိုက်တော့တယ်။

“ဘာမှ မဟုတ်ပါဘူး၊ ကျွန်တော့်ဘာသာ ကျွန်တော့်အကြောင်း စဉ်းစားမိပြီး ရယ်တာပါ၊ ဆက်ပါဦး ဒုတိယ အချက်က…“

ဒီတော့မှ သူ နည်းနည်း ပြန်ရွှင်လာတယ်၊ သနားပါတယ်။ ကျွန်တော် ရယ်လိုက်တာ လွန်သွားတာကိုးဗျာ။

“ဒုတိယ အချက်ကတော့ ယူနဲ့ တူတူပါပဲ၊ ချစ်တတ်တဲ့ ယောက်ျား ဖြစ်ဖို့ပေါ့။ မချစ်တတ်တဲ့ ယောက်ျားက ဘယ်နှယ့်လုပ် ကောင်းတော့မလဲ၊ မဟုတ်ဘူးလား“

ဒုတိယမ္ပိ ပြည်တည်တည် သူ လုပ်ပြန်တယ်။ ရွှင်တဲ့ မျက်လုံး၊ ပြုံးနဲ့ မျက်နှာနဲ့ ကျွန်တော့် မျက်လုံးကို သူ တည့်တည့်ကြည့်ပြီး ပြောလာပြန်တယ်။ ကျွန်တော် ပြန်ပြုံးကြည့်ပြီး အကြည့်လွှဲရတယ်။ မိန်းကလေးတွေရဲ့ မျက်လုံးကို ကျွန်တော် ဆိုင်မကြည့်ရဲဘူးဗျ။ ကျွန်တော် မဟုတ်တာတွေ မလုပ်ထားပါဘူး။ ဒါပေမဲ့ ကျွန်တော် မကြည့်ချင်ဘူး၊ မကြည့်ရက်ဘူး။

“အချစ်ကို ဒုတိယ နေရာမှာ ထားလိုက်လို့ ကျွန်တော်က ကျေးဇူးတင်ပါသဗျာ။ လုပ်ပါဦး တတိယ အချက်လေး…“

သူ ယုံကြည်မှု ၁၀၀ ရာခိုင်နှုန်း အပြည့် ပြန်ရသွားသူ တယောက်လို ဖြစ်လာပြန်တယ်။ မိန်းမတွေက စိတ်အတက်အကျ မြန်တယ်လား။ ခုန သူနဲ့ အခု သူ မတူတော့ပြန်ဘူး။ ကျွန်တော်လည်း တဖြည်းဖြည်း ပြန်ရွှင်လာသလို ခံစားရပြန်တယ်။ ကိုယ့်ဘေးက မိန်းမတယောက်က ပျော်နေတာမှာ ကျွန်တော်လည်း လိုက်ပျော်နေတာဟာ တယ်ခံစားလို့ ကောင်းတဲ့ အရသာပဲဗျာ။

“ယောက်ျားတယောက်ဟာ… အထူးသဖြင့် ကျွန်မ ရွေးချယ်တဲ့ ယောက်ျားတယောက်ဟာ ရုပ်ချောဖို့ မလိုပါဘူးလေ…“

“ဟိုက်… သေရော“

ကျွန်တော် ချက်ချင်း အသံထွက် အာမေဋိတ်ပြုမိသွားတယ်။ ဘာကြောင့်မှန်း မသိ၊ သူ့ရဲ့ တတိယ မဟုတ်တဲ့ အချက်မှာ ကျွန်တော် ကျဆုံး သွားတယ်။ ကျဆုံးသွားတယ်ဆိုတာ ဥပမာနဲ့ တင်စားပြောလိုက်တာပါ၊ ဆိုလိုတာက ဖော်လိုမလိုက်နိုင်တော့ဘဲ ချောင်းပစ်ခံလိုက်ရသူ တယောက်လို ခံလိုက်ရတယ်လို့ ပြောချင်တာ ဖြစ်ပါတယ်။

သူရွေးချယ်တဲ့ ယောက်ျားတယောက်ဟာ ရုပ်ချောဖို့ မလိုဘူးတဲ့။ ဒါဖြင့်ရင် ကျွန်တော်က ရုပ်ဆိုးသူ တယောက်ပေါ့၊ ဒီလိုပဲ သွယ်ဝိုက် အဓိပ္ပာယ်ပေါက်နေပြီ မဟုတ်လား။ အဲ… ကျွန်တော်က ကိုယ့်ဟာကိုယ် လျှော့ပြောနေတာပါ၊ တိုက်ရိုက် ထုတ်ပြောလိုက်တာပဲ မဟုတ်လား။ ဘယ်နှယ့်ဟာလဲ…။ သူကတော့ ပြုံးပြုံးလေးနဲ့ ကျွန်တော့်ကို ကြည့်လို့… ကျွန်တော် မနေနိုင်တော့ဘူး၊ ဒီတခါ မတည်မငြိမ် ဖြစ်နေတာ ကျွန်တော်ပဲ မဟုတ်လား။ ဒါနဲ့ မေးခွန်းတခုကို အရဲကိုးလို့ မေးလိုက်တယ်။

“ဟာ… ဒါဆို ကျွန်တော်က မ ပြောတဲ့အတိုင်းဆို… ရုပ်ဆိုးတာပေါ့“

သူက ပါးချိုင့်လေးတွေ ပေါ်သွားအောင် လှလှလေး ရယ်တယ်။ အဲဒီ ပါးချိုင့်လေးတွေနဲ့ အပြုံးကို ကျွန်တော် အချစ်ဆုံးပဲ။ ဘယ်နှယ့်လုပ်မတုံး… သူ ရယ်နေတယ်။

“ယူက ကြည့်ကောင်းပါတယ်။ အချောကြီးတော့ မဟုတ်ဘူးပေါ့“

မိန်းမတယောက်ရဲ့ စကားတခွန်းကြောင့် ကျွန်တော် စိတ်သက်သာ ရသွားဖူးတယ်။ ဒီတခါ ပထမဆုံးအကြိမ်လားတောင် မသိပါဘူး။ အခုမှ နေသာထိုင်သာ ရှိသွားတော့တယ်။ မ ဟာ ကျွန်တော့်ကို စိတ်ကသိကအောင့် ဖြစ်အောင် လုပ်နိုင်သလို စိတ်သက်သာရာ ရအောင်လည်း လုပ်နိုင်ပါလားလို့ ကျွန်တော် ရိုးရိုးသားသား စ တွေးမိတယ်။

“ကျေးဇူးတင်ပါတယ်ဗျာ… ကျွန်တော် မချောတာတော့ ကိုယ့်ဘာသာ သိပါတယ်လေ၊ အခု ပြောနေတာက မ က ယောက်ျားတယောက်ကို ကြိုက်ရင် လိုချင်တဲ့ အချက်တွေ ပြောနေတာ မဟုတ်လား။ ဘာကြောင့် မလိုချင်တဲ့ အချက်ကို တိုးဝင်ပြီး ထည့်ပြောရတာလဲ“

သူ ပြုံးနေရာကနေ အမ်းတမ်းတမ်း ဖြစ်သွားတယ်။ သူ့စကား သူ ပြောနေတဲ့ အချက်တွေက နည်းနည်း လွဲသွားတယ် ဆိုတာကိုလည်း ကျွန်တော် ထောက်ပြလိုက်မှ သူ သတိထားမိသွားပုံရတယ်။ မိန်းမတွေဟာ စကားကို ပြောချင်ရာ ပြောတာလား၊ ယောက်ျားတွေလို စည်းကမ်းဘောင်နဲ့ မပြောတတ်တာလား၊ ကျွန်တော့်အတွက် မေးခွန်းတခု ၀ါ ပုစ္ဆာတပုဒ် ဖြစ်လာပြန်တယ်။ ကျွန်တော်ကရော စကား အထအန ကောက်တတ်သူလား။

“ဟမ်… ဆောရီး၊ ချောတာက ကျွန်မအတွက် အရေးမကြီးဘူးလို့ ပြောတာပါ“

“ဟင်… ရုပ်ဆိုးတဲ့ ယောက်ျားကြီးလည်း ယူချင်ယူမှာပေါ့၊ ဟုတ်လား“

ကျွန်တော် စ ချင်တာရော မနေနိုင်တာရောကြောင့် အဲဒီလို မေးလိုက်တယ်။ သူ ကျွန်တော့်ကို ရိသဲ့သဲ့ လုပ်တယ်လို့ ခံစားနေရလို့လည်း ဖြစ်ပါတယ်။ မ က လှလှကလေး ပြုံးတယ်။ ပြီးမှ…

“မဟုတ်ပါဘူး၊ ချောတဲ့ ယောက်ျားရတာ ကောင်းတာရော ဆိုးတာရော ရှိတာပေါ့။ ကျွန်မအတွက် အရေးမကြီးဘူးလို့ ပြောတာပါ။ ယူ့လို နံပါတ်တစ် နေရာက မထားချင်တာကို ပြောတာပါ။ ကျွန်မက နံပါတ်ငါး နေရာမှာပဲ ချောတာကို ထားမယ်“

သူက အရှည်ကြီး မနားတမ်း ပြောပြီး သူ့ စကားအနက်ကို ဆက်ဖွင့်ပြန်တယ်။

“ချောတဲ့ ယောက်ျား အများစုက ပလေးဘွိုင်းတွေ ဖြစ်တတ်တယ်၊ မိန်းမတွေကို ကစားချင်ကြတယ်။ ဟိုလူ့ စလိုက်၊ ဒီလူ့ ဆိတ်လိုက် လုပ်ချင်ကြတယ်။ အဲဒါဆိုရင် ကျွန်မစိတ်နဲ့ဆို သတ်မိမှာပဲ“

ကျွန်တော် နည်းနည်းတောင် လန့်သွားတယ်။ သူ့မှာ မူလ အတွေ့အကြုံတွေများ ရှိနေမလားလို့တောင် ချက်ချင်း သံသယ၀င်ပြီး တွေးမိ လိုက်သေးတယ်။ မ က မျက်နှာတည်တည် စကားတည်တည် ပြောနေတဲ့အခါမျိုးမှာ ကျောင်းဆရာမ တယောက်နဲ့တူပြီး၊ ခပ်ရွှင်ရွှင် စကားပြောတဲ့အခါမှာ အောက်က ပရိသတ်နဲ့ အထာကျနေတဲ့ စင်ပေါ်က အဆိုတော်ပုံစံမျိုး ပေါက်သွားလို့ ခပ်ပြည်ပြည် စကားပြောရင်တော့ သဘောကောင်းတဲ့ သူနာပြုနဲ့ တူနေတာကို သတိထားမိတယ်။ အခုတော့ ဆရာမကြီးလို…။

“တော်ပြီ၊ အဲဒါကို မပြောတော့ဘူး။ ချောတဲ့ယောက်ျားတွေကို မုန်းလို့တော့ မဟုတ်ပါဘူး။ ကျွန်မ စိတ်ရင်းကကို ချောတဲ့ ယောက်ျား မကြိုက်တာပါ။ ကိုယ် ကြိုက်တဲ့ ယောက်ျား ချောတာက ကောင်းတာပါပဲ၊ ဒါပေမဲ့ နံပါတ်ငါးမှာပဲ ထားပါတယ်“

သူ က ဆက်ပြောပြန်တယ်။

“နံပါတ်သုံးနေရာက ကျွန်မရဲ့ သတ်မှတ် ရွေးချယ်မှုကတော့ ရိုးသားမှုပါပဲ။ ယောက်ျားတယောက်ဟာ သူ ချစ်တယ်လို့ဆိုတဲ့ မိန်းမ တယောက်ကို မလိမ်ရဘူး၊ မညာရဘူး“

ကျွန်တော့်မျက်လုံးကို တည့်တည့်ကြီးကြည့်ပြီး ပြောလာပြန်တော့ ကျွန်တော် မျက်နှာ လွှဲရပြန်တယ်။ ငါတော့ ဒုက္ခပါပဲလို့လည်း တဆက်တည်း တွေးလိုက်မိသေးတယ်။ ကျွန်တော်ကရော လိမ်တတ်သလား၊ ကျွန်တော်ဟာ အတတ်နိုင်ဆုံး မလိမ်တတ်သူ တယောက် ဖြစ်ပါတယ်။ လိမ်ညာထားပြီးရင်လည်း ကိုယ့်ဘာသာကိုယ် နေလို့ထိုင်လို့ မထိတဲ့ သူတယောက် ဖြစ်သွားပါတယ်။

“ရိုးတဲ့ ယောက်ျား ရှိလို့လား“

လက်ဝှေ့ကြိုးဝိုင်းထဲမှာ တွေ့ရတတ်တဲ့ ပင့်လက်သီးကို ကျွန်တော် သိပ်ကြိုက်တယ်။ ဒါကြောင့် ပင့်လက်သီးနဲ့တူတဲ့ စကားလုံး တလုံးကို မ ဆီကို ကျွန်တော် ပြန်ပစ်ထည့်လိုက်တာ ဖြစ်ပါတယ်။ ရုတ်တရက်မို့ ထင်တယ်၊ သူ အံ့သြသွားတယ်။

“ရှိရမှာပေါ့၊ ရှိတာပေါ့။ ကျွန်မ ကြိုက်တဲ့ ယောက်ျားဟာ ရိုးသားရမယ်“

ကျွန်တော် ပြုံးပြုံးလေးပဲ နေပေးလိုက်ပါတယ်။ လွန်လေတဲ့ ရုပ်ရှင်မင်းသား ၀င်းဦးလို ငါးခူပြုံးလေးများ ဖြစ်နေမလားပဲ။ ထားလိုက်ပါတော့…။

“ဒါဖြင့် နံပါတ်လေးက… နံပါတ်ငါးကတော့ သိပြီးပြီလေ“

သူ စဉ်းစားနေတယ်။ မ မှာ နံပါတ်လေး ရှိပုံ မရဘူး။ ချောတာကိုတော့ သူ မကြိုက်လို့ နံပါတ်ငါး လုပ်ပစ်ထားပုံရတယ်။ ပြီးမှ ဖြည်းဖြည်းချင်း ပြောလာတယ်။

“နံပါတ်လေးဆိုပြီး အထူးတလည် စဉ်းစားထားတာတော့ မရှိပါဘူး။ ယူ့စာရင်းထဲက ကြိုက်တာလေး တခုကိုတော့ သဘောကျလို့ ယူလိုက်ချင်တယ်။ မပျင်းတာပေါ့… ကြိုးစားတဲ့ ယောက်ျားမျိုးကို ကြိုက်တယ်“

သူ့စာရင်းလည်း ငါးခု ပြည့်သွားပါပြီ။ “တော်၊ ချစ်၊ ရိုး၊ ကြိုး၊ ချော“ လို့ အလွယ် မှတ်ရမယ်။ မ ရဲ့ စံက ယောက်ျားတယောက်ဟာ တစ်နံပါတ် တော်ရမယ်၊ နှစ်နံပါတ် ချစ်တတ်ရမယ်၊ သုံးနံပါတ် ရိုးသားရမယ်တဲ့ (မဖြစ်နိုင်တာ)၊ လေးနံပါတ်က ကြိုးစားရမယ်လို့ ဆိုပြီး၊ ငါးနံပါတ်ကတော့ သူ မကြိုက်ဆုံး တခုဖြစ်တဲ့ ချောတဲ့လူတဲ့။

ကျွန်တော်ကတော့ ရယ်ချည်း နေမိတယ်။ တကယ်ပါ… အဲဒီ ညနေခင်းလေးမှာလေ… မ ဟာ မျက်နှာငယ်လေးနဲ့ သိပ်လှနေတာပါပဲ။ သူ့ စံတွေနဲ့ ကျွန်တော်…၊ ရယ်စရာ မကောင်းဘူးလားဗျာ။

၂၀၁၂၊ ဧပြီ ၃၀။ နံနက် ၉ နာရီ။

ဘန်ကောက်။

Advertisements