ပန်ချာပီ

“ပန်ချာပီ“

“ဘုရာ့“

“ပဲဟင်း ဘယ်လို ချက်လဲကွ“
ွ
“ကုလားပဲချက်မလား၊ ပဲစင်းငုံချက်မလား၊ ပဲဝါလေးချက်မလား… ပဲရွေးရမယ် ဘုရား၊ ပဲ အမျိုးအစား ရွေးချယ်ပြီးရင် စားမယ့်သူ အရေအတွက်နဲ့ ပဲကိုယူ၊ အမှိုက်နဲ့ ခဲ စင်အောင် ပဲရွေး၊ ပြီးရင် ပဲကို ရေဆေးရပါမယ်ဘုရား၊ ပြီးတော့ ရေ အလောတော် ထည့်ပြီး မီးဖိုပေါ်တည်၊ ပွက်လောက်ရင် မဝေခင် အိုးဖုံးဖွင့် မွှေပေး၊ ပဲနူးနပ်တဲ့ အထိ စောင့်ပြီး ဆီသတ်လိုက်တဲ့အခါ ပဲဟင်း ရပါတယ်ဘုရား“

“အေးဟေ့..မင်းဟာက အလွယ်သားပါလား၊ အချိန်ကော ဘယ်လောက် ကြာသလဲကွ“

“ပဲပေါ်မူတည်ပြီး မီးကောင်းရင်တော့ နာရီဝက် တစ်နာရီအတွင်း ပဲဟင်းတစ်ခွက် ရပါပြီဘုရား“

“မင်းဟာက ပဲကုလားဟင်းတော့ မဟုတ်ဘူးကွ၊ အသီးအရွက်တွေ မထည့်ဘူးလားကွ“

“တပည့်တော်ဆိုရင်တော့ ပဲချည်းသက်သက်ချက်တဲ့ အလွတ်ကို ကြိုက်တယ်ဘုရား၊ တပည့်တော်ညီနဲ့ အိမ်ကတော့ သီးစုံပဲကုလားဟင်းလို အသီးအရွက်တွေ ထည့်တာကို ကြိုက်တယ်ဘုရာ့“

“အေး…ဒါဆို အသီးအရွက် ဘယ်အချိန် ထည့်သလဲကွ“

“ပဲချည်းသက်သက် ပြုတ်တဲ့အခါ ဆူပွက်လာပြီး ပဲနူးချိန်မှာ လှီးချွတ် ရေဆေးထားတဲ့ အာလူး၊ ခရမ်းသီး၊ ပန်းဂေါ်ဖီ၊ ပဲသီး၊ ဒန့်သလွန်သီး၊ ရုံးပတီသီး ကြိုက်ရာ ထည့်လို့ ရပါတယ်ဘုရား။ ပဲသီးတို့၊ ရုံးပတီသီးတို့က ပဲအိုးဆီသတ်ခါနီးမှ ကပ်ထည့်ရင် ရတယ်ဘုရား“

“အေးကွ၊ မင်းက တော်တော် ချက်တတ်တာပဲ၊ အသားဟင်းတွေရော ချက်တတ်လားကွ“

“ချက်တတ်ပါတယ် ဘုရား“

“အေး အေး၊ မင်းတို့ ညီအစ်ကိုတွေ တယ်တော်ပါလားဟေ့၊ မင်းညီက ပိုတောင် တတ်သေးကွ၊ ငါ့ ပဲဟင်းချက်ကပ်ဖို့တောင် လုပ်သေးတာ ဒီကောင်…“

ဒါတွေက ကိုယ်တို့ ကိုးကွယ်တဲ့ ဆရာတော်ဘုရားကြီး နေ့ဆွမ်း ဘုဉ်းပေးပြီး၊ ခဏနားပြီးနောက်မှာ ဆရာတော်ကြီးက ခိုင်းလို့ ၀တ်ဖြည့်ရင်း (၀တ်ဖြည့်=ရဟန်း သံဃာတော်များကို ခြေဆုပ် လက်နယ် ပြုသည်) ဆရာတော်ကြီးက မေးလို့ ပြန်ဖြေနေတာတွေ ရေးပြခဲ့တာပါ။

ဆရာတော်ကြီးက ကျောင်းနေ ကျောင်းသားတွေထဲက ကိုယ်တို့ ညီအစ်ကိုနှစ်ယောက်ကို ပန်ချာပီလေးတွေကို ခေါ်ပါတယ်။ ကိုယ်တို့ကလည်း ပန်ချာပီသွေး ပါနေတာကိုး။ ဒီတော့ ဘုန်းကြီးကျောင်းသွားရင် ကိုယ်တို့ညီအစ်ကိုဟာ ပန်ချာပီလေးတွေ ဖြစ်သွားပြီး၊ ဆစ်ခ်ဘုရားကျောင်းသွားရင်တော့ ဗမာလေးတွေ ဖြစ်သွားပြန်ပါတယ်။ ဒါတောင် မွန်ကျောင်း မသွားလို့…အဖြစ်က ဒီလို…။

******

“ကုလားလေးတွေ လာတယ်ဟေ့“

ဒါက အဖေ့ညီ ဦးလေးတစ်ယောက်က လှမ်းအော်ပြောလိုက်တာပါ။ ကိုယ့်အဖေက သူ့အမေ ကိုယ့်အဖွားအိမ်ကို လွှတ်လိုက်တာ ဖြစ်ပါတယ်။

“ကြီးဥ..နေကောင်းလား၊ အဖေလွှတ်လိုက်တာ၊ ငံပြာရည်နည်းနည်း ပေးလိုက်ပါ“တဲ့။

ဒါက ကြီးတော် အပျိုကြီးနှစ်ယောက်ထဲက အကြီးဖြစ်တဲ့ ကြီးဥကို တွေ့တော့ အဖုံးပါတဲ့ ကြွေရေသုတ်ခွက်လေး ကိုင်ရင်း ခပ်ရွံ့ရွံ့ လှမ်းပြောလိုက်တာပါ။

တကယ်တော့ အဖေတောင်းခိုင်းလိုက်တာ ငံပြာရည်ထက် ပိုတယ်ဆိုတာကို ကိုယ်သိနေပါတယ်။ ကိုယ်တောင်သိနေရင် ကိုယ့်ထက် အသက်ကြီးတဲ့သူတွေက ပိုလို့တောင် သိကြမှာပေါ့။

(ကိုယ်က ရန်ကုန်သားဆိုတော့ အဖေ၊ အမေကလည်း သေချာ မပြောထားတော့ အဖေနဲ့ အမေဘက်က ဆွေမျိုးတွေကို ဦးလေး၊ အဒေါ်၊ အရီး၊ ဘကြီး မခွဲတတ်၊ မခေါ်တတ်ဘူး ခင်ဗျ၊ နည်းနည်းကြီးမှ အဖေ့ အစ်ကိုဆို ဘကြီး၊ အဖေ့ညီဆို ဘထွေး၊ အဖေ့အစ်မ ဒါမှမဟုတ် နှမဆိုရင် အရီး ဒီလိုခေါ်ရမှာကိုး၊ ဒီလိုပဲ အမေ့ အစ်ကို ဒါမှမဟုတ် မောင်ဆိုရင် ဦးကြီး ဒါမှမဟုတ် ဦးလေး၊ အမေ့အစ်မဆိုမှ ဒေါ်ကြီး၊ ကြီးဒေါ်၊ အမေ့ညီမဆိုမှ ဒေါ်လေး၊ ဒီလိုခေါ်ရမှာကိုး)

“အမေ..မောင်မျိုးညွန့် သားနှစ်ကောင် လာတာ၊ ငံပြာရည် တောင်းခိုင်းလိုက်လို့တဲ့“။ ကြီးဒေါ် (နှုတ်ကျိုးနေပြီ၊ သိလည်း အရီးခေါ်မှာတော့ မဟုတ်ပါဘူး၊ မှားမှန်းသိရက်နဲ့ တောကျတယ် ထင်မှာစိုးလို့ ခေါ်ပါ့မလားလို့ အခု စာရေးရင်း တွေးမိတယ်၊ အခုတော့ တောကျတယ်လို့ မထင်တော့ပါ။ ဒီအညာလေတွေက တယ်လည်း ယဉ်ကျေးသကိုးဗျ)က သူ့အမေ ကိုယ့်အဖွားကို လှမ်းပြောလိုက်တယ်။

“အေးအေး၊ ထည့်ပေးလိုက်လေ၊ ၀က်သားဟင်းလည်း ရှိတယ်မို့လား။ ထည့်ပေးလိုက် တစ်ခွက်၊ မောင်မျိုးညွန့်က ၀က်သားဟင်း ကြိုက်တယ်“

“ဟုတ်ကဲ့ အမေ“

တကယ် ထိုင်ရာက ထပြီးထည့်ပေးတာက အဖေ့အစ်မ နောက်တစ်ယောက် အပျိုကြီးအငယ် ကြီးမြ။ အငယ်ဆိုတော့ သူက လုပ်ပေးရတာပေါ့။ သူတို့သား သူတို့မောင် ကိုယ့်အဖေကိုတော့ တော်တော် ချစ်ပုံရတယ်။ တကယ်တော့ အဖွားနေတဲ့ အိမ်ကို အိမ်ထောင်ဦးစီးလုပ်နေတာက ကြီးဥနဲ့ ကြီးမြ… အပျိုကြီး နှစ်ယောက်၊ အိမ်နဲ့ မလှမ်းမကမ်းက လမ်းပေါ်က ပျံကျဈေးမှာ ငရုတ်သီးမှုန့်၊ ဆနွင်းမှုန့်၊ ကြက်သွန်၊ အာလူး အခြောက်အခြမ်းလေးတွေ ဆိုင်ခင်း ရောင်းကြတယ်။

အဲဒီမှာ ကိုယ်တို့ ၃၊ ၄ တန်းအရွယ် ငယ်ငယ်က ငရုတ်သီးမှုန့်တို့၊ ဆနွင်းမှုန့်တို့ သွားဝယ်ရင် ကြီးဒေါ်တွေက မပေးနဲ့၊ မင်းတို့ မုန့်ဝယ်စားကြ ဆိုပြီး မယူကြဘူး။ ဒါပေမဲ့ အမေက သူများပစ္စည်း အလကားယူတာ မကြိုက်တော့ မုန့်ဖိုးလိုချင်ပေမယ့် ခဏခဏ သွားမ၀ယ်ရဲပြန်ဘူး။

ဆက်ရရင် အပျိုကြီးတွေ သူတို့ပိုက်ဆံသူတို့ ရှာနိုင်ပေမယ့် သူတို့အမေ မုဆိုးမ ကျွန်တော့်အဖွားရဲ့ ဆိုဆုံးမမှုအောက်မှာ ငြိမ်ငြိမ်ဝပ်ဝပ်ရှိကြတယ်။ တစ်ခါတလေ အခါကြီးရက်ကြီးတွေမှာ အလှူအတန်း လုပ်ကြတယ်။ နတ်ကလည်း အိမ်ရှေ့တည့်တည့်က နတ်စင်မှာ တစ်ခါတခါ ကကြသေးတယ်။

ကိုယ်တို့ငယ်ငယ်က နတ်ဒိုးတွေ နားထောင်၊ အရက်တွေ ကြက်တွေပါတဲ့ နတ်ကတာတွေကြည့်ပြီး မုန့်ဆီကြော် အဖြူ အနီတွေ စားရတာတော့ မှတ်မိနေသေးတယ်။ ၂ ရက်၊ ၃ ရက် ကကြတာကိုး…အဖေ့ညီ နောက်တစ်ယောက် ဦးလေးအငယ်တို့အဖွဲ့ဆို နတ်ဝင်ကတယ် ထင်တယ်၊ သေချာတော့ မမှတ်မိတော့ဘူး။

အဖေ့ညီ ကိုယ်တို့ဦးလေးက ခြေဆံလက်ဆံရှည်ပြီး မျက်လုံး မျက်ခုံးကောင်းတဲ့ ကိုယ်တို့ ညီအစ်ကိုနှစ်ယောက်ကို ကုလားလေးတွေလို့ ခေါ်တော့ ညီလေး စိတ်ထဲတော့ ဘယ်လိုနေတယ်မသိ၊ ကိုယ်ကတော့ ကိုယ့်ကို ကုလားလို့ခေါ်ရင် နည်းနည်းမှ မကြိုက်။ ငါ ကုလားမဟုတ်ဘူးလို့ချည်း တွေးနေမိတတ်တာ။

အခုအကွက်ကတော့ အဖေ့အကွက်မို့ အဖေ့သားဖြစ်တဲ့ ကိုယ်လည်း ခံလိုက်ရတာပေါ့။ မတတ်နိုင်ဘူးပေပဲ။ အဖေဟာ အစားကောင်းကြိုက်တယ်၊ ဖြစ်သလို မစားနိုင်ဘူး။ အမေကတော့ ဖြစ်သလို စားနိုင်တယ်။ သူများဆီက တောင်းမှ စားရတာမျိုးကို မကြိုက်ဘူး။ ဒါပေမဲ့ အိမ်ထောင်ဦးစီးဖြစ်တဲ့ အဖေက အလုပ်အကိုင် အတည်တကျမရှိတော့ အမေ ကြံဖန်ထားတဲ့ အစားအသောက်ကို မစားနိုင်၊ ဒီတော့ အဖေက သူ တစ်ယောက်တည်း လမ်းလျှောက်သလို ဘာလိုလုပ်ပြီး သူ့အမေအိမ် အ၀ သွားစားလိုက်တာပါပဲ။ သူ့အကွက်နဲ့သူတော့ လှနေတာပေါ့။

နောက်ပိုင်းကျတော့ အမေ့အိမ် အစ်မတွေဆီလည်း စားရတာရှက်လို့လား၊ သူသွားစားရင် သူတစ်ယောက်တည်းစားရမယ်။ သားကို လွှတ်ပြီးတောင်းခိုင်းလိုက်ရင် သူရော သားနှစ်ယောက်ရော စားရမယ်လို့ တွေးသလား မသိ။ ကိုယ်က အခုပြန်စဉ်းစားလည်း သေချာတော့ မသိပါဘူး။ ကိုယ်သိတာကတော့ ငယ်ငယ်ကထဲက အဲဒီလို သွားမတောင်းချင်ဘူး။

တောင်းရတာ အောက်ကျတယ်။ အမျိုးဆီကပဲ တောင်းတောင်း၊ ဘယ်သူ့ဆီကပဲ တောင်းတောင်း တောင်းရတာ မကောင်းဘူး။ ပေးရတာက ကောင်းတယ်။ တောင်းတဲ့အခါမှာလည်း ကျေးဇူးက ရှိသွားပြီ။ ခဏနေလို့ ကိုယ်က သဘောရိုးနဲ့ပဲမေ့မေ့၊ ဘ၀မြင့်လို့ပဲ(ဘ၀င်မြင့်လို့ပဲ)မေ့မေ့ ကိုယ့်က မေ့သွားတဲ့အခါ ငွေကြေး ဒါမှမဟုတ် တစုံတရာ အကူအညီပေးခဲ့ဖူးသူက ရယ်လိမ့်မယ်၊ ပြောလိမ့်မယ်။ ဟား ဟား…ဒီကောင်(မ) ငါ ကူညီခဲ့တဲ့ကောင်(မ)ပါလို့ ပြောတတ်ကြတယ်။

အမေကတော့ မာနကြီးတယ်။ အဖေ သူ့ဘာသာသူ တစ်ယောက်တည်း သူ့အမေအိမ် သွားစားတာလည်း မကြိုက်ဘူး။ သားတွေကို သွားတောင်းခိုင်းတာလည်း မကြိုက်ဘူး။ နောက်ပြီး ဘာပဲပါလာလာ သူဘယ်တော့မှ မစားဘူး။ ကိုယ်တို့ကတော့ ကလေးဆိုတော့ တောင်းရတာ အလွန်ရှက်ပေမယ့် စားရတာတော့ အလွန် သဘောကျတယ်။ အထူးသဖြင့် အဖေ့အစ်မတွေက ဟင်းချက်ကောင်းတော့ သူတို့ ဘာချက်ချက် စားလို့ကောင်းနေတာပေါ့။

နောက်ဘိတ်ဆုံး ဟင်းက မရှိတော့လို့ပဲဖြစ်ဖြစ်၊ သူတို့မောင် ကိုယ့်အဖေ မကြိုက်တဲ့ဟင်းဖြစ်နေလို့ပဲဖြစ်ဖြစ် ရာဝင်အိုးလေးတွေနဲ့ စိမ်ထားတဲ့ တညင်း(ဒညင်း)သီး ဆားရေစိမ်တော့ ပေးလိုက်တတ်တယ်။ ငါးခြောက်ကြော်လေး ထည့်ပေးလိုက်တတ်တယ်။

တခါ နောက် ဦးလေးတစ်ယောက် (အဖေတို့က သားချင်း များတယ်၊ အမျိုးနဲ့ပဲ ရွာတည်ခဲ့ပါတယ်။ အောက်ဘက်မှာ ရေးပြပါမယ်။ အဖေပြောပြလို့ မှတ်သားဖူးတာကတော့ အဖေ့အမေ ကိုယ့်အဖွားဟာ ကိုယ်ဝန် ၂၂ ခါ ဆောင်ပြီး၊ ကလေး ၁၇ ယောက် အဖတ် တင်သတဲ့) ရဲ့မိန်းမ အဖွားချွေးမတစ်ယောက်က ဘိတ်သူ(မြိတ်သူ) ဆိုတော့ သူမှာပေးလို့ ဘိတ်ကလာတဲ့ ငံပြာရည်ထင်ပါရဲ့။ အဖွားအိမ်က ငံပြာရည်က သိပ်ကောင်းတာပဲ။ ဒီအတိုင်း ထမင်းနဲ့ချည်း နယ်စားတာတောင် စားလို့ရတယ်၊ အရသာရှိနေတယ်။

ဘယ်လိုပဲဖြစ်ဖြစ် စားရသောက်ရပေမယ့် ကုလားလေးတွေလို့ အဖေ့ညီ ကိုယ်တို့ဦးလေး လုပ်သူက စ နောက် ခေါ်တာကိုတော့ ဘယ်လိုမှ မကြိုက်ခဲ့ပါ။ တစ်ခါတလေ မျက်ရည်တောင် ၀ဲမိပါရဲ့။ အဖွားအိမ်ကို ကိုယ်တစ်ယောက်တည်း မသွားရဲလို့၊ သွားရမှာ ရှက်လို့ အဖော်လိုက်ပေးတဲ့ ညီလေးကတော့ ဘယ်လို ခံစားရလဲ မသိ။ သူလည်း ခံစားကောင်း ခံစားရမှာပဲလေ။

ပန်ချာပီလေးတွေ…

ဒါနဲ့ ကိုယ်တို့ ဇာစ်မြစ်ကို ပြန်စစ်ကြည့်တော့ အမေ့အဖေ ကိုယ့်အဖိုးဟာ ဒုတိယကမ္ဘာစစ်ကာလ လွန်ခဲ့တဲ့ နှစ်ပေါင်း ၆၀ ကျော်၊ ၇၀ နီးပါးက အင်္ဂလိပ် သိမ်းထားတဲ့ မြန်မာနိုင်ငံအောက်ပိုင်းကို ကုန်သည်အလုပ်နဲ့ စီးပွားရှာဖို့ ရောက်လာခဲ့တယ်။

အခုပါကစ္စတန်၊ အိန္ဒိယ နှစ်နိုင်ငံလုံးမှာ နယ်မြေတွေ ပါနေတဲ့ ပန်ဂျပ်ပြည်ကနေ ကိုယ့်လက်ရှိအသက်အရွယ် (အသက် ၃၀ ကျော်) လောက်မှာ အဖိုးဟာ ဆန်ရေစပါး၊ ကောက်ပဲသီးနှံ၊ ကျွန်းသစ်၊ ရေနံ ပေါကြွယ်ဝတယ်ဆိုတဲ့ မြန်မာနိုင်ငံကို စီးပွားရှာဖို့ စွန့်စားထွက်လာခဲ့တယ်။ အဖိုးငယ်ငယ်ကတော့ ကိုယ်တို့ စာမကျက်ရင် သူ့အကြောင်း ပြောပြတတ်တယ်။

“မင်းတို့ တော်တော်ညံ့တာပဲ။ မင်းတို့အရွယ်က ငါ နိုင်ငံခြားသွားဖို့၊ ပိုက်ဆံရှာဖို့ စဉ်းစားနေပြီ“တဲ့။ အဖိုးပြောတာပါ။

“ငါ ဒီကိုလာတော့ (ဗမာ) စကားလည်း မတတ်ဘူး၊ စာလည်း မတတ်ဘူး၊ အလုပ်ပဲ လုပ်တတ်တယ်“

အဲဒီတုန်းက အဖိုးမျက်နှာကို ကိုယ် ကြည့်ကြည့်တယ်။ အဖိုး မျက်ရည်လဲ့နေတယ်၊ မျက်နှာရဲနေတယ်။ ကိုယ်တို့ ညီအစ်ကိုအပေါ်မှာ အားမလိုအားမရဖြစ်တဲ့ စိတ်တွေ ကြီးစိုးနေတဲ့ အဖိုးမျက်နှာကြီးကို ကြည့်ရတာ ကိုယ်တော့ ရှက်နေခဲ့တယ်။

အဖိုးက သူပိုင်တဲ့ နွားတွေ မောင်းချလာခဲ့တယ်လို့ ပြောတယ်။ အဖိုးဟာ ဒီဘက်ကို ထွက်မလာခင်ကတည်းက ပန်ဂျပ်မှာ အလုပ်တွေ လုပ်နေပြီ။ သူပိုင်တဲ့ စီးပွား ဥစ္စာရှိနေပြီလို့ ဆိုတယ်။ မင်းတို့က အလကားပဲလို့ ကိုယ်တို့ကို ဆူတယ်။

အသက် ၄ နှစ်ခွဲ ၅ နှစ် အရွယ်က ပန်ဂျပ်မှာရှိတဲ့ အဖိုးရဲ့မိဘအိမ်ကို အလည်ရောက်ဖူးတဲ့ အမေကတော့ အဖိုးတို့ မိသားစုဟာ စည်းကမ်းကြီးတယ်၊ ချမ်းသာတယ်၊ အဲဒီနယ်က အုပ်ချုပ်သူ လူတန်းစားထဲ ပါတယ်လို့ သူ မှတ်မိတဲ့အကြောင်း ကိုယ့်ကို ပြောပြဖူးတယ်။

ပန်ဂျပ်ပြည်ဟာ အလွန်ကြီးမားတဲ့ ပြည်ကြီးတစ်ခုဖြစ်တယ်။ အခုတော့ ပါကစ္စတန်နိုင်ငံထဲ နယ်မြေတော်တော်များများပါနေပြီး တချို့အစိတ်အပိုင်းက အိန္ဒိယနိုင်ငံ ထဲရောက်နေတယ်။ ဗြိတိသျှဆီကနေ လွတ်လပ်ရေးရတဲ့အချိန်မှာ အိန္ဒိယနဲ့ ပါကစ္စတန် နယ်မြေတွေ ခွဲဝေယူတော့ ပန်ဂျပ်လည်း အဲဒီလို ကွဲသွားတာပဲ။

ကိုယ် အခု ပြန်ဖတ်ကြည့်တော့ ပန်ချာပီဆိုတာက ပန်ဂျပ်ပြည်မှာ နေတဲ့ မွေးတဲ့ လူမျိုးဖြစ်တယ်။ ဘာသာကတော့ ဟိန္ဒူအယူ ယူရင် ဟိန္ဒူပန်ချာပီ၊ ပါကစ္စတန်ထဲ နေပြီး အစ္စလာမ်ဘာသာ ကိုးကွယ်ရင်တော့ မွတ်ဆလင်ပန်ချာပီ၊ ခရစ်ယာန်ကို ယုံကြည်ရင် ခရစ်ယာန်ပန်ချာပီ၊ ဗုဒ္ဓဘာသာကို ယုံကြည်ရင် ဗုဒ္ဓဘာသာပန်ချာပီ၊ အဲ…အဖိုးကတော့ လွန်ခဲ့တဲ့ နှစ်ပေါင်း ၆၀၀ လောက်ကမှ ပေါ်ပေါက်လာတဲ့ ဆစ်ခ် Sikh ဘာသာကို ကိုးကွယ်ယုံကြည်သူ ဖြစ်လေတော့ ဆစ်ခ်ပန်ချာပီ ဖြစ်ပါတယ်။
ှ
ခေတ်ဟောင်း မြန်မာရုပ်ရှင်ဇာတ်ကားတွေ ကြည့်ဖူးသူတွေကတော့ ဆရာဝန်အလုပ်ကို အမြဲသရုပ်ဆောင်တတ်တဲ့ ဆစ်ခ်ပန်ချာပီ သရုပ်ဆောင်ကို တွေ့ဖူးကြလိမ့်မယ်။

အိန္ဒိယသမိုင်းကို ဖတ်ထားတဲ့သူတွေကတော့ သိကြမှာပါ။ အိန္ဒိယနိုင်ငံရဲ့ လွတ်လပ်ရေးကြိုးပမ်းမှုခေါင်းဆောင်တစ်ဦးဖြစ်တဲ့ ဗိုလ်ချုပ်အောင်ဆန်းတို့နဲ့ ခေတ်ပြိုင် တစ်ခါ အိန္ဒိယနိုင်ငံရဲ့ ပထမဆုံး ၀န်ကြီးချုပ် ဂျဝါဟလာ နေရူး Jawaharlal Nehru ရဲ့သမီး အဲဒီတုန်းက လက်ရှိဝန်ကြီးချုပ် (အိန္ဒိယရဲ့ ပထမဆုံးနဲ့ တစ်ဦးတည်းသော အမျိုးသမီးဝန်ကြီးချုပ်) အင်ဒီရာ ဂန္ဒီ Indira Gandhi ကို (သူတို့ရဲ့ အထွတ်အမြတ်ထားရာ ဘုရားရှိခိုးကျောင်း Golden Temple နဲ့ ပတ်သက်ပြီး) လုပ်ကြံသတ်ဖြတ်လိုက်တဲ့ ၀န်ကြီးချုပ် ကိုယ်ရံတော်တွေဟာ ဆစ်ခ်ပန်ချာပီတွေပါ။

အိန္ဒိယနိုင်ငံရဲ့ စီးပွားရေးပြုပြင် ပြောင်းလဲမှုတွေကို ဆောင်ရွက်ခဲ့သူ စီးပွားရေးပညာရှင်နဲ့ အခုလက်ရှိ အိန္ဒိယ၀န်ကြီးချုပ် မန် မိုဟန်ဆင်း Manmohan Singh ဟာလည်း ဆစ်ခ်တစ်ယောက် ဖြစ်ပါတယ်။ သူဟာ အိန္ဒိယနိုင်ငံရဲ့ ပထမဆုံး ဆစ်ခ်ဝန်ကြီးချုပ်လည်း ဖြစ်ပါတယ်။

အရင်ကတော့ မြန်မာမှာကော နိုင်ငံတကာမှာပါ ဆစ်ခ်တွေဟာ ဆရာဝန်တွေ၊ အင်ဂျင်နီယာတွေ၊ ပညာတတ်တွေ၊ စီးပွားရေးသမားတွေ အများစု ဖြစ်ပေမယ့် အခုတော့ သိပ်မပြည့်စုံသူတွေလည်း တွေ့လာနေရပါတယ်။

နိုင်ငံရပ်ခြားမှာ စီးပွားရှာဖို့လာတဲ့ အဖိုးဟာ ပန်ဂျပ်ကနေ ခရီးမိုင် ၁၈၀၀ လောက်ရှိတဲ့ မွန်ပြည်နယ် ကျိုက်ထိုမြို့ကို ရောက်လာပြီး အဖွားနဲ့ ညားပါတယ်။ အဖိုး ဘာကြောင့် ကျိုက်ထိုလာသလဲဆိုတာကို ကိုယ် စဉ်းစားပါတယ်။

အင်္ဂလိပ်တွေက တပြည်လုံး သိမ်းထားတာဆိုတော့ ရန်ကုန်တို့၊ ပဲခူးတို့၊ မော်လမြိုင်တို့လည်း သွားလို့ရပါလျက်နဲ့ ဘာကြောင့် ကျိုက်ထိုကို သွားခဲ့ပါသလဲ။ အညာကို ဘာလို့မသွားခဲ့တာလဲ။ ပျော်ဘွယ်၊ ရမည်းသင်း ဒါမှမဟုတ် မြစ်ကြီးနား၊ မေမြို့ကို ဘာလို့ မသွားခဲ့တာလဲ။

မင်း…ဖြစ်လာဖို့အတွက်ပေါ့ကွာလို့ ဖြေရမှာလား။ မှန်ပါတယ်။ ဒါပေမဲ့ အဖိုးအရင် အဖိုးလိုပဲ အရှေ့ဘက်ထွက်လာတဲ့သူတွေ ဆစ်ခ်တွေ ကျိုက်ထိုကို အရင်ရောက်နှင့်ပြီး ဖြစ်ပါတယ်။ ဒါကြောင့် အဖိုးလည်း တဆင့်စကား တဆင့်နားနဲ့ ကျိုက်ထိုကို တန်းတန်းမတ်မတ် လာခဲ့ပုံရပါတယ်။

ဆစ်ခ်တွေ ကျိုက်ထိုကို အရင်လာခဲ့ပုံရတယ်လို့ ဘာကြောင့်ပြောနိုင်သလဲဆိုတော့ အဖွားအမေ ကျိုက်ထိုသူ မွန်မကြီးဟာ ဆစ်ခ်ပန်ဂျာပီကိုပဲ ယူခဲ့လို့ပါ။ သူ့မိခင်ကြီး အဖွားရဲ့အဖွား ဖြစ်သူက ဆစ်ခ်ပန်ချာပီ ယူမယူ သေချာမသိပါ။ ဒါပေမဲ့ အဲဒီတုန်းကတော့ ဆစ်ခ်တွေ ကျိုက်ထိုကို မရောက်လောက်သေးဘူးလို့ ယူဆရပါတယ်။

ဒီတော့ အဖွားရဲ့အမေကို မွန်အစစ်လို့တွက်ပြီး သူ့ယောက်ျားကို ဆစ်ခ်ပန်ချာပီလို့တွက်ရင် အဖွားဟာ မွန်+ဆစ်ခ်ပန်ချာပီ(ကပြား) ဖြစ်ပါပြီ။ အဖွားနဲ့ အဖိုးအကြောင်းပါတော့ အမေ့ကို မွေးတဲ့အခါ (မွန်+ဆစ်ခ်ပန်ချာပီ)+ဆစ်ခ်ပန်ချာပီ ဖြစ်တာမို့ အမေဟာ (မွန်တစ်မတ် ၂၅၊ ဆစ်ခ် သုံးမတ် ၇၅) ဖြစ်ခဲ့ပါတယ်။

အဖိုးဟာ ကျိုက်ထိုမှာ စီးပွားရေးအဆင်ပြေတော့ တခါ ရန်ကုန်တက် စီးပွားနယ်ချဲ့ပါတယ်။ အမေ့ကို ရန်ကုန်မြို့လယ်က ဆေးခန်းတစ်ခု (အဖွားက လတ္တာလမ်းလို့ အသံထွက်ပါတယ်၊ အခုတော့ တရုတ်တန်းက လသာလမ်းဖြစ်ပါတယ်) မှာ မွေးပါတယ်။ အမေပြထားလို့ အဲဒီဆေးခန်းနေရာကို သိပါတယ်။

အမေက ဆယ်တန်းအောင်ပြီးစမှာ အိမ်ထောင်ကျ၊ ယောက်ျားရပြီးမှ အိမ်ထောင်ကျတာ (လင်ယူမိတာ) မှားပြီဆိုပြီး ညည်းတတ်ပေမယ့် ပထမနှစ်ကျောင်းသူ ဘ၀မှာ ကျွန်တော်၊ ဒုတိယနှစ်မှာ ညီလေး၊ စတုတ္ထနှစ်မှာ ညီမလေး မွေးပါတယ်။

ဥပဒေကျောင်းသူ အမေက အိမ်ထောင်ကျပြီးမှ တက္ကသိုလ်တက်ရတာမို့ စာပေးစာယူ (ကိုယ်တို့ခေတ်ကျတော့ အဝေးသင်လို့ ခေါ်ပါတယ်) ငါးနှစ် တက်ခဲ့ရပါ တယ်။ အမေရာ…အဖေ့ကို စိတ်ဆိုးလို့ပဲ တော်တော့တယ်ဗျာ၊ မဟုတ်ရင် နောက်ထပ် ညီတွေ၊ ညီမတွေ ထပ်ရနေဦးမယ်လို့ ကိုယ်က စတော့ ပထမတော့ စိတ်ဆိုးပါတယ်၊ နောက်တော့ ဘာမှ မပြောတော့ပါဘူး။

တက္ကသိုလ်ကျောင်းတက်တော့ ပိုက်ဆံကုန်၊ အိမ်ထောင်ဦးစီး ယောက်ျားက အလုပ်မရှိ၊ ကလေးတွေက တစ်ယောက်ပြီးတစ်ယောက် များလာတော့ အမေ့မှာ သူ့အဖေဆီကပဲ ပိုက်ဆံတောင်းရပါတော့တယ်။ “နင်တို့ကို ငါ့အဖေပိုက်ဆံနဲ့မွေးတာ…“လို့ အမေက စိတ်ဆိုးရင် ပြောတတ်ပါတယ်။

ဆစ်ခ်ပန်ချာပီဖြစ်တဲ့ အဖိုးကလည်း သမီးမွေးထားတော့ သမီးကနေမှ ဖြစ်လာတဲ့ မြေးယောက်ျားလေး ကိုယ်တို့ ညီအစ်ကို ကို အလွန်ချစ်ပါတယ်။ မြေးဦးဖြစ်တဲ့ ကိုယ့်ဆို တကယ့် အသည်းအသန် ချစ်ပါတယ်။ အဖွားကဆို ပိုဆိုးပါတယ်။ အဖွားက ကိုယ့်ဆို အလွန် အလိုလိုက်ပါတယ်။

ဆစ်ခ်ပန်ချာပီဆိုတော့ ကုလား၊ တရုတ်တို့လိုပဲ သမီးထက် သားကို ပိုအလေးထားတာကိုးဗျာ။ တက္ကသိုလ်ကျောင်းလည်း တက်နေရတော့ အမေဟာ ကိုယ် ၄၅ ရက်သားမှာပဲ အဖိုးအဖွားဆီ ပို့လိုက်ပါတော့တယ်။ နောက် ကိုယ်တို့သွားနိုင်လာနိုင်တဲ့အရွယ်ရောက်တော့ အဖိုးရဲ့ အကူအညီတွေ အထောက်အပံ့တွေ အများကြီး ယူထားတဲ့ အမေဟာ သူ့အဖေ စိတ်ကျေနပ်အောင် ကိုယ်တို့ကို ဆစ်ခ်ဘုရားကျောင်း ထည့်ပေးပါတယ်။

ကိုယ်တို့ဟာ အဖိုးနဲ့အတူ ရန်ကုန်မြို့၊ သိမ်ဖြူလမ်းပေါ်မှာရှိတဲ့ စိန်ပေါကျောင်းရှေ့က ဆစ်ခ်ဘုရားကျောင်းကို တနင်္ဂနွေနေ့တွေမှာ တက်ရပါတယ်။ အဲဒီကျတော့ ကိုယ်တို့ ညီအစ်ကို ကို ဗမာလေးတွေတဲ့။ ဘုန်းကြီးကျောင်းသွားတော့ ကုလားလေးတွေ တစ်နည်း ပန်ချာပီလေးတွေ၊ ဆစ်ခ်ဘုရားကျောင်းသွားတော့ ဗမာလေးတွေ ဖြစ်ပြန်ပါရော…။

ဟုတ်ပါတယ်လေ၊ ဗမာတွေကြားမှာတော့ ဗမာအစစ်ရုပ် မဟုတ်တာက သိသာနေသလို၊ နှုတ်ခမ်းမွှေးတွေ၊ မုတ်ဆိတ်တွေ၊ ခေါင်းပေါင်းတွေနဲ့ ဆစ်ခ်တွေကြားမှာလည်း ကိုယ်တို့ရုပ်တွေက ဗမာလေးတွေပါပဲ။ တစ်ကိုယ် နှစ်ဘ၀ပေါ့လေ။ အဖိုးကျေနပ်အောင် ကိုယ် ဆယ်တန်းဖြေပြီးကာစက တခါ မေမြို့မှာ ဖွင့်လှစ်တဲ့ ဆစ်ခ်ဘာသာရေး အခြေခံသင်တန်းကို တက်ခဲ့ရပါသေးတယ်။ အဖိုးပေးတာ ကျွေးတာတွေ စားခဲ့၊ အဖိုးပြင်တာ ဆင်တာတွေ ၀တ်ခဲ့၊ အဖိုးထားပေးတဲ့ ကျောင်းမှာ နေခဲ့ရတော့လည်း ဒီလောက်တော့ ပြန်ကျေးဇူးဆပ်ရတာပေါ့လေ။

ဆစ်ခ်ဘာသာကတော့ လွန်ခဲ့တဲ့ နှစ်ပေါင်း ၆၀၀ လောက် (၁၅ ရာစု) က ပန်ဂျပ်ပြည်မှာ စတင်ပေါ်ပေါက်လာတာပါ။ ကမ္ဘာပေါ်က အဓိက ဘာသာကြီးလေးခု (ဟိန္ဒူ၊ ဗုဒ္ဓဘာသာ၊ ခရစ်ယာန်၊ အစ္စလာမ်) ပြီးရင် ပဉ္စမမြောက် ကိုးကွယ်ယုံကြည်သူ အများဆုံးဘာသာလို့ ၀ီကီမှာတော့ ရေးထားပါတယ်။ ဆစ်ခ်ဆိုတာဟာ ဆရာသခင်ရဲ့ အဆုံးအမကို လိုက်နာသူများလို့ အဓိပ္ပာယ်ရပါတယ်။

သူတို့ဟာ ဘုရားသခင်ဆိုတာကို ယုံကြည်ပြီး၊ ဆရာသခင် (ဂုရု) ဆယ်ပါးကို ကိုးကွယ်လို့ သူတို့ရဲ့ အဆုံးအမတွေကို လိုက်နာကျင့်သုံးပါတယ်။ ဆရာသခင် အဆက်ဆက် လမ်းညွှန်ဆုံးမ ရေးသားထားတာတွေကို နောက်ဆုံးဂုရုက ပြန်ရေးသား တည်းဖြတ်ပြီး စာတစ်အုပ်ရေးထုတ်လိုက်တော့ အဆုံးအမပေါင်းချုပ် ဖြစ်လာပါတယ်။ အဲဒါကို ဘာသာရဲ့လမ်းညွှန်(ဓမ္မ)အဖြစ် ခံယူထားကြသူတွေပါ။ ဗုဒ္ဓကိုလည်း ရိုသေလေးစားပြီး ဂုရုတစ်ပါးအဖြစ် အသိအမှတ်ပြုပါတယ်။

အမေဟာ ဆစ်ခ်သွေး ၇၅ ရာခိုင်နှုန်းပါပေမယ့် ဆစ်ခ်ဘုရားကျောင်းကို သူငယ်ငယ်က သွားတာကလွဲလို့ မသွားတော့ပါ။ အမေဟာ ငယ်ငယ်က အတူနေတဲ့ (ကိုယ့်အဖွားရဲ့အမ) သူ့ကြီးတော်၊ သူ့အမတွေနဲ့ နွေရာသီ ဗုဒ္ဓဘာသာ တရားစခန်းဝင်တာစကလို့ နေ့စဉ်ဘုရားရှိခိုးတာ၊ ဘုရားဆုတောင်းတာ၊ ဘုရားကို အလွန်ယုံကြည်တာ စသဖြင့် ဗုဒ္ဓဘာသာကို နှစ်နှစ်ကာကာ သက်ဝင်ယုံကြည်ပါတယ်။

ဗမာအစစ်ဖြစ်တဲ့ အဖေ့ထက်တောင် ဗုဒ္ဓဘာသာကို ပိုပြီး သက်ဝင် ယုံကြည်ပါတယ်။ အဖေကတော့ စာတွေဖတ်ပြီး ဘာသာရေးနဲ့ပတ်သက်လို့ အများကြီး သိထားပေမယ့် အမေ့လို တကယ်ယုံကြည်သလို လက်တွေ့ကျင့်ကြံ အားထုတ်တာမျိုး သိပ်မတွေ့ရခဲ့ပါဘူး။

အမေ့ဘက်က ဇာစ်မြစ်ကို တူးပြီးပြန်တော့ ကိုယ့်အဖေဘက် လှည့်ရမယ်ဆိုရင် အဖေ့ကတော့ ဗမာအစစ်ဖြစ်ပြီး စောနပြောခဲ့တဲ့ အဖွားယောက်ျား ကိုယ့်အဖိုးက သူကြီး ဖြစ်ပါတယ်။ ဧရာဝတီမြစ်ဝကျွန်းပေါ်ဒေသ ဖျာပုံမြို့ဘက်ကနေ ရန်ကုန်တက်လာပုံရပြီး အခြေချဖြစ်တဲ့အခါ တစ်ရပ်လုံးက အမျိုးတွေဖြစ်လေတော့ အဖိုးက သူကြီး လုပ်ပါတယ်။ ရန်ကုန် ကျောက်မြောင်းရပ် အရိုးကုန်းလို့ ခေါ်တဲ့နေရာက ဖြစ်ပါတယ်။

အမေတို့ သားအမိနှစ်ယောက်က အဖိုးနဲ့ အဆင်မပြေဖြစ်တုန်း ကျောက်မြောင်းရပ်က အဖေ့မိဘအိမ်မှာ အိမ်ငှားအဖြစ် ခေတ္တခဏ လာငှားနေလေတော့ ကိုယ့်လိုမဟုတ်ဘဲ စကားချိုချိုသာသာ ပြေပြေပြစ်ပြစ် ပြောတတ်တဲ့ အဖေဟာ အကယ်ဒမီရှော့တွေ ဘယ်လောက်လုပ်လိုက်တယ် မသိပါဘူး။ ကိုယ့်တို့တတွေဖြစ်လာမယ့် ဇာတ်လမ်းဖန်ခဲ့ပါတော့တယ်။

ဒီတော့ ကိုယ်တို့မောင်နှမတွေဟာ (မွန်တစ်မတ် ၂၅ + ဆစ်ခ်သုံးမတ် ၇၅)+ဗမာ ၁၀၀ ပေါင်းထားတဲ့ သွေးစပ် ဖြစ်သွားပါတော့တယ်။ အဖြေထုတ်လိုက်ရင်တော့ ကိုယ်ဟာ ဗမာ ငါးမူး ၅၀+ ဆစ်ခ်ပန်ချာပီ တစ်မတ်ကျော် ၃၇.၅ + မွန် အ၀က်သား ၁၂.၅ ဖြစ်ပါတယ်ခင်ဗျ။

ဆစ်ခ်ပန်ချာပီသွေး အဖိုးဆီကပါလာတော့ အရပ် ၅ ပေစီပဲရှိတဲ့ မိဘနှစ်ပါးက မွေးတဲ့ကိုယ်ဟာ မျိုးဗီဇ တဆင့်ခုန်ကျော်ပြီး၊ ၅ ပေ ၁၀ လက်မ အရပ် ရလိုက်ပါတယ်။ မာတာမိခင် ကျေးဇူးရှင်အမေရဲ့ များလှစွာသော ကျေးဇူးတွေထဲမှာ အရပ်မြင့်မြင့်မွေးထားတာ တစ်ခုထဲနဲ့တင် ကျေးဇူးကျေအောင် ဘယ်လို ဆပ်ရမှန်း မသိသေးပါ။

အရပ်မြင့်တော့ မြန်မြန်အိုစာတယ်လို့ ပြောလို့ရပေမယ့် ဝေးဝေးမြင်နိုင်တာပေါ့လေ။ ဝေးဝေးမြင်ချင်ရင် အမြင့်တက်ကြည့်ရတယ်လို့ ဆိုတယ်မဟုတ်လားဗျာ။

ပျံလွန်တော်မူသွားပြီဖြစ်တဲ့ ဆရာတော်ကြီးက သူ့ကျောင်းသားကို ခေါ်တဲ့ “ပန်ချာပီ“ဆိုတဲ့ စကားသံကတော့ တစ်ခါတရံ ကြားယောင်ဆဲပါဗျာ။

၂၀၁၀ ပြည့်နှစ်၊ ဇူလိုင်လ ၃၀ ရက်။ ညနေ ၆ နာရီခွဲ။