မြင့်မောင်က နှုတ်ခမ်းကြီးကို စူထားလိုက်တယ်၊ သူတခုခုကို မကျေနပ်ရင် ဒါမှမဟုတ် လေးလေးနက်နက် စဉ်းစားစရာရှိရင် အဲဒီလိုမျိုး လုပ်တတ်တယ်။ အခုရော… စိတ်ဆိုးနေတာလား၊ စဉ်းစားနေတာလား။

ပြဿနာက သူက မျက်နှာတည်ကြီးနဲ့လည်း နေတတ်တယ်၊ တခါတခါတော့ ကွယ်လွန်သူ ရုပ်ရှင်မင်းသားကြီး ၀င်းဦးလိုလို အိုက်တင် လုပ်တတ်ပြန်သေးတယ်။ ဟန်ပန်က အစ လက်ကလေးပင့်၊ ကိုယ်လုံးလေး ၀င့်ပြီး လုပ်ပြတတ်တယ်။ စကားပြောရင်လည်း နည်းနည်းခေါချင်နေတဲ့ အပေါ်သွားတွေကို အပေါ်နှုတ်ခမ်းနဲ့ပဲ လုံအောင်ကာပြီး မပွင့်တပွင့် ပြောတတ်တော့ သူ့ကြည့်ရတာ ၀င်းဦးကို အတင်းကြီးရော အဓမ္မပါ တုပသလို ဖြစ်နေသေးတော့တယ်။

တခါ မြင့်မောင်က တကယ်တော့ ဘာကြောင့်မှန်း မသိပါဘဲ အင်္ဂလိပ် ပရီးမီးယားလိဂ်က ချယ်လ်ဆီးအသင်းကို အားပေးတယ်။ ပထမတော့ မော်ရင်ဟို မန်နေဂျာ လုပ်တုန်းက သဘောကျပြီး အားပေးခဲ့တာလို့ ပြောတတ်ပါတယ်။ နောက်တော့လည်း မော်ရင်ဟို မရှိပေမယ့်လည်း သူ ချယ်လ်ဆီးကိုပဲ ဆက်အားပေးနေတာပါ။

ချယ်လ်ဆီး ကစားသမားတွေက တွန်းတွန်းတိုက်တိုက် ကစားလို့များလား…။

အဲဒါက နှုတ်ခမ်းကြီး စူထားတဲ့ မြင့်မောင် စဉ်းစားနေတဲ့ အကြောင်းလား…။

မြင့်မောင်က အရပ်ကလန်ကလားနဲ့ ငယ်ငယ်ကတည်းက ဘောလုံးကန်ခဲ့တယ်၊ လူချတယ်၊ ကြမ်းတယ်။ သူကစားတာက အကွက်လည်း သိပ်တော့ မရှိပါဘူး။ ပြေးတယ်၊ ကန်တယ်၊ နင်းတယ်၊ ကျော်တယ်၊ အရပ်ရှည်တာကို အခွင့်အရေး အနေနဲ့ သုံးပြီး တွန်းတွန်းတိုက်တိုက် ကစားတာပါပဲ။ ဥာဏ်မပါပါဘူး… မလှပါဘူး။ အဲ… အဲဒီလို ကစားရတာကိုပဲ သူ့ဟာသူတော့ ပျော်နေတတ်တယ်။

အခုတော့ အသက်ကြီးလာတဲ့ မြင့်မောင်တယောက် နည်းနည်းပါးပါး ပြေးရလွှားရတာကိုပဲ မောတတ်နေပါပြီ၊ ဘောလုံးကန်ဖို့ ဆိုတာကတော့ ဝေလာဝေးပေါ့လေ…။ ဒါပေမဲ့ မြင့်မောင်က နည်းနည်းလည်တော့ ဘောလုံးပွဲ ကြည့်တာပေါ့… ဘောလုံးပွဲမှ သူက အင်္ဂလိပ် ပရီးမီးယားလိဂ်ကို ကြည့်ပါတယ်။

အားပေးတာကတော့ ခုန ပြောသလို တွန်းတွန်းတိုက်တိုက် ကစားတတ်တဲ့ ချယ်လ်ဆီးအသင်း… နည်းနည်းကြမ်းတဲ့ အသင်းပေါ့။ ပြီးတော့ အဲဒီ အသင်းက သူကြိုက်တဲ့ အရောင်ဖြစ်တဲ့ အပြာရောင် အင်္ကျီဝတ်ပြီး ကစားကြတယ်။

မြင့်မောင်က နှုတ်ခမ်းကြီး စူထားဆဲပါပဲ… တခုခုကို မကျေနပ်နေပုံတော့ ရပါတယ်။ လူတွေဟာ ပျော်နေချိန်မှာ မပြုံးတောင် ကြည့်ပျော် ရှုပျော် ရုပ်ခံရှိတတ်ကြတယ်မို့လား၊ အခုက နှုတ်ခမ်းကြီး ထော်လို့ စူထားတော့ မြင့်မောင် ပျော်နေတာ မဟုတ်ဘူး ဆိုတာကတော့ သိသာပါတယ်။

ရုပ်ကလည်း နဂိုကထဲကမှ ကြည့်ကောင်းလှတဲ့သူ မဟုတ်တော့ မြင်ယောင်သာ ကြည့်လိုက်စမ်းပါဗျာ… ဘယ်လိုမှ မလှတဲ့ရုပ်… သနားစရာ ကုလားမသာလို့တောင် ပြောလို့ မရပါဘူး။

သူ စဉ်းစားနေတာကတော့ စိတ်ဝင်စားဖို့ ကောင်းပါတယ်။ ဘာတဲ့… ဘောလုံး ဖျောက်ပြီး လူတွေ တွန်းတွန်းတိုက်တိုက် လုပ်နေကြတာ ဘာကြောင့်လဲဆိုလား။

ဘောလုံးကွင်းဆိုတဲ့ သတ်မှတ်စည်းကမ်းနဲ့ သတ်မှတ်ဧရိယာရှိတဲ့ နေရာတခုမှာ ဘောလုံးဆိုတဲ့ မြင်သာတဲ့ အရာတခုကို အားထုတ်မှုရှိတဲ့ ပြေးလွှား လုယူမှု ပေါင်းထည့်ပြီး ရည်ရွယ်ချက်ဆိုတဲ့ ဂိုးထဲရောက်အောင် (ဒါမှမဟုတ် မရောက်အောင် မ၀င်အောင်) ခြေညီ အားညီ ကြိုးစားနေကြတာကို ဘောလုံး ဖျောက်ကြည့်လိုက်တော့ ဘယ်လို ဖြစ်သွားမလဲဆိုတာ…။

နည်းနည်းတော့ ဂေါက်ပါတယ်ဆိုတာကတော့ အထူး ပြောစရာတောင် မလိုတော့ပါဘူး။ ဒါပေမဲ့ တချို့နေရာတွေမှာ တချို့အချိန်တွေမှာ တချို့ လူတွေဟာ အဲဒီလို တွန်းတွန်းတိုက်တိုက် လုပ်နေကြသလားလို့ မြင့်မောင်က စဉ်းစားတာ…။

အလဲ့… တယ်ဟုတ်ပါလားလို့တော့ အတွေးမစော၊ အချီးကျူး မစောလိုက်ပါနဲ့…။ သူ စဉ်းစားတာက ဟုတ်မလိုလိုနဲ့ မဟုတ်ပါဘူး။ တကွက် လိုနေပါသေးတယ်။

တွန်းတယ် တိုက်တယ် ဆိုတာက ဘောလုံးကစားနည်း တခုတည်းမှာမှ ရှိတာမှ မဟုတ်တာလေ… ဒီတချက်ကို မြင့်မောင် ချော်တွေးနေတာက ပြဿနာတခုပါ။ သူ့မှာက ဘောလုံးအတွေ့အကြုံလောက်သာ ခိုင်ခိုင်မာမာ ရှိနေတာကိုး…။

တချို့ကိစ္စတွေက ဘောလုံးပွဲမှ မဟုတ်တာ…။

ဒီနေရာမှာ တွန်းတွန်းတိုက်တိုက်ဆိုတဲ့ စကားလုံးကိုယ်၌ကိုက စိတ်ဝင်စားဖို့ မကောင်းဘူးလားဗျာ။

တွန်းတယ်… ရွေ့အောင်လုပ်တာ၊ ဖယ်ပစ်တာ၊ သူများကို ဒုက္ခရောက်အောင်လုပ်တာ၊ အားထည့်လုပ်တာ… ဒီလိုတွေ ရှိတယ်မဟုတ်လား။

တိုက်တယ်ဆိုတာကတော့ ရှင်းပါတယ်။ တိုက်ခိုက်တာ၊ ထိုးတာ၊ တွန်းပစ်တာ၊ မညီညွတ်အောင်လုပ်တာ၊ ဒုက္ခပေးတာ၊ တည့်တည့်တိုးတာ ဆိုတော့ နည်းနည်းတော့ ပြင်းထန်တဲ့ အဓိပ္ပာယ်တွေ ရှိနေတာပေါ့လေ။

တကယ်တော့ မြင့်မောင်က တွန်းတွန်းတိုက်တိုက် ဆိုတာကို ကစားတာမှာ ကြိုက်ခဲ့သူပဲ… ဒါဆို ဘယ်အရာမှာ မကြိုက်တာလဲ…။

ဝင်းဦးနဲ့တူအောင် တခါတခါ လုပ်တတ် ပြောတတ်တဲ့ မြင့်မောင်ကတော့ နှုတ်ခမ်းကြီးကို စူထားဆဲပါပဲ…။

ဘယ်လိုမှ ကြည့်လို့ မကောင်းပုံများလေ…။

ပြချင်လိုက်တာဗျာ…။

၂၀၁၁ ခုနှစ် နိုဝင်ဘာလ ၁ ရက်။
မနက် ၁ နာရီ၊ ဘန်ကောက်။

Advertisements