အလုပ်သဘောအရ နာမည်တစ်ခု ရွေးချယ်ပိုင်ဆိုင်ဖို့ လိုအပ်လာသောအခါ (အခွင့်ရှိလာသောအခါ) ကျွန်တော်က “ချို“ဆိုတဲ့ နာမည်လေး ရွေးချယ် ဖြစ်ပါတယ်။

လူ့သဘောအရ ကိုယ့်မှာ မရှိတဲ့ လိုအပ်ချက်၊ ဒါမှမဟုတ် ကိုယ့်မှာရှိတဲ့ အားသာချက်ကို လိုချင်ကြ၊ ကြွားဝါချင်ကြတဲ့ သဘောတရားအတိုင်း ကျွန်တော့်မှာရှိတဲ့ လိုအပ်ချက်နဲ့ အားသာချက် နှစ်ခုလုံးကို ရှာလိုက်တဲ့အခါ “ချို“ဆိုတာကို တွေ့လိုက်ရပါတယ်။ ဒီလူနဲ့ ဒီနာမည် အံကျဖြစ်ဖို့ကလည်း လိုအပ်တာကိုးဗျ၊ နော်။

၁။ ချို (ဂျို) -န- ကျွဲ၊ နွား၊ သမင်၊ ဒရယ် စသည်တို့၏ ဦးခေါင်း၌ပေါက်သည့် မာသော အချွန်အတက်
(ဟုတ်လောက်သည်၊ ကျွန်တော်က အစပိုင်း လည်သလိုလိုနှင့် အဆုံးသတ် ခံလိုက်ရတာ များသည်၊ ချိုပါရင် ငတုံးလို့ လူတိုင်း နားလည် ထားကြတယ် မဟုတ်လား၊ တစ်ချက်တော့ ကိုက်ညီသွားပြီ)
ှိ
၂။ ချို -နာဝိ- ထန်းလျက်၊ သကြားတို့၏ အရသာမျိုးရှိသော၊ သာယာနာပျော်ဖွယ်ဖြစ်သော၊ ကြည်လင်ရွှင်ပြသော (ဒါကတော့ ကိုယ့်ဘာသာကိုယ်တော့ သိပ်ဟုတ်တာပေါ့ဆိုပြီး လုပ်လို့မဖြစ်၊ ပရိသတ်ကြီးက ဆုံးဖြတ်မှရမယ့်ကိစ္စလို့ပဲ ထားရမှာပါ့။ ဒါပေမဲ့ ကိုယ့်ကိုယ်ကိုယ် ယုံကြည်မှုရှိရင် ပြီးတာပဲ မဟုတ်လား ကျောင်းအမရာ…)

၃။ ချို -ကြိ- လျော့နည်းသည်
(ဒါကတော့ သေချာတယ်၊ ကိုယ့်မှာက လိုအပ်ချက်တွေ အားနည်းချက်တွေ အများကြီး ရှိသေးတယ်။ ဒါကို ကိုယ်တိုင်လည်း သိတယ်၊ မိဘ ဆရာသမားများနဲ့ မိတ်ဆွေ သူငယ်ချင်းတွေကလည်း သိကြတယ်။ တချို့က သိရုံတင်မကဘဲ လမ်းညွှန် ထောက်ပြ ပေးကြတယ်၊ သတိပေး ဆုံးမကြတယ်။ ဒါကို ကျေးဇူးအနန္တ တင်ရတယ်)

ဒီတော့ ကျွန်တော်နဲ့ ဒီ “ချို“ ဆိုတဲ့ နာမည်နဲ့ မလိုက်လို့ ဘယ်သူနဲ့ လိုက်ဖို့ ရှိဦးမှာလဲ။ ဒါပေမဲ့ “ချို“ တစ်လုံးတည်း ဆိုရင်တော့ မိန်းမ ဆန်သွားလိမ့်မယ်၊ ဒီတော့ ချို ရှေ့ကနေ “ကို“ ကို ထည့်လိုက်တယ်။ ကာရန်လည်း ညီသွားတာပေါ့။

နောက်တစ်ခုက “ကို“ ရဲ့အဓိပ္ပာယ်ကလည်း ကို -စည်း- ယဉ်ကျေးသောအားဖြင့် ယောက်ျားအမည်ရှေ့က တပ်သုံးသော စကားလုံး၊

နာမည်ပေးပုံ ရွေးပုံလေးက မသင်းဘူးလားဗျာ ဘုရားဒကာတို့…။

နာမည် ကိုချို၊

လူက လူပျို၊

အလုပ်က ရေဒီယို၊

တခုတ်တရ အမူပို၊

မဟုတ်က သူဆို ခုတ်ကြဟူလို…။

ဒီတော့ သူကောင်းသား (သှဂေါင်းသှားလို့ ဖတ်ပါရင် ကျွန်တော် ကိုချိုဟာ “မျိုးရိုးအကျင့် သိက္ခာ ကောင်းမွန်သူ“ ဖြစ်ပါမယ်၊ မတော်လို့ လူကြီးမင်းက သဂေါင့်သား လို့ ဖတ်ခဲ့ရင်တော့ ကျွန်တော်ဟာ “တစ်စုံတစ်ဦးကို ဂုဏ်တင်သယောင် ငေါ့၍ပြောသော စကားပြောခံရသူ“ ဖြစ်ပါမယ်) ကျွန်တော် ကိုချိုကို လူကြီးမင်းတို့ ဘ၀င်မှာ ဘယ်လို ဆုံးဖြတ် ထင်မြင်ကြပါသလဲ ခင်ဗျာ။ ကျွန်တော် ကိုချို တကယ် ချိုပါရဲ့လား။

ဒီတော့ တောင်းဆိုချင်တာက

ကျွန်တော် ကိုချို

နှုတ်မှုစကား

လုပ်ကိုင်အသွား

တွေးဆမြော်မြင်

ယဉ်ယဉ်စရာ

ထင်မြင်ပါမူ

သှဂေါင်းသှား လို့ ခေါ်ချင်ခေါ်လေ၊

ထိုနည်းမဟုတ်

တလွဲမာန်ဝင်

မြင်မြင်သမျှ

တတ်သိထင်မှတ်

စကားပိုဆို

ဆောင့်ကြွားမူပို

သူ့နားမထောင်

ကင်းကွာလူ့စည်း

လူမိုက်ကြီးဟု

ပိုင်းဖြတ်ဥာဏ်ထင်

ရှိပါလေရင် သဂေါင့်သားလို့ ခေါ်ပါလေ။

ကျွန်တော်ကတော့

စွမ်းသလောက်မောင်

ချိုမြဲချိုနေ ချိုနေစေဖို့ ဓိဋ္ဌာန်ပြုတယ်လေ…ချို ချို ချို ချိုချင်သလောက်ချို…။

ထို့ပြင်တ၀ မောင်ကလွန်သော်

အဖေချိုဖို့ အမေချိုတို့

ဆရာမိတ်များ ဘိုးဘွားမကျန်

ဆွေမျိုးအပါ လူတကာတို့

ချင်းချင်းမေတ္တာ ဝေငှနိုင်စေ မျှကြစေဖို့

ချိုပါစေကြောင်း သာကြစေကြောင်း

မောင်ဆုတောင်းသည် ချိုသကာတို့ ဖုံးစေသော်…

ဖုံးတိုင်မက နှလုံးပီတိ ဂွမ်းဆီထိတိုင် ပြိုင်စေသော်…။

၂၀၁၀ ပြည့်နှစ်၊ သြဂုတ်လ ၆ ရက်။ နံနက် ၁၀ နာရီ။