by Myo Tha Htet on Sunday, 5 February 2012 at 07:41·

“နှုတ်ခမ်းစူ မူတာ မိန်းကလေးတွေရဲ့ ရှေးရိုး အကျင့်စရိုက်လေးပါ“ (ဟေမာနေ၀င်း- ခွင့်လွှတ်နော်)။

သီချင်းလေး လိုက်နားထောင်ရင်း ကိုကို့ကို သတိရနေမိတယ်။ ဒီအချိန်ဆို ကိုကိုတယောက် ဘာလုပ်နေမှာပါလိမ့်…။ ပိုပိုတယောက်ထဲ တွေးမိပြီး ၀မ်းနည်းသလိုလို လွမ်းသလိုလို ဖြစ်လာတယ်။ ကိုကို့ကို ပိုပို ခဏခဏ နှုတ်ခမ်းစူ၊ စိတ်ကောက်လုပ်ခဲ့တာပဲ။ ဒါပေမဲ့ ဒီလူကြီးရဲ့ အချစ်ကို တစိတ်တသားမှ လျှော့လို့မရနိုင်ခဲ့… ကိုယ်ဆိုးလေ၊ သူက တိုးချစ်လေလား မသိပါဘူး။ တခါကဆို… သူ့ကို အပြတ်ကို မချစ်နိုင်ဘူး၊ မဖြစ်နိုင်ဘူးလို့ ပြောခဲ့ဖူးတယ်။

“ကိုကျော်လင်း… ကျွန်မတို့ ဒီနေရာမှာ ရပ်လိုက်ရင် ကောင်းမယ်။ ရှေ့ဆက်ဖို့ဆိုတာ ဘယ်လိုမှ မဖြစ်နိုင်ပါဘူး။ နောက်ဆို… မခေါ်ပါနဲ့တော့လေ“

“ဘာဖြစ်လို့လဲ… ချစ်လေးရာ၊ ကိုယ် ဘာများ အမှားလုပ်မိလို့လဲ“

“အမှားတွေ၊ မမှားတာတွေ ပြောမနေပါနဲ့တော့… ကျွန်မတို့ လုပ်နေတာတွေ ရပ်မှဖြစ်မယ်။ အဖေသိသွားရင် မလွယ်ဘူး။ အဖေက ဘယ်နည်းနဲ့မှ သဘောတူမှာ မဟုတ်ဘူး“

“ချစ်လေး… ဘာတွေ ဖြစ်နေတာလဲ၊ နေမကောင်းပြန်ဘူးလား။ ရုတ်တရက်ကြီး ဘာတွေ ဖြစ်သွားတာလဲ။ နောက်မှ တွေ့ကြမလား၊ နားလိုက်မလား…၊ ဒါဆို ဘိုင်ဘိုင်လေ… နော်…၊ စာတွေချည်း တအားလုပ်မနေပါနဲ့… ကုလားကားလေး ဘာလေး သွားကြည့်ပါလား။ ပြီးခဲ့တဲ့ တပတ်က ရှာရွတ်ခန်ကားအသစ် ရုံတင်တယ်ဆို…“

“ကိုကျော်လင်း… လျှောက်မပြောနေနဲ့… ကျွန်မတို့ ဇာတ်လမ်းပြတ်ပြီ… ဒါပဲ“

ပိုပိုတို့ အွန်လိုင်းကနေ ဗီဒီယိုချက်တင် လုပ်နေကြတာပါ။ ကိုကိုလို့လည်း ပိုပိုက နာမ်စား မသုံး၊ ကိုကျော်လင်းလို့ ကိုကို့နာမည် အရင်းအတိုင်း ခေါ်ဆိုပြောဆိုမိခဲ့တယ်။ ပိုပို သိပ်များ တစိမ်းဆန်လို့ ရိုင်းသွားပြီလား။ တကယ်တော့ ပိုပိုလည်း ဆုံးဖြတ်ပြီးသားမို့ ကိုကို့ကို အပြတ်ပြောသာပြောလိုက်ရတယ်။ စိတ်ထဲမှာတော့ မကောင်း… ဒီနေ့ မိုးမရွာလို့ လိုင်းကြည်နေတာကြောင့် ကိုကို့မျက်နာကိုလည်း ကွန်ပျူတာ စကရင်မှာ အထင်းသား မြင်နေရပါတယ်။ သူ့မျက်နှာက ရွာတော့မယ့် မိုးလို မှိုင်းညို့လို့… တခါ သူ့ မျက်နှာလေး ဖြစ်ပျက်နေတာများ ဆီးရွက်လောက် ရှိတော့တယ်။ ပြောနေရင်းနဲ့ ပိုပိုလည်း တချက်တချက် မိုက်ကနဲ ဖြစ်ချင်နေတယ်။

ဒါပေမဲ့လို့ သံယောဇဉ်တွေ ဒီထက် တိုးလို့ မဖြစ်နိုင်တော့ဘူးလို့ ဆုံးဖြတ်ပြီး ဖြစ်တာကြောင့် ပိုပို အခုလို အပြတ်ကော၊ အပြတ်ပြောနေ ရတာ ဖြစ်ပါတယ်။ ကိုကိုက မေးလာပြန်တယ်။

“ချစ်လေးရယ်… ပြဿနာတိုင်းမှာ အဖြေဆိုတာ ရှိပါတယ်။ ဘာဖြစ်တာလဲဆိုတဲ့ အကြောင်းခံကို မပြောဘဲ နင်းကန်ကြီးကို မဖြစ်တော့ပါဘူး၊ ဇာတ်လမ်း ဒီတင် ရပ်ပါပြီလို့ ပြောနေတာ ဘာတွေများ ဖြစ်ကုန်လို့လဲ။ တခြားတယောက်များ တွေ့ထားနေလို့လား။ အိမ်က ဘာတွေများ လှမ်းပြောလို့လဲ… ဒီလူကို ဘာကြောင့် ဒီလောက် ရုတ်တရက် ခါးခါးသီးသီး ဖြစ်နေရတာလဲ။ ကိုယ့်မှာ ဘာအပြစ်ရှိလို့လဲ ချစ်လေးရာ… ပြောပြလို့ရရင် ပြောပြစမ်းပါလေ“

အို… ကိုကို့ အသံတွေ တုန်ယင်ဆို့နစ်နေပါလားလို့ ပိုပိုတွေးရင်း စိတ်မကောင်း ပိုဖြစ်မိတယ်။ ကမ္ဘာရဲ့ တခြားတဖက်မှာ ရှိနေတဲ့ ကိုကို တော်တော်ကြီးကို ခံစားနေရပါလားလို့လည်း ပိုင်ပိုင်ကြီး ပိုပို သဘောပေါက်လိုက်တယ်။ ဒီလူကြီးကိုက ခက်နေပါပြီ။ ဒီရင် အူနုကို သူ့ချစ် ကျွဲဂျိုကြီးနဲ့ ခတ်ချနေပါရော့လား။ အို့… ကိုကို ငိုလို့တောင် နေပါရော့လားရှင်… စိတ်မကောင်းလိုက်တာ…။

ပိုပို့ဘ၀မှာ မေမေရယ်၊ အဒေါ်တွေရယ် ကြားမှာသာ ကြီးပြင်းလာခဲ့တယ်။ ယောက်ျားသားဆိုလို့… ခပ်တန်းတန်း နေတတ်တဲ့ အဖေရယ်၊ သူ့ဟာနဲ့သူ အလုပ်တွေ ရှုပ်နေတတ်တဲ့ အကိုကြီးရယ်၊ တခြားတနေရာမှာနေတဲ့ အဖိုးရယ်… ဒီသုံးယောက်ပဲ ရင်းရင်းနှီးနှီး တွေ့မြင်ဖူး တာကိုး…။ ပြီးတော့ သူတို့တွေကို တခါဖူးမှ မျက်ရည်ကျတာမျိုး မတွေ့ဖူးခဲ့ဘူး။ အဖေဆို မာလိုက်သမှ အမြဲတမ်း ဟောက်ချည်းနေလို့ “အဖေရယ်… သမီး အချောအလှလေးကို မချစ်ဘူးလား“ လို့တောင် တွေးခဲ့မိသေးတယ်။ ကြားဖူးသမျှ အဖေတွေက သမီးတွေဆို ပိုလို့ ချစ်သတဲ့ ဆိုတာကိုးရှင်။

အခုတော့ ကိုကိုလို့ ပိုပိုက ခေါ်တတ်တဲ့ ကိုကျော်လင်းကြီးက မျက်ရည်တွေ တွေတွေကျလို့ စကားတွေတောင် မပီမသ ပြောနေပါပြီကိုး၊ ရင်ထဲ တဆစ်ဆစ်နာကျင်လို့… ခက်လှပါသရှင်။ ဒီလူကြီးတော့ ပိုပို့ဘ၀လေးကို လွှမ်းမိုးခြယ်လှယ်အား ကြီးတော့မယ် ထင်ပါရဲ့…။ ဘုရားသခင် ကယ်တော်မူပါ… ဒီလူဟာ တပည့်တော်မရဲ့ ဖူးစာဖက်ပါလား၊ ဒီလူကြီးဆီ အချစ်ဒီဂရီ ရေစီးတွေ တဖြည်းဖြည်းနဲ့ ကူးလူး စီးဆင်းနေပါပကော ဘုရား…။

ပိုပို သိလိုက်ပါပြီ။ ဒီနေ့ ကိုကိုနဲ့ ပြောဆိုမိတဲ့ စကားတွေဟာ မှားခဲ့တယ်ဆိုရင်တောင် တဘ၀စာအတွက် မှန်တဲ့ဘက်ကို ရောက်ဖို့ ဖြစ်သွားခဲ့ပြီဆိုတာ… ဒီလူကြီးရဲ့ အချစ်တွေဟာ ပိုပို့ကို လွှမ်းမိုးခဲ့ပြီ။ ဒီလူကြီးကို မုန်းဖို့၊ မေ့ဖို့၊ ပြတ်ဖို့၊ ဖြတ်ဖို့ ဆိုတာ ဘယ်လိုမှ မဖြစ်နိုင်တော့ဘူးဆိုတာ ပိုပိုသိလို့သွားပါပြီ။ ဒီလူဟာ ပိုပို့ရဲ့ တခြားတ၀က်ပေပဲ… ဘ၀ရဲ့ တခြားတ၀က်ကို တွေ့ခဲ့ပြီ။ ပိုပို တချက်ပြုံးလိုက်တယ်… ချစ်ရည်တွေ ၀လို့… စိတ်ထဲမှာလည်း တော်တော်ကြီးကို သက်သောင့်သက်သာ ရှိသွားတယ်။ တဘ၀မှာ တခါသာ ခံစားဖူးတဲ့ အရသာမျိုး…။ ကျေနပ် နှစ်သက်မှု အပြည့်…။

“ဟေ့… လူကြီး၊ မရှက်ဘူးလား… ယောက်ျားကြီးဖြစ်ပြီး မျက်ရည်တွေ ကျလို့… နှပ်တွေ သုတ်ပစ်ပါဦး… ရွံဖို့ကောင်းလိုက်တာ…“

မျက်လုံးကြီးပြူးလို့ ပိုပို့ကို မယုံမရဲ ကြည့်နေတဲ့ ကိုကို… အူကြောင်ကြောင်ဖြစ်လို့…၊ တကယ်ချစ်ဖို့ ကောင်းတဲ့ လူကြီး…။ ပိုပို ဘာမှ မတွေးနိုင်တော့… ကွန်ပျူတာ စကရင်ကြီးကို ကုန်းနမ်းလိုက်တော့တယ်။ တကယ်ဆိုးတဲ့ လူကြီး… ဒီရင်မှာ ဗြောင်းဆန်ကုန်ပြီ။
+++

မျက်ဝန်းလှ

ပြုံးတစဖြင့်

လွှမ်းမိုးခြယ်လှယ်

ငါ့တွေးနယ်သို့…

ကွန်ပျူတာ စကရင်က vzo အကောင့် ဗီဒီယိုချက်ကို မလုပ်ချင်လုပ်ချင်နဲ့ ကိုကျော်လင်း တယောက် sign out လုပ်လိုက်ရတယ်။ တယောက် တနိုင်ငံစီ ရောက်နေရတဲ့ ဘ၀ ဆိုးလှသဗျာ။ ဘေးနားမှာ ရှိနေတဲ့ ချစ်သူဆိုရင်တော့ နှာခေါင်းတခုလုံး ကျိုးကျေသွားပါစေ သူ့ပါးမှာအပ်ပြီး အနမ်းတွေ အားပါးတရ ချွေမိမှာပဲ။ အချစ်သူခိုးမလေး… အရမ်းဆိုးတာပဲ… ဒီလူကို စိတ်ဆင်းရဲအောင် လုပ်ရက်တယ်။ သူကိုယ်တိုင်လည်း ရှောင်ခွာပြေးနိုင်တာ မဟုတ်ဘဲနဲ့ ဘယ်သူ မြှောက်ပေး သင်ပေးလိုက်တဲ့ စကားတွေမှန်း မသိ… ဒီလူကြီး ရင်ကွဲအောင် ပြောရက်တယ်၊ ပြောထွက်တယ်။

ကိုယ်တိုင်လည်း ဘာကြောင့်မှန်း မသိ၊ အ၀မ်းနည်းကြီး ၀မ်းနည်းလို့ မျက်ရည်တွေဟာ တပေါက်ပေါက်ကျကုန်တယ်။ ဘ၀မှာ တခါမှ ဒီလို မျက်ရည်တွေ ပိုးပိုးပေါက်ပေါက် မကျခဲ့ဖူးဘူး။ ကိုယ်တိုင်လည်း ထူးဆန်းနေသလို သဘောအကျကြီးလည်း ကျလို့… အချစ်ရဲ့စေ့ဆော်မှု၊ အချစ်ရဲ့တွန်းအား၊ အချစ်ရဲ့ စေစားမှုများ… မြားနတ်မောင်ရယ်… ဘာကြောင့်များ နှလုံးအိမ်ကို မပစ်ဘဲ မျက်လုံးကြီးကို ထိုးခတ်ခွင်းရက်သလဲ… ကွန်ပျူတာ စကရင်ရှေ့မှာ ကျသွားခဲ့တာဟာ မျက်ရည်တွေလား… နှလုံးသွေးစက်တွေလား…။

လွန်ခဲ့တဲ့ သုံးနှစ်ကျော်ကာလ ချစ်လေးနဲ့ ပထမဆုံး တွေ့တဲ့ အခိုက်အတန့်… ပိုင်စိုးမှု ဧကရီ အလှနတ်ဘုရားလေးတပါး…။ခုနက ရုတ်တရက် နှုတ်ထွက် ရွတ်ခဲ့တဲ့ ကဗျာလေးရဲ့ ပိုင်ရှင် အရှင်သခင်… ဒီမျက်နက်ဝန်းလေး၊ သွားဖွေးဖွေးလေးတွေပါတဲ့ အပြုံးလေး တကွက်၊ ဆံနွယ်လေးတွေ အ၀ဲ… ဘလောက်စ် အင်္ကျီလေးနဲ့ ဒူးအထက်တက်နေတဲ့ စကပ်တိုလေး… အဖြူရောင် ၀မ်းဆက်နဲ့ သန့်စင်တဲ့ နတ်သမီးလေးဟာ ပိုပိုဆိုတဲ့ ကျွန်တော်ရဲ့ ချစ်သူလေးပေါ့။

“ကိုကျော်လင်း… ငိုင်လှချည်လား၊ ဘာတွေ စဉ်းစားနေတာလဲ“

ကားမောင်းနေတဲ့ အကိုကြီးရဲ့ အမေးတခွန်းနဲ့ စကားပြောလာမှ ခေါင်းကို တချက် ခပ်သွက်သွက်ရမ်းရင်း ရယ်ကျဲကျဲနဲ့ နတ်သမီးအိပ်မက်ထဲက နိုးထွက်လိုက်ရတယ်။ စက္ကန့်ပိုင်းလောက် အခိုက်အတန့်လေးမှာကို နေ့ခင်းကြောင်တောင်ကြီး နွေလယ် အိပ်မက် ရုတ်တရက် မက်သွားခဲ့တာကိုး…။

“မဟုတ်ပါဘူး… အကိုကြီး၊ အို… ဟို ဟို… ကောင်မလေးက အချောလေးပဲဗျ… ချစ်စရာလေး“

“ကိုကျော်လင်း သဘောကျလား။ သူ့မိဘတွေက သူ့ကို အိမ်ထောင်ချပေးမလို့တဲ့“

“အော်…“

ကိုကျော်လင်းနဲ့ အကိုကြီးတို့ ဆိုတာက ညနေပိုင်း မဟာဘွဲ့တန်း အတူတက်ရင်း ကျောင်းသွားဖက်၊ စာဆွေးနွေးဖက် သူငယ်ချင်းတွေ ဖြစ်သလို အကိုကြီးက ပိုပိုလေးနဲ့လည်း တခြား သင်တန်းတခုမှာ အတူတက်နေကြသတဲ့။ စာအုပ်တအုပ် သွားငှားမလို့ လိုက်ခဲ့ပါဆိုတာနဲ့ ကိုကျော်လင်းက လိုက်လာဖြစ်ရင်း ပိုပိုလေးကိုတွေ့တော့ ဘ၀ါဘ၀က အဆက်ဆက် ပေါင်းဖက်ခဲ့တဲ့ ချစ်သူကို ပြန်တွေ့ရသလိုမျိုး ကိုကျော်လင်းမှာ ခံစားခဲ့ရတယ်။

အခုတော့ အိမ်ထောင်ချပေးမလို့ သူ့မိဘတွေက စီစဉ်နေကြတယ်ဆိုတဲ့ အကိုကြီးရဲ့ သတင်းစကားနောက်မှာ အော် တလုံးသာ သူ လိုက်နိုင်တော့တယ်။ တခုခုကို ဆုံးရှုံးရတော့မှာမို့ စိတ်ပူမိသလိုမျိုးလည်း တခါထဲ ခံစားလိုက်ရပြီး ကိုကျော်လင်းရဲ့ ဦးခေါင်းတခုလုံးဟာ အိုးထိန်းစက်လို ချာချာကို လည်လို့…။

“ကျွန်တော် သူ့ကို သဘောကျတယ် အကိုကြီးရာ…“

ဒီလို စကားမျိုး ပြောခဲတဲ့ ကိုကျော်လင်း သူ့နှုတ်က ရုတ်တရက် ထွက်သွားတာကို ကိုယ်တိုင်လည်း အံ့သြလို့… အကိုကြီးကလည်း ကားမောင်းရင်း ဘရိတ်ကိုတောင် ရုတ်တရက် ဆောင့်နင်းလိုက်ပြီး အံ့သြလို့…။ ပြီးမှ စားသောက်ကြဖို့ တခုခု ၀ယ်သွားရင် ကောင်းမလားလို့ လို့ မဆီမဆိုင် စကားတွေ ပြောလာတယ်။ လူကြီးဆိုတော့ ရယ်ကျဲကျဲ…။

ကိုကျော်လင်းမှာလည်း ပြီးခဲ့တဲ့ နာရီပိုင်းက အကောင်း… ခုတော့ မအီမသာ၊ မအီမလည်၊ မအီ… အို ဘာမှန်းလို့တောင် မပြောတတ်တော့ပါဘူး ဆိုတာလိုဖြစ်လို့…။ အို… ရှင်းသန့်တဲ့ နတ်သမီးလေးရယ်… ဘုံကြိုးပြတ်လို့ လူ့ပြည် ၀င်စားလေရော့သလားကွယ်…။

နောက်တော့ အကိုကြီးကောင်းမှု အကြောင်းပြုလို့ ကိုကျော်လင်းနဲ့ ပိုပိုတို့ ရင်းနှီးမှုဇာတ်လမ်း တစခန်းထဖို့ အကြောင်းဖန်လာတယ်။ အချစ်စစ်ရဲ့တန်ခိုးလို့ဆိုဆို… သူတော်ကောင်း နတ်ကောင်းမတယ်လို့ပြောပြော… မှန်ကန်တဲ့ အကြောင်းချင်းရာတွေ ဖြစ်လာတာကို ကိုကျော်လင်း ၀မ်းပန်းတသာကြိုဆို ပျော်မြူးနေခဲ့မိတယ်…။

ပိုပိုက ကလေးတွေကို အင်္ဂလိပ်စာပြတဲ့ ဆရာမ… အခုတော့ သူလေးက တနိုင်ငံ တရပ်ခြားမှာ ကိုကျော်လင်းတို့၊ အကိုကြီးတို့ သင်ယူနေတဲ့ မဟာဘွဲ့ကို သွားယူမတဲ့။ သူ့အဒေါ်တယောက်ကလည်း အဲဒီနိုင်ငံမှာ တာဝန်ကျနေတယ်ဆိုလား… အဲဒီကျောင်းဝင်ခွင့် အောင်မြင်ဖို့ ကိုကျော်လင်းက စာပြပေးရမယ်တဲ့။ ကိုကျော်လင်းခမျာ ပျော်လွန်လွန်းလို့ အစိုးရ အောင်ဘာလေထီ မင်္ဂလာစုံတွဲ ၁၂ တွဲ ဆက်တိုက် ပေါက်တယ်လို့ အောက်မေ့တာပါပဲ။ ဗြဟ္မာ့ပြည်က အပ်တစင်း လွှတ်ချခဲ့လို့ လူ့ပြည်က အပ်တစင်းနဲ့ ထိချင်ထိသွား နိုင်တယ်လေ… ဒီလို အခွင့်အရေးမျိုး ရဖို့ဆိုတာက မလွယ်မှ မလွယ်နိုင်တာကိုးဗျ။

“အိပ်မက်ဟာ တကယ် ဖြစ်လာတာ…“ လို့ သီချင်းပဲ ဆိုရမလို၊ အကိုကြီးလို ဂုဏ်သရေရှိ လူကြီးမျိုးနဲ့ ကျောင်းအတူတက်ခွင့်၊ ရင်းနှီး ခင်မင်ခွင့် ပေးထားတဲ့ ကံတရားကိုပဲ ကောင်းချီးပေးရမလိုလို ဘာလုပ်လို့ ဘာကိုင်ရမှန်းမသိ… မျောက်အုန်းသီးရတဲ့ ပျော်ရွှင်မှုမျိုးနဲ့… ကိုကျော်လင်းခမျာ… အကိုကြီး မဟုတ်တဲ့ တခြားလူတယောက်က တွေ့ရင်… ဥပမာ သူတို့ သူငယ်ချင်းတွေထဲက ရုပ်ချောသလောက် အပြောကောင်းတဲ့ ကိုမျိုးဆွေ တယောက်များ အခုလို ဖြစ်နေတဲ့ ကိုကျော်လင်းကြီးကို တွေ့ရင် အကိုကြီး ကားသော့ အပြေးတောင်းပြီး ရွာသာကြီး ပို့မယ်လို့ အတင်းလုပ်မှာ…။
++++

၁၅၀၀ သင်ခန်းစာ

ပိုပို့ကျောင်းဝင်ခွင့် အောင်မြင်ဖို့အတွက် စာပြပေးရမယ့် ပထမဆုံးနေ့ သင်ခန်းစာအတွက် နေရာက အကိုကြီးရုံးခန်း…၊ အိမ်က ကားကို အကို ယူသွားတာနဲ့ ကားငှားစီးလို့ အကိုကြီး ရုံးလာခဲ့တာ ကားခက မြန်မာငွေ ၁၅၀၀ ကျပ်တောင်းတော့ အတိတ်နမိတ်ကောင်းလို့ ယူဆပြီး လူပျိုကြီး ကိုကျော်လင်း ပြုံးပြုံးကြီး ဈေးမဆစ်တော့ဘဲ ပေးပစ်ခဲ့တာ… အဲဒီအပြုံးကြီးက တက္ကစီကားလေး အကိုကြီးတို့ ရုံးဖွင့်ထားတဲ့ ခြံထဲကို ၀င်လာတဲ့အထိ…။

အမယ် ဆရာ ကိုကျော်လင်း မရောက်ခင် ဆရာမ-တပည့်မလေးက ရောက်နေလို့ အကိုကြီးနဲ့ စကားတွေ ပြောနေကြတယ်။ ဆရာမ-တပည့်မလို့ ပြောရတာက အကြောင်းရှိတယ်။ သူ့ဟာသူဆို ကလေးတွေ အင်္ဂလိပ်စာသင်တဲ့ ဆရာမ၊ အခု ကိုကျော်လင်းနဲ့တွေ့တော့ သူကလေးက တပည့်မ။

တကယ်တော့ ကိုကျော်လင်းအတွက်လည်း သူကလေးက… ရှင်းသန့်နတ်သမီးလေးက ဆရာမလေးပါပဲ။ ဒီလူကြီး ရင်တွေ ခုန်လှုပ်အောင် အချစ်တွေ တဖန်နိုးကြားအောင် နှလုံးသား သင်ခန်းစာ အသစ်တွေ တက်ဖြစ်အောင် မျက်ဝန်းကြိမ် တရွှမ်းရွှမ်း၊ အပြုံးကြိမ်း တဟမ်းဟမ်းနဲ့ တွန်းထိုး သင်ကြားတော့မယ့်… မထင်မှတ်ချိန် စာမေးပွဲ စစ်မေးတော့မယ့် အချစ်ဆရာမလေးပါပဲ။ အနာဂတ်ဘ၀ရဲ့ လမ်းညွှန်ဆရာမလေးပါပဲ။ ဆရာမလေးရဲ့ဆရာ ကိုကျော်လင်းအတွေးတွေ လူကျွံဘော ဖြစ်နေပြီလားတော့ မသိ…။

ဒီလိုနဲ့ အကိုကြီးက ဘေးကနေ နားထောင်နေ… ကိုကျော်လင်းနဲ့ ပိုပိုတို့က သင်ခန်းစာ စာအုပ် လှန်လိုက်၊ ဖတ်လိုက်၊ ရှင်းလိုက်၊ တွက်လိုက် လုပ်နေကြတာပေါ့။ တကြိမ်မှာတော့ စီမံအုပ်ချုပ်မှုပညာနဲ့ ပတ်သက်လို့ စကားစပ်မိကြပြီး ကိုကျော်လင်းက မေးခွန်းထုတ် လိုက်တယ်။ အလွယ်တကူတော့ မဟုတ်… အသည်းတယားယား ရင်တလှပ်လှပ်နဲ့… သူ မနေနိုင်တော့ဘူး။ ဒီယုန်မြင်လို့ ဒီချုံထွင်မိပြီ။

စာတွေသာ သင်နေ၊ ရှင်းနေရတာကိုး… အချစ်အရှိန်တွေ ဇောတွေက ရွပိုးထိုး ကြွနေတော့ ရှင်းသန့်သူလေးသာ မသိရင်နေရော့မယ်။ ဒီလူမှာ နေမထိ ထိုင်မသာ ဖြစ်နေပြီလေ။ အသက်အရွယ်အရသာ ဟန်ကိုယ့်ဖို့ မာန်သူ့ဖို့ ထိန်းနိုင်မယ်၊ အချစ်တွန်းအား တန်ခိုးရှိန်ဝါကိုတော့ သူမလိမ်နိုင်တော့ဘူး။ စကားသံတွေလည်း တုန်လာပြီ၊ မျက်လုံးချင်းလည်း ဆိုင်မကြည့်ရဲတော့ဘူး… ရိပ်မိသွားလို့ နောက်နေ့တွေ မသင်တော့ဘူးဆိုရင် အခက်…။

“ပိုပို… ဒေတာနဲ့ အင်ဖော်မေးရှင်း ဘာကွာလဲ… သိသလား“

အင်္ဂလိပ်စာသင်နေတဲ့ ဆရာမလေးကို ပညာစမ်းမိပါပြီကော…။ Data နဲ့ Information…။ ဒီလူကြီး ဘာကြောင်တာလဲဆိုတဲ့ အကြည့် တချက်ထိတယ်။ ဒါပေမဲ့ အင်္ဂလိပ်စာသင်တဲ့ မြန်မာဆရာမလေးကလည်း သိသလိုလိုနဲ့ သေချာမသိ ဆိုသလို ဆရာ ကိုကျော်လင်းကို ဘာအဖြေ ပြန်ပေးရမှန်း မသိ၊ ပြူးလို့ကြည့်…၊ ပြီးတော့ ဒီလူကြီး ရင်တုန်လှုပ်ရှားအောင် ခေါင်းလေးခါလို့ ငုံ့ကနဲ တချက်အရယ်… အဖြူရောင် မြားလေးတွေ ဒီရင်ကို စိုက်ပြန်ပေါ့။

မရှိတဲ့ သမာဓိကို ဆရာဂုဏ်ဆိုတဲ့ ကြားဖူးနားဝကြီးနဲ့ ကြိုးစားထိန်း… သူ့အသံကို တည်ငြိမ်အောင် လုပ်ပြီး သကာလ ကိုကျော်လင်းက မေးခွန်းတွေနဲ့ စကားစတယ်။

“ပိုပို… ကျွန်တော် မေးတာတွေကို ဖြေကြည့်ပါ၊ ပြီးရင် ရှင်းသွားလိမ့်မယ်။ ကဲ… စမယ်၊ ပိုပိုတို့ နေတဲ့ ရပ်ကွက်က…“

“မေခအိမ်ရာ၊ ခြံနံပါတ် ++၊ သင်္ဃန်းကျွန်းမြို့နယ်“

“ဟုတ်ပြီ၊ မိဘတွေ အမည်၊ အလုပ်အကိုင်… မွေးချင်းတွေ အမည်၊ အလုပ်အကိုင်“

“ဦးစိုးပိုင်၊ ဒေါ်ခင်ပို၊ အကိုက ကိုထင်ပေါ်… အဖေနဲ့အကိုက ဆရာဝန်၊ အမေက အိမ်ရှင်မ“

“ပိုပိုနာမည်ရင်းနဲ့ အလုပ်အကိုင်လည်း ပြောလေ၊ အသက်ပါ ပြောလို့ရရင် ပြောပါ“

“ပိုပိုပိုင်၊ အလွတ် အင်္ဂလိပ်စာပြဆရာမ၊ အသက်က တကယ် ပြောရမှာလား… မပြောလို့ မရဘူးလား“

“ပြောပါ၊ အကြောင်းရှိလို့ပါ…“

“အင်း… ၂၆“

“ရည်းစားရော ရှိသလား“

“ရှင်…“

အကိုကြီးက ငိုက်နေလေပြီ။ ပိုပိုလေးကလည်း အံ့သြလို့… ရုတ်တရက် မျက်နှာကြီး နီမြန်းလာပြီး ရှက်နေလေပြီ။ ပိုလို့ မျက်နှာကြီး နီမြန်း ရှက်ရမ်းနေတာက ကိုကျော်လင်း…။ ဒါပေမဲ့ ဆရာဂိုက်နဲ့ မာန်တင်းထားဆဲ…။

“မဟုတ်ပါဘူး… ဒေတာနဲ့ အင်ဖော်မေးရှင်း ဘယ်လို ခြားနားသလဲ ဆိုတဲ့ အကြောင်း ပြောမလို့လေ… ကဲ ကဲ… ခုနင်ကဟာလေး ဖြေပြီးရင် ရှင်းတော့မယ်“

“ဟို ဟို… အဲ.. ဟဲ.. မ… ရည်းစားကလေ… မရှိသေးပါဘူး“

“ဟုတ်ပြီ၊ ရပြီ… အဲဒါလေး ရှင်းရှင်းလင်းလင်း ဖြစ်သွားရင် ရှင်းပြတော့မလို့ပါ“

ကိုကျော်လင်း အပျော်၊ အပြုံးက ဖုံးမရ ဖိမရ… လူပျိုကြီးတွေများ မိန်းကလေးတွေနဲ့ တွေ့ရင် ကြောင်တာ၊ ပြုတာ သိပ်သိသာတာပါပဲ ဆိုတာ ကွက်တိဖြစ်နေပါပြီ။

“ခုန ပိုပို ပြောသွားတာတွေက… အချက်အလက်တွေပေါ့လေ၊ ဒေတာလို့ ခေါ်သပေါ့။ ပိုပို့ရဲ့ အချက်အလက်တွေ၊ ဒေတာတွေကို ဒီအတိုင်းထားရင် ဒါမှမဟုတ် မသုံးတဲ့သူ၊ မလိုတဲ့သူဆီ သွားပေးထားရင်… ဥပမာ ကျွန်တော် ခုန ၁၅၀၀ ပေး စီးလာတဲ့ တက္ကစီသမားကို သွားပြောရင်… သူကလည်း ပိုပိုလေးကို သာမန် လူသားတယောက်လို့ပဲ သဘောထားရင် ဒါဟာ အချက်အလက်သက်သက်ပဲ၊ ရိုးရိုးဒေတာပဲ… ဟုတ်တယ်နော်…“

“အင်း…“

ပိုပိုက အင်းတလုံးလိုက်တယ်။ တကယ်ရော သဘောပေါက်ရဲ့လား မသိ။ ၁၅၀၀ တက္ကစီ… သူ့မှာ ရည်းစား ရှိ၊ မရှိ မေးခွန်း… အသုံးမတည့်သူကို ပေးရင် ဒေတာတဲ့… ထားပါတော့…။

“အဲ… ပိုပိုပြောတာတွေက ကျွန်တော့်အတွက်ကျတော့ တဆင့်မြင့်သွားပြီ။ ကျွန်တော်က အဲဒီဒေတာတွေကို သုံးမှာကိုး… ဒေတာကို သုံးတော့ အင်ဖော်မေးရှင်း ဖြစ်သဗျ။ ရှင်းသလား“

“ဟင်… ဘယ်ဒေတာတွေကို သုံးမှာလဲ။ ဘာလုပ်မှာလဲ“

“အမ်… ဘာမှ မလုပ်ဘူးလေ၊ ဒေတာနဲ့ အင်ဖော်မေးရှင်း ခြားနားတာကို ရှင်းပြတာလေ…။ သဘောပါရဲ့လား“

ဖြူစင်ရှင်းသန့်သူလေးက ကြောင်တိကြောင်တောင်… ပီဘိချစ်စရာလေး…. မိုးနတ်မင်းကြီးရေ… သားတော်ကြီးကို ကောင်းကောင်း စောင့်ရှောက်ပါပေတယ်၊ ကျေးဇူးကြီးပါပေတယ်။ ပိုပိုလေး ရှင်း၊ မရှင်းတော့ သူ့စိတ်ထဲ ကိုယ်လည်း ၀င်ကြည့်လို့ မရနိုင်တာမို့ ကိုကျော်လင်း သေချာ မသိနိုင်… သူကတော့ ကျိန်းသေပေါက် ရှင်းသွားပါတယ်လေ။ ရှင်းသန့် နတ်သမီးလေးမှာ ရည်းစား မရှိဘူးတဲ့…။

ကိုကျော်လင်းနဲ့ ပိုပိုတို့ ဒေတာနဲ့ အင်ဖော်မေးရှင်း ရှင်း၊ မရှင်း အငြင်းအခုံက နည်းနည်းညံသွားလို့လားတော့ မသိ၊ ငိုက်နေတဲ့ အကိုကြီး မျက်လုံးပြူးကြောင်လို့ သူတို့ နှစ်ယောက်ကို ကြည့်တယ်။ ခဏနေတော့ သူ့ဟာသူ ရှင်းသွားတဲ့ပုံနဲ့ ပြန်ငိုက်သွားပြန်တယ်။

ကိုကျော်လင်းကတော့ သူ့ဟာနဲ့သူ ကောင်းကောင်းကြီးကို ရှင်းလို့… အဲဒီလို ရှင်းလိုက်ရတာကိုလည်း အသံတွေ တုန်နေတဲ့ ကြားက ၀မ်းတွေသာလို့…။ ပိုပိုလေးကလည်း ဒီလူကြီး တခုခုတော့ တခုခုပဲ ဆိုတာကို ရိပ်မိသလိုလို ဖြစ်သွားပါပြီ… ရည်းစားဆိုတာကို တခါဖူးမှ မတခါဖူးရသေးတော့ ရိပ်မိသလိုလိုလောက်ပဲ ပိုပိုပြောနိုင်တာပေါ့။
++++

ခွင့်လွှတ်နော်

ဟေမာနေ၀င်းရဲ့ “ခွင့်လွှတ်နော်“ သီချင်းသံလေးက ပိုပို့အခန်းထဲမှာ ပျံ့လွင့်နေတယ်။ ကိုကို့ကိုလည်း သတိတွေရလို့… ညကျမှ တခေါက် တွေ့ရဦးမယ်။ နှစ်ယောက် နှစ်ကမ္ဘာ နှစ်နိုင်ငံ ခြားနေတော့ အချိန်တွေကလည်း နေ့တ၀က်လောက် ကွာနေလေတော့ ချစ်ရတာ ကိန္ဒရီ ချောင်းခြား… စိတ်ညစ်ဖို့ ကောင်းပါဘိ…။

စိတ်ညစ်နေတုန်းမှာပဲ စိတ်ကူးတွေကလည်း ရောက်ချင်ရာ ရောက်သွားပြန်တယ်။ ဒီလူကြီးတယောက် ဒီပြင့်ကောင်မလေးတွေနဲ့များ အကြည်ဆိုက်နေလေရော့သလား။ စကားပြောတတ်၊ စာသင်တတ်နဲ့ တပည့်မလေးတွေများ ထပ်များ ရနေလေရော့သလား။

ကိုကိုရေ… တူတူနေချင်လှပါပြီကော… တူတူနေရမှ ရင်ခွင်ထဲက မထွက်တမ်း ဖက်ထားလိုက်မယ်။ ကိုကိုသွားသမျှ လည်ဟီးခိုလို့ လိုက်မယ်၊ အပေါ့သွားရင်ကော… အို… ကိုရီးယားကားတွေထဲကလို ကျောကုန်းပေါ် ခွခုန်တက်ပြီး လိုက်မှာပေါ့။ ကြာလို့ ရိုးအီလို့များ “ဟာ… မင်းကလည်းကွာ… ခဏ ဝေးဝေးနေစမ်းပါလို့“ အော်ရဲဟစ်ကြည့်ပါလား… နှုတ်ခမ်းစူလို့ ခြေဆောင့်ပစ်လိုက်မှာပေါ့။

ဒီလူကြီး မျက်ရည်တွေကျအောင် အကြာကြီး မခေါ်လို့ ပစ်ထားလိုက်မှာပေါ့… နောက်ဆုံး ကုန်ကုန်ပြောမယ်… “ရှင့်ကို မချစ်ဘူးလို့“ အော်ကြီးဟစ်လိုက်မှာပေါ့လို့ ပိုပိုတယောက်ထဲ အတွေးခေါ်ရာနောက် လိုက်နေမိတယ်။တွေးရတာနဲ့တင် ပျော်ဖို့ကောင်းလိုက်တာ… သိပ်ချစ်တာပဲ ကိုကိုရယ်…၊ အို… ဟေမာနေ၀င်း အသံကလည်း ညံလိုက်တာ… သူချည်း ရှိနေတာ ကျနေတာပဲ။ ဘာတဲ့…။

“နှုတ်ခမ်းစူ မူတာ မိန်းကလေးတွေရဲ့ ရှေးရိုး အကျင့်စရိုက်လေးပါ“

၂၀၁၂ ဖေဖော်ဝါရီ ၅၊ နှစ်ချက်တီး တနင်္ဂနွေ။

ဘန်ကောက်။

Advertisements