by Myo Tha Htet on Sunday, 6 May 2012 at 22:44·

ဒီဇာတ်လမ်းလေးကို ကျွန်တော်ရေးတော့ ပထမတော့ ဘယ်သူမှ သိပ် စိတ်မ၀င်စားကြပါ၊ နောက်တော့ ဖတ်ကြည့်သူ တယောက်စ၊ နှစ်ယောက်စက မင်း ရေးထားတာ မဆိုးဘူးလို့ ပြောလာတော့ ကျွန်တော့်မှာ ပျော်လိုက်ရတဲ့ ဖြစ်ခြင်း… ကလို့တောင် နေလိုက်ပါသေးတယ်။ တခါ ခင်ရသူတဦးက ဆိုလာပြန်ပါတယ်။ “မောင်ရင်က… လုံးချင်းအထိတောင် ရေးမလို့လား၊ မကောင်းပါဘူး။ ဇာတ်သိမ်းလိုက်ပါတော့…“ တဲ့။ အဲဒီလို အားရပါးရ အားပေးလာလေတော့ ကျွန်တော့်မှာ ရယ်ကာမောကာ နေလိုက်ရပါတော့တယ်။

ဟုတ်ပါတယ်၊ မူလကတော့ အခုလို အပိုင်းလေးတွေ ခွဲရေးသွားပြီး အပိုင်း ၂၀ လောက် ဆိုရင် ငါတော့ စာတအုပ် ထုတ်လိုက်နိုင်မှာပဲလို့ ကျွန်တော့်မှာ စိတ်ကူးလေးတော့ ခပ်တည်တည် တခေါက် ယဉ်လိုက်ဖူးပါသေးတယ်။ ဒါပေမဲ့ မဖြစ်နိုင်ပါ၊ သို့မို့ကြောင့် ကျွန်တော် ဒီဇာတ်လမ်းရိုးကြီးကို အခုပဲ သိမ်းလိုက်ပါတော့မယ်လေ…။

ကျွန်တော်က မ ပြုံးရယ်တာကို စောင့်လို့ ငေးရင်း ကြည်နူးရပါတယ်။ ကိုယ် ချစ်ရသူ၊ ခင်ရသူတဦး ရယ်မောနေတာလေးကို ကြည့်နေရတာကိုက အရသာပါ။ အချစ်ရဲ့အရသာ၊ မေတ္တာဓာတ်ရဲ့အရသာလို့ ပြောရမလား။ ကျွန်တော်တော့ ခံစားလို့ သိပ်ကောင်းတာပါပဲ။

“မ… ပြုံးရင် သိပ်လှတာပဲဗျာ၊ ကျွန်တော်နဲ့တွေ့ရင် အမြဲပြုံးနေပါလား“

ကျွန်တော် ပြောလိုက်ကာမှ သူက ဈေးကိုင်ပါလေတော့တယ်။ ရုတ်ချည်း တည်သွားပြီး ကျွန်တော့်ကို မျက်နှာတည့်တည့် စိုက်ကြည့်ပါတော့တယ်။ ကျွန်တော့်မှာ မျက်နှာလွှဲရပြန်လေတယ်။ မိန်းကလေးတယောက်ကို ခင်တဲ့ချစ်တဲ့ နေရာမှာ ကျွန်တော်က အင်မတန် ဇီဇာကြောင်တဲ့သူ ဖြစ်ပါတယ်။ ကျွန်တော် ချစ်တဲ့ခင်တဲ့ မိန်းကလေးတွေကို ဘယ်လို ရွေးသလဲဆိုတာကို ပြန်စဉ်းစားမိတယ်။

ကောလိပ်တက်တဲ့ အချိန်က စလို့ပေါ့။

ကျွန်တော် ကောလိပ်ကျောင်းသားဘ၀က ကျွန်တော်နဲ့ ခင်မင်ခဲ့တဲ့ မမတွေ ရှိခဲ့ပြန်တယ်။ တယောက်ကဆို အခု သရီးဒီနဲ့ ပြန်ပြနေတဲ့ ကမ္ဘာကျော် အချစ်ဇာတ်ကား တကားဖြစ်တဲ့ တိုင်တန်းနစ် ရုပ်ရှင်ဇာတ်ကားထဲက သရုပ်ဆောင် မင်းသမီး ကိတ် ၀င်းစလက်နဲ့ တူတယ်။ တယောက်ကတော့ ဂျပန်ကာတွန်း ဇာတ်ကောင်ပုံစံနဲ့ တူတယ်။ ထားပါတော့…။

သူတို့တွေက ထင်သလောက် လှသူတွေတော့ မဟုတ်ကြ၊ ဒါပေမဲ့ ကျွန်တော်က မိန်းကလေးတယောက်ကို ရွေးတဲ့ နေရာမှာ လှတာကို နံပါတ်စဉ် တစ် ရေးထိုးလို့ ရွေးချယ်ခဲ့သူ…။ ဒီတော့ ဒီနေရာမှာ ၀ိရောဓိ ဖြစ်ချင်စရာ ကောင်းနေပါတယ်။ နောက်ပြဿနာတခုကလည်း အလှဆိုတာ ကြည့်သူပေါ်မှာ မူတည်တယ်လို့ ဆိုကြပြုကြပြန်လေတော့ ကျွန်တော့် မျက်စိထဲ လှသူတွေဟာ တခြားသူတွေ အတွက်ရော လှပါရဲ့လားဆိုတဲ့ မေးခွန်းတခု ထွက်လာပြန်တော့တယ်။

ကျွန်တော်ခုန ပြောတဲ့ မမနှစ်ယောက်ကတော့ အများအတွက် မလှပေမယ့် ကျွန်တော့်အတွက် လှပါတယ်၊ ဘာဖြစ်လို့လဲဆိုတော့ သူတို့မှာ လှပတဲ့ အပြုံးတွေ ရှိကြတယ်။ ကျွန်တော်က မိန်းမတယောက်ရဲ့ အပြုံးကို အကြိုက်ဆုံး ဆိုတာကို သွားတွေ့ပါတယ်။ ကျွန်တော့် သူငယ်ချင်း တယောက်က ကျွန်တော့်ကို တခါက မေးဖူးပါတယ်။ မိန်းမတယောက်ရဲ့ အလှဟာ ဘယ်နေရာမှာ ရှိတာလဲတဲ့။ သူက နည်းနည်းလည်း စဉ်းစားဥာဏ်ကြီးတဲ့သူဆိုတော့ ကျွန်တော်လည်း ပေါ့ပေါ့တော့ မဖြေရဲပါဘူး။

“အမျိုးမျိုးပေါ့ကွာ… တချို့က မျက်နှာလေးကို ကြိုက်ကြတယ်၊ တချို့က ကိုယ်လုံးကို ကြည့်ကြတယ်။ တချို့ကတော့ အမူအရာ၊ အပြောအဆို…။ တယောက်ယောက်နဲ့ တယောက်တော့ ဘယ်တူပါ့မလဲ“

ကျွန်တော်က အဲဒီလို ဖြေခဲ့ဖူးတယ်။ သူငယ်ချင်းလည်း ခေါင်းတငြိမ့်ငြိမ့်နဲ့ စကားဆက် မလာတော့ဘူး။ ကျွန်တော့်အဖြေကို လက်ခံသွားသလား၊ ဒါမှမဟုတ် ကျွန်တော့်အဖြေက သိပ်ကို ကလေးဆန်နေလို့များ ထည့်မတွက်ချင်လောက်တောင် ချုချာတဲ့ အတွေးအခေါ်ပဲလို့ သူ့ဘာသာ ယူဆပြီး ဆက်မမေးတော့တာလား မသိပါဘူး၊ ကျွန်တော်ဟာ သူ့ ဆွေးနွေးဖက် ဖြစ်မလာခဲ့ပါဘူး။

ဒါပေမဲ့ ကျွန်တော်အကြိုက်ဆုံးကတော့ မိန်းမတယောက်ရဲ့ အပြုံးပါပဲ။ မရဲ့ အပြုံးဟာ ကျွန်တော့်ရင်ကို နွေးထွေးစေပါတယ်၊ ခန္ဓာကိုယ်ကို ပိုပြီး သန်မာစေပါတယ်၊ အမိုက်ဆုံးကတော့ ကျွန်တော့်စိတ်ကို ကြည်ကြည်နူးနူး လွင့်လွင့်မြူးမြူး ရှိလာစေတယ်။ အခုတော့ မ က တည်သွားပါတယ်။ ပြီးတော့ ကျွန်တော့်ကို ကြည့်နေတယ်။

“ယူလည်း ပြုံးလိုက်ရင် လှပါတယ်၊ ပါးချိုင့်လေးတောင် ပါသေးတယ်“

မ က ကျွန်တော့်ကို တောက်လျှောက်ကြည့်နေပြီး ပြောလာပါတယ်။

“ယူ က သိပ်စဉ်းစားတာပဲ၊ တခါတလေ ပေါ့ပေါ့ပါးပါးလေး နေစမ်းပါကွ။ ယူပဲ ချောတဲ့ မိန်းကလေးတွေကို ကြိုက်တယ်ဆို… အဲဒီ မိန်းကလေးတွေက သိပ်လေးလေးနက်နက် ထားစရာ မလိုပါဘူး“

မ က ဘာဖြစ်လို့ ဒီစကား ပြောသလဲလို့ ကျွန်တော် လိုက်စဉ်းစားမိသေးတယ်။ ချောတဲ့ ကောင်မလေးတွေကို သူ မနာလို ဖြစ်နေပုံ ရတယ်လို့ ကျွန်တော် တွေးမိတယ်။ ဒါပေမဲ့ တခုရှိတာက မ ဟာ ကျွန်တော့်ကိုပဲ စိတ်ဝင်စားပြီး၊ ကျွန်တော် တခြား မိန်းကလေးတွေနဲ့ ပြောတာဆိုတာ ရင်းရင်းနှီးနှီး ရှိတာကိုတော့ လုံးဝ စိတ်ဝင်စားဟန်လည်း မပြဘူး၊ ဘာမှလည်း မပြောဘူး။ သူ့ကိုယ်သူ ယုံကြည်မှုအပြည့် ရှိဟန်တူပါတယ်။

“ဟဲ ဟဲ… ဘာတွေ ပြောနေတာလဲဗျ။ ချောလည်းချော တော်လည်းတော်တဲ့ မိန်းမတွေလည်း အများကြီးပါဗျာ။ မ လိုပေါ့“

သူက ကျွန်တော့်ကို မျက်စောင်းထိုးပြန်တယ်။ ကျွန်တော်တို့ဟာ တယောက်နဲ့တယောက် ပြောမနာဆိုမနာလည်း ရှိကြတယ်။ သင့်တင့်တဲ့ အရွယ်အသက်တွေလည်း အသီးသီး ရှိကြပြီမို့ ပွင့်ပွင့်လင်းလင်း စကားပြောလို့ ရတာကိုက အရသာတခုလည်း ဖြစ်ပါတယ်။ မလိုအပ်ပါဘဲ အာလူး၊ ဗူးသီးတွေ အများကြီး ပေးနေ၊ ပြောနေစရာ မလိုတာကိုက ကျွန်တော်တော့ အလွန် သဘောကျတာပါပဲ။

“ယူက အပြောလည်း ကောင်းတယ်၊ စာရေးလည်း ကောင်းတယ်။ ကိုယ်တို့တွေ အကြောင်းကိုတော့ ပေါက်ကရတွေ လျှောက်မရေးပါနဲ့…“

ကျွန်တော် စာလေးဘာလေး တခါတခါ ရေးတာကို မ က ဖတ်ကြည့်ပြီး ဝေဖန်တတ်တယ်။ အခုလို ကျွန်တော်တို့ ဆွေးနွေးဖြစ်တာတွေကို စာထဲ ထည့်ရေးမှာကိုလည်း သူက သိနေပုံပါပဲ။ အဲဒီလို ရေးတဲ့အခါမှာလည်း တခါတလေကျတော့ စာဖတ်သူ ဖတ်လို့ကောင်းအောင် စာချောအောင် နည်းနည်းပါးပါး လိုတိုးပိုလျှော့ ရေးရတာတွေ ရှိတာကိုလည်း သူက သိနေပုံပါပဲ။ သူ့ဘက်က အတွေးတွေကို စာဖတ်သူ မြင်အောင် တွေ့အောင် ရေးထည့်လိုက်မှာကို သူက စိတ်ပူပန်နေပုံပါ၊ လျှောက်မရေးနဲ့နော်လို့ ထည့်တောင် ပြောလာပါတယ်။ ကျွန်တော်က ဘာတွေကို လျှောက်ရေးရမှာတုံးဗျာ…။

“မ က ဘာဖြစ်လို့ ချောတဲ့ ယောက်ျားကို မကြိုက်တာလဲ“

ကျွန်တော်က သူ့ကို စချင်တာနဲ့ အဲဒီ မေးခွန်းကို မေးလိုက်ပါတယ်။ သူက တည့်တည့်ကြီး ကျွန်တော့်ကို ကြည့်ပြန်တယ်။ ပြီးတော့ ကျွန်တော့် ခေါင်းလေးကို အသာလေး ကိုင်တယ်။

“ချောတဲ့ ယောက်ျားတွေက ပွေတတ်ရှုပ်တတ်တယ်ကွ၊ အဲဒီတော့ အလကားနေရင်း ကိုယ်က ဒုက္ခများတာပေါ့။ မဟုတ်ဘူးလား“

ကျွန်တော်က ခေါင်းကို လာပွတ်နေတဲ့ သူ့လက်ကလေးကို ကယုကယင်ကိုင်ရင်း ကျွန်တော့်ပါးနဲ့ အပ်လိုက်တယ်။ ပြီးတော့ ရယ်ရယ်မောမောနဲ့ အခုလို ပြောလိုက်တယ်။

“မ က သိပ်အစွန်းရောက်တာပါပဲ၊ ခုနင်ကလည်း ချောတဲ့ ကောင်မလေးတွေကို အလေးအနက် ထားစရာမလိုဘူးလို့ ပြောတယ်။ အခုလည်း ချောတဲ့ ဘဲတွေကြတော့ ပွေတတ်ရှုပ်တတ်တယ်လို့ ပြောပြန်တယ်။ သူတို့တွေ ကြားရင်တော့ မ ကို မုန်းနေကြမှာပဲ။ ဘာဖြစ်လို့ အလွတ်ကြီး သူများကို အပုပ်ချရတာလဲ“

သူ့မျက်နှာ တည်တည်လေး ဖြစ်သွားတယ်။ တကယ်တော့ ကျွန်တော်က မ ကို ပြုံးစေချင်တာပါ။ အခုလို စကားတွေ ပြောနေကြတယ် ဆိုတာလည်း အလေးအနက်တွေ မဟုတ်ပါဘူး။ ကျွန်တော့်ဟာ မ ကို သက်သက်မဲ့ ထောက်နေ ငြင်းနေတာလားလို့တောင် တွေးမိသေးတယ်။ တကယ်တော့ ကျွန်တော်က စ တတ်တယ်၊ မ ကတော့ ကျွန်တော့်ကို လေးလေးစားစားနဲ့ အတည်ကြီး ဆက်ဆံ ပြောဆိုနေတယ်။ ကျွန်တော့်ရဲ့ အားနည်းချက်က ချစ်တဲ့ခင်တဲ့သူတွေကို အဲဒီလိုပဲ ခပ်တည်တည်ကြီး ပြောဆို ဆက်ဆံလို့ စ နေတတ်တယ်။

“သူများကို အပုပ်ချတာ မဟုတ်ပါဘူး၊ ယူ သိအောင် ပြောပြတာပါ။ တော်တဲ့ အရည်အချင်းရှိတဲ့ ယောက်ျားပဲ ကိုယ်လိုချင်တယ်။ ဒါပါပဲ… ကိုယ့်ဘဲက ချောဖို့ မလိုပါဘူး၊ တကယ်ပါ“

ဒီတခါတော့ ကျွန်တော့်မှာ အောင့်သက်သက် ဖြစ်သွားရပါတယ်။ မချိသွားဖြဲလေးနဲ့ စကားဆက်ရပြန်ပါတယ်။

“မ က ပြုံးရင် သိပ်လှတယ်၊ ဒီတော့ မ ပြုံးဖို့အတွက် ကျွန်တော် သီချင်းဆိုပြမယ်… ဘယ်နှယ့်လဲ“

သူက ရယ်တယ်၊ ပြီးတော့ မျက်လုံးလေးတွေ လက်အောင် ပြုံးရင်း ကျွန်တော့်ကို စူးစူးစိုက်စိုက်ကြည့်တယ်။ မ အကြည့်က အားပါတယ်၊ အပြုံးက ရဲနေတယ်။ နောက်တော့ ကျွန်တော့်အကြိုက် ချစ်စရာလေး ထပ်ပြုံးရင်း ဘာသီချင်း ဆိုမှာလဲလို့ ကျွန်တော့်ကို မေးတယ်။

“ဆု ပေါ့“

“ဟဲ ဟဲ“

မ က လွတ်လွတ်ကလေး ရယ်တယ်။ ကျွန်တော်ကတော့ ဆိုလေပြီ…။

“စိတ်မဆိုးနဲ့နော်… ခွင့်လွှတ်ပါကွယ်… ကိုယ် ရိုင်းနေရင်… ကိုယ့် စိတ်က အရင်ဒီလို မဟုတ်ဘူးကွယ်၊ မင်းနဲ့မှ ပြောင်းလဲ ကုန်ပြီ။ အားလုံးလည်း ငါ မယုံနိုင်… မင်းလေးကို ဘယ်သူ့မှ မပေး… မပေး မပေးနိုင်ဘူး။ မင်းလေးဟာ ငါ့အချစ်ပဲ၊ မင်းလေးဟာ ငါ့အတွက်ပဲ… လွန်တယ်လို့ မင်းမထင်နဲ့…“

အားလုံးပျော်ရွှင်ကြပါစေ။

၂၀၁၂၊ မေ ၆။ ည ၁၀ နာရီ။

လန်ဒန်။

Advertisements